ပီအက်စ်ဂျီ အသင်းက အနာဂတ် မရေမရာဖြစ်နေသည့် အမ်ဘတ်ပီ၏နေရာ၌ စပါးအသင်း တိုက်စစ်မှူး ဟယ်ရီကိန်းနှင့် အစားထိုးရန် စီစဉ်နေ
ပီအက်စ်ဂျီအသင်းသည် ယခုဘောလုံးရာသီ အကုန်တွင် အသင်းနှင့် အနာဂတ် မရေမရာဖြစ်နေသည့် တိုက်စစ်မှူး အမ်ဘတ်ပီ၏နေရာ၌ စပါးအသင်း တိုက်စစ်မှူး ဟယ်ရီကိန်းနှင့် အစားထိုးရန် စီစဉ်နေကြောင်း သိရသည်။
အမ်ဘတ်ပီသည် ယခုဘောလုံးရာသီ အကုန်တွင် ပီအက်စ်ဂျီအသင်းနှင့် စာချုပ်သက်တမ်း ကုန်ဆုံးမည်ဖြစ်ပြီး အသင်းက သက်တမ်းတိုး စာချုပ်ချုပ်ဆိုလို သော်လည်း ၎င်းကိုယ်တိုင်က ငြင်းဆိုထားသည့်အတွက် လက်ရှိအချိန်ကတည်းက ပီအက်စ်ဂျီအသင်းက အမ်ဘတ်ပီ၏ နေရာ၌ အစားထိုးရန် ကစားသမား ရှာဖွေနေခြင်းဖြစ်သည်။
ပီအက်စ်ဂျီအသင်းသည် အစောပိုင်းက အမ်ဘတ်ပီ ၏နေရာ၌ လီဗာပူးအသင်းမှ ဆာလက်ချ် သို့မဟုတ် မန်ယူအသင်းမှ စီရော်နယ်ဒိုနှင့်အစားထိုးရန် ပြင်ဆင် နေသော်လည်း ယခုအခါ စပါးအသင်းမှ ဟယ်ရီကိန်းကို ခေါ်ယူရန် စီစဉ်နေခြင်းဖြစ်သည်။
အစောပိုင်းက ဟယ်ရီကိန်းကို မန်စီးတီးအသင်း အပါအဝင် ပရီးမီးယားလိဂ် ထိပ်တန်းအသင်းကြီးများက အပြိုင်ခေါ်ယူလိုသော်လည်း ယခုဘောလုံးရာသီ တွင် ဟယ်ရီကိန်းအနေဖြင့် ပုံမှန်ခြေစွမ်းအောက် ရောက်ရှိနေသည့်အတွက် မန်စီးတီးအသင်းက ခေါ်ယူရန် လက်လျှော့ခဲ့ခြင်းဖြစ်သည်။ ဟယ်ရီကိန်းကိုယ်တိုင် ကလည်း ယခုဘောလုံးရာသီ အကုန်တွင် စပါးအသင်း ချန်ပီယံလိဂ်ဝင်ခွင့် မရရှိပါက အသင်းမှ သေချာပေါက် ထွက်ခွာဖွယ်ရှိကြောင်း သိရသည်။