ရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း)မြို့နယ်ရှိ DENKO စက်သုံးဆီအရောင်းဆိုင်နှင့် လှိုင်မြို့နယ်၊ ဘုရင့်နောင်လမ်းပေါ်ရှိ “မြမေတ္တာမွန်” စက်သုံးဆီ အရောင်းဆိုင်တို့အား အကြမ်းဖက် သမားများက သေနတ်ပစ်ဖောက် ခြိမ်းခြောက် လုယက်၍ မီးရှို့ဖျက်ဆီး
နေပြည်တော်၊ မတ် ၂၆
ရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း)မြို့နယ်ရှိ DENKO စက်သုံးဆီ အရောင်း ဆိုင်သို့ အကြမ်းဖက်သမား ၆ ဦးက မော်တော်ယာဉ်တစ်စီးဖြင့် ရောက်ရှိလာပြီး သေနတ်ပစ်ဖောက် ခြိမ်းခြောက်ကာ ဆီရောင်းချငွေ ငွေကျပ်သိန်း ၆၀ အား လုယက်ယူဆောင်၍ ဆီပန့်များအား လက်ပစ်ဗုံးဖြင့်ဖောက်ခွဲကာ မီးတုတ်များဖြင့် မီးရှို့ဖျက်ဆီးခဲ့ကြောင်း သိရသည်။
ဖြစ်စဉ်မှာ မတ်လ ၂၅ ရက်နေ့ ည ၈ နာရီ ၁၀ မိနစ်တွင် ဒဂုံမြို့သစ် (မြောက်ပိုင်း) မြို့နယ်၊ (၂၇)ရပ်ကွက်၊ ဘုရင့်နောင်လမ်းပေါ်တွင် ဖွင့်လှစ်ထားသည့် DENKO စက်သုံးဆီ အရောင်း ဆိုင်အတွင်းသို့ Probox အမျိုးအစားမော်တော်ယာဉ် အဖြူရောင်တစ်စီးရောက်ရှိလာပြီး အဆိုပါ ယာဉ်ပေါ်မှ အကြမ်းဖက်သမား ၆ ဦးက သေနတ်၊ ဓားများကိုင်ဆောင်၍ ဆီဆိုင်အတွင်းရှိ ဝန်ထမ်း များနှင့် ဆီဖြည့်ရန်လာရောက်သူများအား သေနတ်ပစ်ဖောက်ခြိမ်းခြောက်ကာ ကောင်တာအား ကာရံထားသည့် မှန်များအား ရိုက်ခွဲခဲ့ကြောင်း၊ ထို့နောက် ကောင်တာအတွင်းထားရှိသည့် ဆီရောင်းချထားသည့် ငွေကျပ် သိန်း ၆၀ ခန့်ကို လုယက်ယူဆောင်၍ ဆီပန့်များအနီးသို့ လက်ပစ်ဗုံး တစ်လုံးဖြင့် ပစ်ပေါက်ဖောက်ခွဲကာ ဆီပန့်အား ၎င်းတို့ထံတွင် အသင့်ယူဆောင်လာသည့် မီးတုတ် ၂ ချောင်းဖြင့် မီးရှို့ဖျက်ဆီး၍ Probox မော်တော်ယာဉ်ဖြင့်ပင် ထွက်ပြေးသွားခဲ့ကြောင်း သိရသည်။
