ဘီဘီစီ တစ်နှစ်တာ အကောင်းဆုံး အားကစားဆုရွေးချယ်ပွဲကို ဒီဇင်ဘာ ၂ဝ ရက်ကကျင်းပရာ လီဗာပူးအသင်း နည်းပြ ဂျာဂန်ကလော့နှင့် လီဗာပူးအသင်းတို့က အဓိကဆုကြီးနှစ်ခုကို ဆွတ်ခူးနိုင်ပြီး မန်ယူတိုက်စစ်မှူး ရက်ရှ်ဖို့က အထူးဆုရရှိခဲ့သည်။ BBC Sports Personality of the Year ဆုကို ရွေးချယ်ပေးအပ်ရာတွင် ဂျာဂန်ကလော့သည် လီဗာပူးအသင်းကို နှစ် ၃ဝ ကြာ ဝေးကွာနေသော အမှတ်ပေးချန်ပီယံဆု ရယူပေးနိုင်ခဲ့သဖြင့် တစ်နှစ်တာ အကောင်းဆုံး နည်းပြဆုရရှိခဲ့ပြီး လီဗာပူးအသင်းသည်လည်း တစ်နှစ်တာ အကောင်းဆုံးအသင်းဆု ဆွတ်ခူးနိုင်ခဲ့သည်။
ဘီဘီစီ တစ်နှစ်တာ အကောင်းဆုံး အားကစားသမားဆုကို ဂျာမန်ဖော်မြူလာဝမ်း ပြိုင်ကားဂန္ထဝင် မိုက်ကယ်ရှူးမေကာ၏ ကမ္ဘာ့ချန်ပီယံဆု ခုနစ်ဆုရစံချိန်အား ယခုနှစ်အတွင်း လိုက်မီနိုင်ခဲ့သော ဗြိတိန် ပြိုင်ကားသမား လူးဝစ်ဟာမီလ်တန်က ဆွတ်ခူးရရှိခဲ့ကာ ဒုတိယဆုကို လီဗာပူးမှ ဂျော်ဒန်ဟန်ဒါဆန်က ရရှိခဲ့သည်။
ဗြိတိန်တွင် စာသင်ကျောင်းများ၌ နံနက်စာ အခမဲ့ကျွေးမှုကို အစိုးရက ထောက်ပံ့မှု ရုပ်သိမ်းခဲ့ခြင်းအား ပြန်ပေးရန်နှင့် ကိုယ်တိုင်လည်း ရန်ပုံငွေရှာပေးခဲ့သော မန်ယူ တိုက်စစ်မှူး ရက်ရှ်ဖို့ဒ်လည်း ဆုပေးရေး အဖွဲ့၏ အထူးဆုရရှိခဲ့ကြောင်း သိရသည်။