ဥက္ကလာဂေါက်ကွင်းတွင် တစ်ချက်တည်းကျင်းဝင်

ရန်ကုန် ဧပြီ ၈

ဥက္ကလာဂေါက်ကွင်းသည် ရန်ကုန်မြို့တွင်းနှင့် အနီးစပ်ဆုံးနေရာတွင် တည်ရှိပြီး နိုင်ငံတကာအဆင့်မီ ကျင်း(၂၇) ကျင်းပါဝင်သော ဂေါက်ကွင်းအဖြစ် အဆင့်မြှင့်တင်ထားရှိကာ နေ့ဘက်တွင် မအားလပ်သူများ အတွက် ညဘက်တွင်ပါ Night Golf ကစားနိုင်ရန် စီစဉ်ပေးထားခြင်းများအပါအဝင် အဆင့်မီဝန်ဆောင်မှုများ ပေးအပ်လျက်ရှိသောကြောင့် ပြည်တွင်း/ပြည်ပ ဂေါက်သီးရိုက်အားကစားသမားများ အများအပြား လာရောက် ကစားလျက်ရှိရာ ဧပြီ ၈ ရက် ညနေ ၄ နာရီ ၁၅ မိနစ်တွင် ဂေါက်သီး ရိုက်ကစားသမား ဦးလှဌေးသည် ကစားဖော်များဖြစ်သော ဦးချစ်သန်း၊ ဦးဘာဘူ၊ ဦးအောင်ကျော်တို့နှင့်အတူ ဂေါက်သီးရိုက် ကစားစဉ် ကျင်းအမှတ်(၂၂)၌ Maxfli No-3 ဘောလုံးကို Majesty N0-6 တုတ်ဖြင့် (၁၄၆)ကိုက် အကွာအဝေးမှ ရိုက်ရာ တစ်ချက်တည်းကျင်းဝင်(Hole In One)သွားခဲ့သည်။

Hole In One ရရှိသော အဆိုပါကစားသမားကို ဥက္ကလာဂေါက်ကွင်းမှ TRISTAR အမှတ်တံဆိပ် တာယာနှစ် လုံးနှင့် (၁)လအတွင်း အခမဲ့ဂေါက်သီးရိုက်ကစားခွင့် (၁၀)ကြိမ် လက်မှတ်များ ပေးအပ်ချီးမြှင့်သွားမည်ဖြစ်ပြီး ဥက္ကလာဂေါက်ကွင်းတွင် Hole In One ရရှိခြင်းမှာ ယခုအကြိမ်နှင့်ဆိုလျှင် (၅၄)ကြိမ်မြောက်ရရှိခြင်းဖြစ်သည်။

ဥက္ကလာဂေါက်ကွင်းအား နိုင်ငံတကာ အဆင့်မီဂေါက်ကွင်းအဖြစ် အဆင့်မြှင့်တင် ဆောင်ရွက်မှုများကို စဉ်ဆက်မပြတ်ဆောင်ရွက်လျက်ရှိပြီး လာရောက်ကစားသူများအား ကျန်းမာရေးနှင့် အားကစားဝန်ကြီးဌာနမှ ထုတ်ပြန်ထားသော COVID-19 ရောဂါ ကာကွယ်ထိန်းချုပ်ရေး လမ်းညွှန်ချက်များနှင့်အညီ လိုက်နာ ဆောင်ရွက်စေပြီး ယခုကာလ၌ အထူးဈေးနှုန်းထားများသတ်မှတ်၍ ဝန်ဆောင်မှုပေးထားလျက်ရှိကြောင်း သတင်း ရရှိသည်။

အေးမင်း