အကြမ်းဖက်အုပ်စုအဖြစ်ကြေငြာထားသော CRPH၊ NUG နှင့် ယင်းတို့၏ လက်ဝေခံများ၏ လှုံ့ဆော်၊ ဝါဒဖြန့်ခြင်းများအား လိုက်ပါလုပ်ဆောင်ခြင်း၊ အားပေးကူညီခြင်းများ ပြုလုပ်ခဲ့သူများအား ဖော်ထုတ်အရေးယူ
နေပြည်တော်၊ ဖေဖော်ဝါရီ - ၆
အကြမ်းဖက်အုပ်စုအဖြစ်ကြေငြာထားသော CRPH၊ NUG နှင့် ယင်းတို့၏ လက်အောက်ခံ အဖွဲ့အစည်းများ၊ ယင်းတို့နှင့်ဆက်နွယ်နေသော အဖွဲ့အစည်းများ၊ လူပုဂ္ဂိုလ်များသည် နိုင်ငံတော် တည်ငြိမ်အေးချမ်းရေးကို ပျက်ပြားစေရန်နှင့် ပြည်သူလူထုကို အကြောက်တရားများ ဖြစ်ပေါ်စေပြီး အစိုးရယန္တရားများ ပျက်ပြားစေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်း၊ ခြိမ်းခြောက်ခြင်းများ ကို လူမှုကွန်ယက်များမှတစ်ဆင့် နည်းမျိုးစုံဖြင့် ပြုလုပ်လျက်ရှိပါသည်။
ပြည်သူများအနေဖြင့် ယင်းတို့၏ လှုံ့ဆော်မှု၊ ဝါဒဖြန့်မှုများအပေါ် မသိနားမလည်၍ ဖြစ်စေ၊ ကြောက်ရွံ၍ ဖြစ်စေ လိုက်ပါလုပ်ဆောင်ခြင်း၊ အသံဖြင့် ဖြစ်စေ၊ ပြုလုပ်မှုဖြင့် ဖြစ်စေ၊ တစ်နည်းနည်းဖြင့် ဖြစ်စေ အများပြည်သူအနှောင့်အယှက်ဖြစ်စေမည့် ပြုလုပ်မှုများ ပြုလုပ်ခြင်း၊ လှုံ့ဆော်ဝါဒဖြန့်မှုများကို ထပ်ဆင့်မျှဝေခြင်း၊ အားပေးကူညီခြင်းများ ပြုလုပ်ခဲ့လျှင် အကြမ်းဖက်မှု တိုက်ဖျက်ရေးဥပဒေပုဒ်မ ၅၂(က)၊ ရာဇသတ်ကြီးပုဒ်မ ၁၂၄-က နှင့် ပုဒ်မ ၅၀၅-က၊ အီလက်ထရောနစ် ဆက်သွယ်ရေးဥပဒေပုဒ်မ ၃၃(က)နှင့် တည်ဆဲဥပဒေများအရ အရေးယူခံရမည့်အပြင် ပြစ်မှုနှင့် သက်ဆိုင်သည့် ရွှေ့ပြောင်းနိုင်သောပစ္စည်း၊ မရွှေ့ပြောင်းနိုင်သော ပစ္စည်းများကို အကြမ်းဖက်မှု တိုက်ဖျက်ရေးဥပဒေအရ သိမ်းဆည်းခံရနိုင်ပြီး ပြစ်မှုထင်ရှားစီရင်ခြင်းခံရပါက နိုင်ငံတော်ဘဏ္ဍာ အဖြစ် သိမ်းဆည်းခံရနိုင်ကြောင်း ၂၀၂၂ ခုနှစ်၊ ဇန်နဝါရီလ ၂၅ ရက်နေ့တွင် နိုင်ငံပိုင်မီဒီယာများမှ တစ်ဆင့် အသိပေးသတင်းထုတ်ပြန်ခဲ့ပြီး ဖြစ်ပါသည်။
ထိုကဲ့သို့ အသိပေးသတင်းထုတ်ပြန်ခဲ့ပြီးဖြစ်သော်လည်း ပဲခူးတိုင်းဒေသကြီး၊ ပြည်မြို့နေ စန္ဒာဝင်း (ခ) မမုန်းသည် ၎င်းအသုံးပြုသည့် “Mone Pyay” Facebook အကောင့်၊ ရွှေတောင်မြို့နေ မြခွာညိုဦးသည် ၎င်းအသုံးပြုသည့် “Mya Khwar Nyo Oo” Facebook အကောင့်၊ ကဝမြို့နေ ထင်လင်းထက်သည် ၎င်းအသုံးပြုသည့် “Moe Thway Nyo” Facebook အကောင့်၊ ပေါင်းတည်မြို့နေ လွင်မာဦးသည် ၎င်းအသုံးပြုသည့် “ပန်းလေးချစ်သူ” Facebook