မန္တလေးမြို့၊ မဟာမြတ်မုနိရုပ်ရှင်တော်မြတ်ကြီး၌ (၃၂) ကြိမ်မြောက်မသိုးသင်္ကန်းတော်ကပ်လှူ ပူဇော်ပွဲ ပြုလုပ်
နေပြည်တော်၊ နိုဝင်ဘာ - ၁၈
မန္တလေးတိုင်းဒေသကြီး၊ မန္တလေးမြို့၊ မဟာမြတ်မုနိရုပ်ရှင်တော်မြတ်ကြီးအား (၃၂)ကြိမ်မြောက် မသိုးသင်္ကန်းတော်ကပ်လှူပူဇော်ပွဲကို ယနေ့တွင်ပြုလုပ်ရာ တောင်ပြင်ထီးလင်းတိုက်၊ သဲကုန်းကျောင်းဆရာတော် နိုင်ငံတော်ဗဟိုသံဃာ့ဝန်ဆောင် အဂ္ဂမဟာပဏ္ဍိတ ဘဒ္ဒန္တ ဥက္ကဋ္ဌ (ရေတော်ဆရာတော်) အမှူးပြုသော သံဃာတော်များ၊ တိုင်းဒေသကြီး ဝန်ကြီးချုပ် ဦးမောင်ကို၊ အလယ်ပိုင်း တိုင်းစစ်ဌာနချုပ် တိုင်းမှူး ဗိုလ်ချုပ် ကိုကိုဦးနှင့် ဌာနဆိုင်ရာတာဝန်ရှိသူများ တက် ရောက်ကြသည်။
ဦးစွာ ဆရာတော်ဘုရားကြီးဦးဆောင်၍ တိုင်းဒေသကြီး ဝန်ကြီးချုပ် တိုင်းမှူးနှင့် တက်ရောက်လာကြသူများက တဘက်တော်၊ မသိုးမြတ်သင်္ကန်းတော်၊ သင်းပိုင် သင်္ကန်းတော်နှင့် ဧကသီသင်္ကန်းတော်များအား ကိုင်ဆောင်၍ မဟာမြတ်မုနိရုပ်ရှင် တော်မြတ်ကြီးအားလှည့်လည်ပူဇော်ကြပြီး မသိုးသင်္ကန်းနှင့် ဆွမ်း၊ ရေချမ်းများ ကပ်လှူပူဇော်ကြသည်။ ထို့နောက် တိုင်းဒေသကြီးဝန်ကြီးချုပ်နှင့် တိုင်းမှူးတို့က မဟာမြတ်မုနိရုပ်ရှင်တော်မြတ်ကြီးအတွင်းရှိ မိုးကောင်းဓမ္မရုံ၌ ရေကြည်ပေါက်ကျေး ရွာ ယက္ကန်းပညာရှင်အဖွဲ့၊ အင်းလေးဒေသယက္ကန်းပညာရှင်အဖွဲ့၊ စက်ချုပ်ပညာရှင် အဖွဲ့နှင့် ဗုဒ္ဓဝေယျာဝစ္စအဖွဲ့တို့အား ဂုဏ်ပြုဆုငွေနှင့် ဂုဏ်ပြုမှတ်တမ်းလွှာများ အသီးသီး ပေးအပ်ခဲ့ကြောင်း သတင်းရရှိသည်။