နေပြည်တော်၊ အောက်တိုဘာ - ၄
COVID-19 ရောဂါ ကာကွယ်ထိန်းချုပ်ကုသရေးလုပ်ငန်းများ ဆောင်ရွက်သည့် ကာလအတွင်း သွားလာမှုကန့်သတ်ချက်များကြောင့် ဘုန်းတော်ကြီးကျောင်းများနှင့် သာသနာ နွယ်ဝင်သီလရှင်ကျောင်းများ၌ ဆွမ်း၊ ကွမ်းအဆင်ပြေစေရေးအတွက် ၂၀၂၀ ပြည့်နှစ်၊ ဧပြီလဆန်းမှစတင်၍ တိုင်းစစ်ဌာနချုပ်များအလိုက် မြို့နယ်အသီးသီးရှိ ဘုန်းတော်ကြီး ကျောင်းများ၊ သာသနာ့နွယ်ဝင် သီလရှင်ကျောင်းများသို့ တပ်မတော်(ကြည်း၊ရေ၊လေ)အရာရှိ၊ စစ်သည်၊ အရာထမ်း၊ အမှုထမ်းများက လှူဒါန်းသည့် ဆွမ်းဆန်တော်၊ ဆီ၊ ဆား၊ ပဲ အမယ်(၄)မျိုးနှင့် စားသောက်ဖွယ်ရာများ၊ လှူဖွယ်ပစ္စည်းများကို ပေးအပ်လှူဒါန်းလျက်ရှိသည်။
ထိုသို့ လှူဒါန်းလျက်ရှိရာ ယနေ့တွင် မြို့နယ်စုစုပေါင်း ၁၄ မြို့နယ်အတွင်းရှိ ဘုန်းတော်ကြီးကျောင်းများနှင့် သာသနာ့နွယ်ဝင် သီလရှင်ကျောင်း ၁၉ ကျောင်းများသို့ သက်ဆိုင်ရာ တိုင်းစစ်ဌာနချုပ်များအလိုက် တိုင်းမှူးများနှင့် တာဝန်ရှိသူများက သွားရောက်၍ ဆွမ်းဆန်တော်၊ ဆီ၊ ဆား၊ ပဲ အမယ်(၄)မျိုးနှင့် လှူဖွယ်ပစ္စည်းများကို ဆက်ကပ်လှူဒါန်းကြသည်။ ထိုသို့ တပ်မတော်က လှူဒါန်းခဲ့မှုများအပေါ် ရှမ်းပြည်နယ်(အရှေ့ပိုင်း)၊ မိုင်းဆတ်မြို့၊ အောင်မင်္ဂလာတပ်ဦးဘုန်းတော်ကြီးကျောင်းတိုက်ဆရာတော် ဘဒ္ဒန္တသီလဝံသနှင့် ပဲခူးတိုင်းဒေသကြီး၊ တောင်ငူမြို့၊ မြစည်းခုံပရိယတ္တိစာသင်တိုက်ပဓာနဆရာတော် အဂ္ဂမဟာဂန္တဝါစကပဏ္ဍိတ ဘဒ္ဒန္တ ဝိမလသာရ တို့မှ ယခုလို မုဒိတာစကားများ ပြန်လည် မိန့်ကြားခဲ့ပါတယ်-
“ယခုလိုလှူဒါန်းရသော အကျိုးကျေးဇူးကြောင့် တပ်မတော်ကာကွယ်ရေးဦးစီးချုပ်နှင့်တကွ တပ်မတော်(ကြည်း၊ ရေ၊ လေ) မိသားစုများ၊ မိုင်းဆတ်မြို့မှ တပ်မမှူးနှင့်တကွ တပ်ရင်း/ တပ်ဖွဲ့ မိသားစုတို့သည် ဘေးဆိုး၊ ရန်ဆိုး၊ အန္တရာယ်ဆိုး၊ ရောဂါဆိုးတို့မှ ကင်းဝေးကြပြီးလျှင် စိတ်၏ ချမ်းသာခြင်း၊ ကိုယ်၏ချမ်းသာခြင်းနှင့် ပြည့်စုံကြပြီးလျှင် အိုခြင်းကင်းရာ၊ နာခြင်းကင်းရာ၊ သေခြင်း ကင်းရာဖြစ်သော နိဗ္ဗာန်ချမ်းသာသို့ ရောက်နိုင်သော အကြောင်း အထောက်အပံ့များ ဖြစ်ကြပါစေ ကြောင်း ဘုန်းကြီးအနေနဲ့ မေတ္တာပို့ဆုတောင်းပေးပါတယ်” ဟု မိုင်းဆတ်မြို့ အောင်မင်္ဂလာ တပ်ဦး ဘုန်းတော်ကြီး ကျောင်းတိုက်ဆရာတော် ဘဒ္ဒန္တသီလဝံသက မိန့်ကြားသည်။