အကောင့်၊ မန္တလေးတိုင်းဒေသကြီး၊ ပြင်ဦးလွင်မြို့နေ ဇေယျာမျိုးသည် ၎င်းအသုံးပြုသည့် “Zayar Myo” Facebook အကောင့်၊ မဟာအောင်မြေမြို့နယ်နေသူများဖြစ်သည့် ဖြူအေးပွင့်၊ သူရအောင်နှင့် ဆန်းဝင်းတို့သည် ၎င်းတို့ အသုံးပြုသည့် “Phyu Aye Pwint”၊ “Thura Aung” နှင့် “U San Win” Facebook အကောင့်များ၊ ရမည်းသင်းမြို့နေ ဆွေဇင်လတ်သည် ၎င်းအသုံးပြုသည့် “Htet Nge Nge (ထက်ငယ်)” Facebook အကောင့်၊ အောင်မြေသာစံမြို့နယ်နေ ဇော်လှိုင်သည် ၎င်းအသုံးပြုသည့် “Zaw Hlaing” Facebook အကောင့်၊ မြင်းခြံမြို့နေ မြင့်မြင့်အေးသည် ၎င်းအသုံးပြုသည့် “မြင့်မြင့်အေး” Facebook အကောင့်၊ ရန်ကုန်တိုင်းဒေသကြီး၊ မရမ်းကုန်းမြို့နယ်နေ အကောင့်ပိုင်ရှင့် (စိစစ်ဆဲ) အသုံးပြုသည့် “Swe Zin New” Facebook အကောင့်၊ ကမာရွတ်မြို့နယ်နေ ဝဏ္ဏစိုး အသုံးပြုသည့် “Wunna Soe (Edo Vater)” Facebook အကောင့်၊ သာကေတမြို့နယ်နေသူများဖြစ်သည့် သွယ့်ရည်ဝင်းနှင့် သိမ်းသိမ်း တို့ ၂ ဦးသည် ၎င်းတို့အသုံးပြုသည့် “Thwet Ye Wynn” နှင့် “Thein Thein” Facebook အကောင့် များနှင့် ခရမ်းမြို့၊ (၁၁)ရပ်ကွက်၊ အမှတ်(၂၃၇)နေ တိုင်းဒေသကြီးလွှတ်တော်ကိုယ်စားလှယ် အဟောင်းဖြစ်သည့် လှတိုး (၅၁)နှစ်သည် ၎င်းအသုံးပြုသည့် “လှတိုး” Facebook အကောင့်တို့သည် အသိပေးသတင်းထုတ်ပြန်ချက်အပေါ်မျက်ကွယ်ပြု၍ နိုင်ငံတော်တည်ငြိမ်အေးချမ်းရေးကို ပျက်ပြား စေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်းများ ပြုမူလုပ်ဆောင်ခဲ့သည့်အတွက် တရားဥပဒေ နှင့်အညီ ဖမ်းဆီးထိန်းသိမ်းအမှုဖွင့်လှစ်အရေးယူခြင်းများဆောင်ရွက်ခဲ့ရပါသည်။
ထိုကဲ့သို့ CRPH၊ NUG နှင့် ယင်းတို့၏ လက်အောက်ခံအဖွဲ့အစည်းများ၊ ယင်းတို့နှင့် ဆက်နွယ်နေသော အဖွဲ့အစည်းများ၊ လူပုဂ္ဂိုလ်များသည် နိုင်ငံတော် တည်ငြိမ်အေးချမ်းရေးကို ပျက်ပြားစေရန်နှင့် အစိုးရယန္တရားများ ပျက်ပြားစေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်း များပြုလုပ်ခဲ့မှုအပေါ် အားပေးကူညီခြင်း ပြုလုပ်ခဲ့သူများအား ဥပဒေနှင့်အညီ ထိရောက်စွာ အရေး ယူသွားမည်ဖြစ်ကြောင်းနှင့် ထိုသို့လှုံ့ဆော်သူ၊ ဝါဒဖြန့်သူများအား ဆက်လက်ဖော်ထုတ် အရေးယူ သွားမည်ဖြစ်ကြောင်း မိဘပြည်သူများ သိရှိနိုင်ရေးအသိပေးသတင်းထုတ်ပြန်အပ်ပါသည်။