ဗုဒ္ဓဘာသာကလျာဏယုဝအသင်းကြီး (YMBA) မှ သံဃာတော်များအား မဟာမင်္ဂလဓမ္မ ဇောတိကဓဇဘွဲ့တံဆိပ်တော်များ ဂုဏ်ပြုချီးမြှင့်ပူဇော်ခြင်းမင်္ဂလာ ပြုလုပ်
နေပြည်တော်၊ ဇန်နဝါရီ - ၁၀
ဗုဒ္ဓဘာသာကလျာဏယုဝအသင်းကြီး (YMBA) မှ သံဃာတော်များအား မဟာမင်္ဂလဓမ္မဇောတိကဓဇ ဘွဲ့တံဆိပ်တော်များ ဂုဏ်ပြုချီးမြှင့်ပူဇော်ခြင်းမင်္ဂလာကို ယနေ့ နံနက်ပိုင်းတွင် ရှမ်းပြည်နယ်(အရှေ့ပိုင်း)၊ ကျိုင်းတုံမြို့ရှိ ဝက်အင်းကျောင်းတိုက်၌ ပြုလုပ်ရာ ဝက်အင်းကျောင်းတိုက် ဆရာတော် ဘဒ္ဒန္တဂမ္ဘီယ အမှူးပြုသော သံဃာတော်များကြွရောက် တော်မူကြပြီး တြိဂံဒေသတိုင်းစစ်ဌာနချုပ် တိုင်းမှူး ဗိုလ်ချုပ် ခင်လှိုင်နှင့် အဖွဲ့ဝင်များ၊ YMBA အသင်းဥက္ကဋ္ဌ ဦးရဲထွန်းနှင့် အဖွဲ့ဝင်များ၊ ဖိတ်ကြားထားသူများ တက်ရောက်ကြသည်။
ဦးစွာ တိုင်းမှူးနှင့် တက်ရောက်လာကြသူများက ဝက်အင်းကျောင်းတိုက် ဆရာတော် ထံမှ ငါးပါးသီလခံယူဆောက်တည်ကြပြီး YMBA အသင်းဒုတိယဥက္ကဋ္ဌ ဒေါက်တာ ကျော်သူ က မဟာမင်္ဂလဓမ္မဇောတိကဓဇ ဘွဲ့တံဆိပ်ပူဇော်ဆက်ကပ်ခြင်းနှင့်ပတ်သက်၍ လျှောက်ထား ရှင်းလင်းသည်။ ထို့နောက် တိုင်းမှူးက ဝက်အင်းကျောင်းတိုက် ဆရာတော်အား မဟာမင်္ဂလ ဓမ္မဇောတိကဓဇ ဘွဲ့တံဆိပ်တော်ကို ပူဇော်ဆက်ကပ်ပြီး ဆရာတော်ထံမှ သြဝါဒစကားခံယူကြ သည်။
ဆက်လက်၍ ဗုဒ္ဓဘာသာကလျာဏယုဝအသင်းကြီး (YMBA) ၏ မဟာမင်္ဂလဓမ္မ ဇောတိကဓဇ ဘွဲ့တံဆိပ်တော်များ ဂုဏ်ပြုချီးမြှင့်ပူဇော်ခြင်းမင်္ဂလာကို သီလဓမ္မကုန်းသာ တောရကျောင်းတိုက်၌ ဆက်လက်ပြုလုပ်ရာ တိုင်းမှူး ဗိုလ်ချုပ် ခင်လှိုင်က သံသရာအေး ကျောင်းတိုက် ဆရာတော် ဘဒ္ဒန္တကောသံလ အား လည်းကောင်း၊ YMBA အသင်းဥက္ကဋ္ဌ ဦးရဲထွန်းက သီလဓမ္မကုန်းသာတောရ(ဝစီပိတ်)ကျောင်း ဆရာတော် ဘဒ္ဒန္တကောဝိဒ အားလည်းကောင်း၊ ဒုတိယတိုင်းမှူး ဗိုလ်မှူးချုပ် ထွန်းမြတ်ရွှေ က ရပ်တော်မူကျောင်း ဆရာတော် ဘဒ္ဒန္တတေဇနိယ အားလည်းကောင်း မဟာမင်္ဂလဓမ္မဇောတိက ဘွဲ့တံဆိပ်တော်များ အသီးသီး ကပ်လှူပူဇော်ကြသည်။
၎င်းနောက် တိုင်းမှူးနှင့် တက်ရောက်လာကြသူများက ဘွဲ့တံဆိပ်တော်ရ သြဝါဒါ စရိယ ဆရာတော်ကြီးများထံမှ သြဝါဒခံယူကြပြီး သံဃာတော်များအား နေ့ဆွမ်းဆက်ကပ် လှူဒါန်းခဲ့ကြောင်း သတင်းရရှိသည်။