“ဒီနေ့ဒီချိန်ဒီကာလက တစ်နိုင်ငံလုံး၊ တစ်ကမ္ဘာလုံး ကိုဗစ်ကာလကြီးနှင့် ကြုံကြိုက်နေကြတယ်။ ကိုဗစ်ကာလနဲ့ ကြုံကြိုက်နေတော့ အားလုံးဟာ အခက်အခဲ အကျပ်အတည်း မျိုးစုံနဲ့ကြုံနေကြ ရတာ။ အဲသလိုခံစားနေရတဲ့အထဲမှာ ဘုန်းကြီးတို့ရဲ့ စာသင်တိုက်တွေ၊ သာသနာတော်မှာရှိတဲ့ ရဟန်း၊ သံဃာတွေလည်းပဲ ရှောင်လို့ဘယ်ရမလဲ၊ အကုန်လုံး ဒီဒဏ်ခံကြရတာပဲ။ ကျန်းမာဖို့ တချို့ ကျောင်းတိုက်တွေပိတ်လိုက်ပြီးတော့ ပြန်လွှတ်လိုက်ရတယ်။ အခုတပ်မတော် (ကြည်း၊ ရေ၊ လေ) မိသားစုများက လိုအပ်တဲ့အချိန်မှာ လိုအပ်တဲ့ အရေးကြီးတဲ့ပစ္စည်းတွေဖြစ်တဲ့ ဆွမ်းဆန်တော်၊ ဆီ အစရှိတဲ့အမာခံ ပစ္စည်းတွေလှူဒါန်းလိုက်တာဟာ သာသနာ ပြုလိုက်တာပဲ။ သာသနာတော်ရဲ့ အသက်ကို ဆက်လက်ပြီးတော့ ရပ်တည်နိုင်အောင် ရှင်သန်နိုင်အောင် အသက်ကိုဆက်ပေးလိုက် တဲ့ကုသိုလ်ပဲ” ဟု တောင်ငူမြို့ မြစည်းခုံ ပရိယတ္တိစာသင်တိုက် ပဓာနနာယကဆရာတော် အဂ္ဂ မဟာဂန္ထဝါစကပဏ္ဍိတ ဘဒ္ဒန္တဝိမလသာရ က မိန့်ကြားသည်။
ထို့အပြင် COVID-19 ရောဂါကူးစက်ပြန့်ပွားမှု မရှိစေရေးအထောက်အကူဖြစ် စေရန်အတွက် ယနေ့တွင် ရှမ်းပြည်နယ်(မြောက်ပိုင်း)၊ လားရှိုးမြို့၊ ရှမ်းပြည်နယ်(တောင်ပိုင်း) အတွင်းရှိ မြို့နယ်ပေါင်း ၁၂ မြို့နယ်၊ ပအိုဝ်းကိုယ်ပိုင်အုပ်ချုပ်ခွင့်ရဒေသ ဟိုပုံးမြို့၊ ကယားပြည်နယ်အတွင်းရှိ မြို့နယ်ပေါင်း ၄ မြို့နယ်၊ ရှမ်းပြည်နယ်(အရှေ့ပိုင်း)၊ မိုင်းဆတ်မြို့၊ တနင်္သာရီတိုင်းဒေသကြီး၊ ပုလောမြို့နယ်၊ ရန်ကုန်တိုင်းဒေသကြီး၊ တိုက်ကြီးမြို့နယ်နှင့် လှည်းကူးမြို့နယ်၊ ပဲခူးတိုင်းဒေသကြီးအတွင်းရှိ မြို့နယ်ပေါင်း ၄ မြို့နယ်တို့၌ တပ်မတော်မှ ဆေးအဖွဲ့များက ကျန်းမာရေးစစ်ဆေးပေးခြင်းများအပါအဝင် ကြိုတင်ကာကွယ်ရေးလုပ်ငန်းများ ဆောင်ရွက် ပေးခြင်း၊ ကာကွယ်ရေးအထောက်အကူပြုဆေးပစ္စည်းများ ဖြန့်ဝေပေးခြင်းကို ဆောင်ရွက် ပေးခဲ့ကြကြောင်း သတင်းရရှိသည်။