ကသာမြို့၌ စစ်ကိုင်းတိုင်းဒေသကြီး အစိုးရအဖွဲ့ ဝန်ကြီးချုပ်ဖလား ဖူဆယ် ဘောလုံးပြိုင်ပွဲ ဝင်ရောက် ယှဉ်ပြိုင်နိုင်ရေး ကစားသမားများ ရွေးချယ်
စစ်ကိုင်းတိုင်းဒေသကြီး ကသာခရိုင် အားကစားနှင့် ကာယပညာ ဦးစီးဌာနမှ စစ်ကိုင်းတိုင်း ဒေသကြီးအစိုးရအဖွဲ့ ဝန်ကြီးချုပ်ဖလား ဖူဆယ်ဘောလုံးပြိုင်ပွဲတွင် ကသာခရိုင်အနေဖြင့် ဝင်ရောက် ယှဉ်ပြိုင်နိုင်ရေးအတွက် ခရိုင်အသင်း လူရွေးပွဲကို အောက်တိုဘာ ၂၅ ရက် နံနက်ပိုင်းတွင် ကသာမြို့ ဧရာရွှေလီ အားကစားခန်းမ၌ ကျင်းပကြောင်း သိရသည်။
၂ဝ၂၁ ခုနှစ် နိုဝင်ဘာ ၃ ရက်မှ ၆ ရက်အထိ ကျင်းပမည့် စစ်ကိုင်းတိုင်းဒေသကြီး အစိုးရအဖွဲ့ ဝန်ကြီးချုပ်ဖလား ဖူဆယ်ဘောလုံးပြိုင်ပွဲတွင် ကသာခရိုင်အနေဖြင့် ဝင်ရောက်ယှဉ်ပြိုင် သွားမည်ဖြစ်ပြီး ခရိုင်အတွင်းရှိ ကသာ၊ ထီးချိုင့်၊ ဗန်းမောက်နှင့် အင်းတော်မြို့နယ်တို့ရှိ အသက် ၁၆ နှစ်အောက် ဖူဆယ်ကစားသမား များထဲမှ အကောင်းဆုံး ကစားသမားများကို ရွေးချယ်ကာ အဆိုပါပြိုင်ပွဲတွင် ဝင်ရောက်ယှဉ်ပြိုင် သွားမည်ဖြစ်ကြောင်း၊ အကောင်းဆုံး ဖူဆယ်ကစားသမားများ ရွေးချယ်နိုင်ရေးအတွက် ခရိုင်အသင်း လူရွေးပွဲအဖြစ် အဆိုပါ ဖူဆယ်ဘောလုံးပြိုင်ပွဲကို စီစဉ်ကျင်းပခြင်း ဖြစ်ကြောင်း သိရသည်။