အက်စ်တွန်ဗီလာအသင်းနည်းပြ စတီဗင်ဂျရတ်က အက်သလက်တီကိုအသင်းတိုက်စစ်မှူး ဆွာရက်ဇ်ကို အလွတ်ပြောင်းရွှေ့ကြေးဖြင့် ခေါ်ယူရန် ပြင်ဆင်နေ

အက်စ်တွန်ဗီလာအသင်းနည်းပြ စတီဗင်ဂျရတ်က လာမည့်နွေရာသီကစားသမား အပြောင်းအရွှေ့ကာလတွင် အက်သလက်တီကိုအသင်း တိုက်စစ်မှူးဆွာရက်ဇ်ကို အလွတ်ပြောင်းရွှေ့ကြေးဖြင့်ခေါ်ယူရန် ပြင်ဆင်နေကြောင်း သိရသည်။

အသက် ၃၅ နှစ်အရွယ် ဆွာရက်ဇ်သည် ၂၀၁၁ခုနှစ်မှ ၂၀၁၄ ခုနှစ်အထိ လီဗာပူးအသင်းတွင် ကစားခဲ့စဉ်က   စတီဗင်ဂျရတ်နှင့် တွဲဖက်ကစားခဲ့ဖူးကြသူများ ဖြစ်သည်။

ဆွာရက်ဇ်သည် လီဗာပူးအသင်းတွင် လေးနှစ်ကြာ ကစားပြီးနောက် ၂၀၁၄ ခုနှစ်က လီဗာပူးအသင်းမှ ဘာစီလိုနာအသင်းသို့  ပြောင်းရွှေ့ကစားပြီး  ဘာစီလိုနာအသင်းတွင် ၂၀၂၀ ပြည့်နှစ်အထိ ကစားခဲ့ကာ ၂၀၂၀ ပြည့်နှစ် နွေရာသီကစားသမား အပြောင်းအရွှေ့ကာလက   အသင်းနှင့်စာချုပ်ဖျက်သိမ်းခဲ့ပြီး  အက်သလက်တီကို အသင်းသို့  ပြောင်းရွှေ့ကစားခဲ့သူဖြစ်သည်။

ဆွာရက်ဇ်သည် ပြီးခဲ့သည့် ဘောလုံးရာသီက အက်သလက်တီကိုအသင်းနှင့်  အကောင်းဆုံးခြေစွမ်းပြနိုင်ခဲ့ပြီး အသင်းကို စပိန်လာလီဂါဖလားရရှိအောင် အဓိကစွမ်းဆောင်ပေးနိုင်ခဲ့သော်လည်း ယခုဘောလုံး ရာသီတွင်   ခြေစွမ်းပြနိုင်ရန်   ရုန်းကန်နေရသည်။ ဆွာရက်ဇ်သည်  ယခုဘောလုံးရာသီအကုန်တွင် စာချုပ်သက်တမ်း ကုန်ဆုံးမည် ဖြစ်ကာ အလွတ်ပြောင်းရွှေ့ကြေးဖြင့် အသင်းမှ ထွက်ခွာမည်ဖြစ်ကြောင်း သိရသည်။                       

Ref;The Express