အကြမ်းဖက်သမားများ ထွက်ခွာသွားပြီးနောက် ဆိုင်ဝန်ထမ်းများသည် မီးလောင်လျက် ရှိသည့် ဆီပန့် ၂ ခုအား မီးသတ်ဆေးဘူးများဖြင့် ဝိုင်းဝန်းမီးငြှိမ်းသတ်ခဲ့ကြောင်း၊ အကြမ်းဖက် သမားများ၏ ဖျက်ဆီးခဲ့မှုကြောင့် ဆီပန့် ၂ခု မီးလောင်ပျက်စီးကာ ငွေသိမ်းကောင်တာတွင် ကာရံထားသည့် မှန်များကွဲအက်ပျက်ဆီးခဲ့ကြောင်းနှင့် ဖြစ်စဉ်နေရာမှ အကြမ်းဖက်သမားများ မီးရှို့ရာတွင် အသုံးပြုခဲ့သည့် သစ်သားမီးတုတ် ၂ ချောင်းနှင့် လက်ပစ်ဗုံး လီဗာတံ တစ်ခု၊ 9 MM ကျည်ခွံ ၄ ခုတို့ သိမ်းဆည်းရမိခဲ့ကြောင်း သိရသည်။
အလားတူ ရန်ကုန်တိုင်းဒေသကြီး၊ လှိုင်မြို့နယ်၊ ဘုရင့်နောင်လမ်းပေါ်ရှိ “မြမေတ္တာမွန်” စက်သုံးဆီ အရောင်းဆိုင်သို့ ယနေ့နံနက် ၅ နာရီ ၁၀ မိနစ်တွင် အကြမ်းဖက်သမား အမျိုးသား ၃ ဦးတို့ ဝင်ရောက်လာပြီး ဝန်ထမ်းများဖြစ်သည့် ဦးစောလွင်ဦး (၄၀)နှစ် (ဘ)ဦးကျော်ငြိမ်း၊ ဦးစိုးမိုးနိုင်(၃၇)နှစ် (ဘ)ဦးမိုးညိုနှင့် ဦးအေးကြိုင် (၃၅)နှစ်(ဘ) ဦးကျော်အေး တို့ ၃ ဦးအား နှိုးကာ ဆိုင်အတွင်း သေနတ်တစ်ချက် ပစ်ဖောက်၍ ဆီပန့် ၃ ခုအား ဓါတ်ဆီဖျန်းမီးရှို့ခဲ့ကြောင်း၊ ငွေသိမ်း ကောင်တာ ၃ ခုအနက် ဆိုင်အလယ်ရှိ ငွေသိမ်းကောင်တာအား လက်ပစ်ဗုံးဖြင့် ပစ်ပေါက် ထွက်ပြေးသွားကြောင်း၊ ဆီပန့် ၃ ခု၌ မီးလောင်မှုဖြစ်ပွားခဲ့သဖြင့် ဦးစောလွင်ဦးတို့ ၃ ဦးနှင့် အနီးပတ်ဝန်းကျင်မှပြည်သူများက ဝိုင်းဝန်းမီးငြှိမ်းသတ်ခဲ့ရာ ၁၀ မိနစ်ခန့်အကြာတွင် မီးငြိမ်းသွားခဲ့ကြောင်းနှင့် ဆိုင်ဝန်ထမ်း ၃ ဦးတွင် ထိခိုက်ဒဏ်ရာရရှိခဲ့ပြီး ဆီပန့် ၃ ခုနှင့် ငွေသိမ်း ကောင်တာအတွင်းရှိ ကွန်ပျူတာနှင့် ဆက်စပ်ပစ္စည်းခန့်မှန်းတန်ဖိုးကျပ်သိန်း ၅၀၀ ခန့် ပျက်စီး ဆုံးရှုံးခဲ့ကြောင်းနှင့် အကြမ်းဖက်သမားများ အသုံးပြုခဲ့သည့် ခြောက်လုံးပြူး သေနတ်တစ်လက်၊ ၎င်းကျည် ၄ တောင့်နှင့် ကျည်ခွံတစ်ခုတို့ သိမ်းဆည်းရရှိခဲ့ကြောင်း သိရသည်။
အဆိုပါဖြစ်စဉ်များမှ အကြမ်းဖက်သမားများအား ဖော်ထုတ်ဖမ်းဆီးရမိနိုင်ရေး လုံခြုံရေး တပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိသည်။