နေပြည်တော်၊ မေ ၂၇
မြန်မာနိုင်ငံအတွင်း အကြမ်းဖက်တိုက်ခိုက်မှုဖြစ်စဉ်များ ဖြစ်ပွားမှုမရှိစေရေးအတွက် လုံခြုံရေးတပ်ဖွဲ့ဝင်များက လိုအပ်သည့်စုံစမ်းဖော်ထုတ်မှုများ ဆောင်ရွက်လျက်ရှိရာ အကြမ်းဖက် သမားများ၏ လက်နက်၊ ခဲယမ်းများ၊ ဖောက်ခွဲရေးပစ္စည်းများနှင့် ဆက်စပ်ပစ္စည်းများကို ဆက်လက် ဖော်ထုတ်သိမ်းဆည်းရမိလျက်ရှိသည်။
ထို့သို့ဖော်ထုတ်ဖမ်းဆီးရာတွင် ၂၀၂၁ ခုနှစ်၊ မေလ ၂၆ ရက်နေ့ နံနက် ၁၀ နာရီ ၄၀ မိနစ် အချိန်တွင် လုံခြုံရေးတပ်ဖွဲ့ဝင်များ ပါဝင်သော ပူးပေါင်းအဖွဲ့သည် ရန်ကုန်- မန္တလေးအမြန်လမ်းမကြီး၊ တံခွန်တိုင်ပူးပေါင်းစစ်ဆေးရေးဂိတ်၌ ရန်ကုန်ဘက်မှ မန္တလေးဘက်သို့ ငါန်းဇွန်မြို့နယ်၊ ပေါက်စိန်း ကျေးရွာနေ ရွှေကို (၂၇)နှစ် (ဘ) ဦးဖိုးတုတ်မောင်းနှင်လာသော ဆိုင်ကယ်အား ရပ်တန့်စစ်ဆေးခဲ့ရာ ၎င်းလွယ်ထားသော ကျောပိုးအိတ်အတွင်းမှ အကြမ်းဖက်ရာတွင် အသုံးပြုသည့် ဆက်စပ်ပစ္စည်းများကို သိမ်းဆည်းရမိသဖြင့် ဖမ်းဆီးထိန်းသိမ်းခဲ့ကြောင်း သိရသည်။
အလားတူ မွန်းလွဲ ၁ နာရီ ၄၅ မိနစ်အချိန်တွင် ပြည်ကြီးတံခွန်မြို့နယ်၊ ပြည်ကြီးမျက်ရှင် ရပ်ကွက်၊ လမ်း ၆၀၊ ၃၄ လမ်းနှင့် ၃၅ လမ်းကြားရှိ ကျော်စွာလွင်(ခ) ဇာနည် (၃၈)နှစ်၊ (ဘ) ဦးမြင့်မောင် ၏ နေအိမ်၌ သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ၎င်းအား နေအိမ်အတွင်းမှ လက်လုပ်မိုင်း ၅ လုံးနှင့်အတူ ဖမ်းဆီးရမိခဲ့ကြောင်း သိရသည်။
အလားတူ ည ၇ နာရီခွဲအချိန်တွင် ရန်ကုန်တိုင်းဒေသကြီး၊ သာကေတမြို့နယ်၊ (၁၀)တောင်၊ (၁၂)ရပ်ကွက်၊ ရတနာလမ်း၊ တက်လမ်းအိမ်ရာ၊ တိုက်အမှတ် (၆)၊ အခန်း အမှတ် (၄၀၂)အား သတင်းအရ လုံခြုံရေးတပ်ဖွဲ့ဝင်များ ပါဝင်သော ပူးပေါင်းအဖွဲ့က သွားရောက်စစ်ဆေးခဲ့ရာ အဆိုပါအခန်းအတွင်း လူနေထိုင်ခြင်းမရှိဘဲ အခန်းအတွင်းမှ လက်လုပ်ဗုံး မျိုးစုံ ၂၁၂ လုံး၊ Keypad ဖုန်းတွင် တပ်ဆင်ပြီး အစပျိုးစနစ် ၅ စုံ၊ လက်လုပ်ရှော့တိုက်ဒုံး ၇ လုံး၊ Remode ပါ ဒရုန်းရဟတ်ယာဉ် ၁ စုံ၊ အကြမ်းဖက်တိုက်ခိုက်ရာတွင် အသုံးပြုသည့်ဆက်စပ်ပစ္စည်းများအား တွေ့ရှိသိမ်းဆည်းရမိခဲ့ ကြောင်း သိရသည်။
အလားတူ မေလ ၂၇ ရက်နေ့ နံနက် ၄ နာရီ ၂၀ မိနစ်အချိန်တွင် မန္တလေးတိုင်းဒေသကြီး၊ စဉ့်ကူးမြို့နယ်၊ ကျောက်ခတ်ကျေးရွာ၏ မြောက်ဘက် မီတာ ၇၀၀ ခန့်အကွာ တောင်ကုန်းအနီး တစ်ဝိုက်အား သတင်းအရ လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့က သွားရောက်ရှင်းလင်းရာ ကျောက်ခတ်ကျေးရွာနေ မိုးခိုင် (၃၅)နှစ် (ဘ)ဦးမြသိန်းအား လက်လုပ်သေနတ် ၂ လက်၊ တူမီးသေနတ် ၁ လက်၊ အကြမ်းဖက်တိုက်ခိုက်ရာတွင် အသုံးပြုသည့်ဆက်စပ်ပစ္စည်းများနှင့်အတူ ဖမ်းဆီးရမိခဲ့ပြီး အဆိုပါနေရာအား ဆက်လက်ရှင်းလင်းခဲ့ရာ ပတ်လည်အင်းကျေးရွာနေ ဦးလှဝင်း(၅၉)နှစ် (ဘ) ဦးကြည်သောင်းနှင့် တစ်ရွာတည်းနေ ကျော်ကြီး(ခ)ကျော်သူနိုင်(၃၅)နှစ် (ဘ)ဦးထွန်းလွင်တို့အား ထပ်မံဖမ်းဆီးရမိခဲ့ကြောင်း သိရသည်။
အလားတူ မွန်းလွဲ ၁ နာရီခွဲအချိန်တွင် အင်းစိန်မြို့နယ်၊ စဉ့်ငူရပ်ကွက်နေ ဝေယံရှိုင်း(၃၀)နှစ် (ဘ)ဦးစိန်မောင်ပါ ၉ ဦးအား သတင်းအရ လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့က ၎င်းတို့နေအိမ်အသီးသီး၌ သွားရောက်ဖမ်းဆီးခဲ့ရာ ဝေယံရှိုင်း၏နေအိမ်၌ လက်ပစ်ဗုံး ၁ လုံးဖြင့် လည်းကောင်း၊ ထင်အောင်ကျော်၏နေအိမ်၌ အကြမ်းဖက်တိုက်ခိုက်ရာတွင် အသုံးပြုသည့်ဆက်စပ် ပစ္စည်းများ၊ ဆန့်ကျင်ရေး စာရွက်စာတမ်းများနှင့်အတူ တွေ့ရှိဖမ်းဆီးရမိခဲ့ကြောင်း သိရသည်။
အဆိုပါဖြစ်စဉ်များမှ ဖမ်းဆီးရမိသူများအား ဥပဒေနှင့်အညီအရေးယူဆောင်ရွက်သွားမည် ဖြစ်ကြောင်း သတင်းရရှိသည်။