တောင်ငူမြို့ ကျက်သရေဆောင် သမိုင်းဝင် ရွှေဆံတော်စေတီတော်မြတ်ကြီး၌ အသံမစဲမဟာပဋ္ဌာန်းအောင်ပွဲ ပြုလုပ်
နေပြည်တော်၊ မေ - ၁၄
ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့ ကျက်သရေဆောင် သမိုင်းဝင် ရွှေဆံတော်စေတီတော်မြတ်ကြီး၏ ရင်ပြင်ပေါ်ရှိ ကိုးခန်းဂန္တဝင်သိမ်တော်ကြီး၌ အသံမစဲမဟာပဋ္ဌာန်းအောင်ပွဲကို ယနေ့နံနက်ပိုင်းတွင် ပြုလုပ်ရာ တောင်ငူမြို့၊ အောင်မြင်ဇေယျုံစာသင်တိုက်ကြီး၏ ဦးစီးပဓာနနာယက နိုင်ငံတော်သံဃမဟာနာယက အဖွဲ့ဝင် အဂ္ဂမဟာပဏ္ဍိတ ဘဒ္ဒန္တဇဝန အမှူးပြုသော သံဃာတော် အရှင်သူမြတ်များ၊ တောင်ပိုင်းတိုင်းစစ်ဌာနချုပ် တိုင်းမှူး ဗိုလ်ချုပ် ထိန်ဝင်းနှင့် တာဝန်ရှိသူများ၊ စေတနာ ရှင်အလှူရှင်များ တက်ရောက်ကြသည်။
ဦးစွာ တောင်ငူမြို့၊ အောင်မြင်ဇေယျုံစာသင်တိုက်ကြီး၏ ဦးစီးပဓာနနာယက ဆရာတော်ထံမှ ငါးပါးသီလခံယူဆောင်တည်ကြပြီး သံဃာတော်အရှင်သူမြတ်များက မေတ္တာသုတ် တရားတော်များ ချီးမြှင့်ဟောကြားသည်။ ထို့နောက် တိုင်းမှူးနှင့် ဧည့်ပရိတ်သတ်အပေါင်းတို့က သံဃာတော်အရှင်သူမြတ်များအား သင်္ကန်း၊ လှူဖွယ် ဝတ္ထုပစ္စည်းများနှင့် နေ့ဆွမ်းများ ဆက်ကပ်လှူဒါန်းခဲ့ကြောင်း သတင်းရရှိသည်။