နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် အမျိုးသားညီလာခံ ပြည်ထောင်စုခန်းမ အဆောက်အဦနှင့် ဆက်စပ်အဆောက်အဦများ ထိန်းသိမ်းဆောင်ရွက်နိုင်မည့် အခြေအနေအား သွားရောက်ကြည့်ရှုစစ်ဆေး

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် အမျိုးသားညီလာခံ ပြည်ထောင်စုခန်းမ အဆောက်အဦနှင့် ဆက်စပ်အဆောက်အဦများ ထိန်းသိမ်းဆောင်ရွက်နိုင်မည့် အခြေအနေအား သွားရောက်ကြည့်ရှုစစ်ဆေး

နေပြည်တော်၊ ဇွန် - ၈

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ယနေ့နံနက်ပိုင်းတွင် ကောင်စီဝင် ဗိုလ်ချုပ်ကြီး တင်အောင်စန်း၊ ကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ ဆောက်လုပ်ရေး ဝန်ကြီး ဌာန ပြည်ထောင်စုဝန်ကြီး ဦးရွှေလေး၊ ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်း၊ ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ၊ ရန်ကုန်တိုင်းစစ်ဌာနချုပ် တိုင်းမှူး ဗိုလ်ချုပ် ညွန့်ဝင်းဆွေ၊ မြို့တော်ဝန် ဦးဘိုဌေး၊ ဒုတိယဝန်ကြီးများနှင့် တာဝန် ရှိသူများ လိုက်ပါ၍ ရန်ကုန်တိုင်းဒေသကြီး၊ လှည်းကူးမြို့နယ်၊ ညောင်နှစ်ပင် ကျေးရွာ အနီးရှိ ဖွဲ့စည်းပုံအခြေခံဥပဒေ(၂၀၀၈ ခုနှစ်) ရေးဆွဲရန် အမျိုးသားညီလာခံကျင်းပ ပြုလုပ်ခဲ့သည့် ပြည်ထောင်စုခန်းမကြီးသို့ သွားရောက်ကြည့်ရှုစစ်ဆေးသည်။

ဦးစွာ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ်သည် ညီလာခံကျင်းပခဲ့သည့် ပြည်ထောင်စုခန်းမကြီးသို့ ရောက်ရှိရာ ဆောက်လုပ်ရေးဝန်ကြီး ဌာန ပြည်ထောင်စုဝန်ကြီး ဦးရွှေလေးက အမျိုးသားညီလာခံကျင်းပပြုလုပ်ခဲ့သည့် အဆောက်အဦ၏ သမိုင်းကြောင်း၊ အဆောက်အဦများ ပျက်စီးယိုယွင်းနေမှုများနှင့် ပြုပြင်ထိန်းသိမ်ရန်အတွက် ဆောင်ရွက်နေမှုအခြေအနေများကို ရှင်းလင်းတင်ပြသည်။

ရှင်းလင်းတင်ပြမှုများအပေါ်နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်က အမျိုးသားညီလာခံကျင်းပခဲ့သည့် အဆောက်အဦများသည် နိုင်ငံတော် အတွက်အရေးကြီးသည့် ဖွဲ့စည်းပုံအခြေခံဥပဒေ(၂၀၀၈ ခုနှစ်) ရေးဆွဲဖော်ဆောင်ခဲ့သည့် သမိုင်းဝင်အဆောက်အဦများ ဖြစ်ကြောင်း၊ ယခင်ခေတ်အဆက်ဆက်က သမိုင်းဝင် အဆောက်အဦများကို တတ်နိုင်သမျှ ထိန်းသိမ်းထားခဲ့ကြောင်း၊ ယခုထိန်းသိမ်းမှုများ အားနည်းခဲ့သည့်အတွက် ပျက်စီးယိုယွင်းမှုများ ဖြစ်ပေါ်ခဲ့သည်ကိုတွေ့ရှိရကြောင်း၊ အဆောက်အဦများ ရေရှည်တည်တံ့စေရေးအတွက် အလေးထားထိန်းသိမ်းဆောင်ရွက်ရန် လိုကြောင်း၊ ရှိပြီးသား အဆောက်အဦများကို ပြန်လည်ပြုပြင်ထားရှိရန်လိုကြောင်း၊ အဝင်အထွက်လမ်းများ စနစ်တကျရှိစေရေးအတွက်လည်း ဆောင်ရွက်ရန်လိုကြောင်း ဖြင့်မှာ ကြားသည်။

ယင်းနောက် နိုင်ငံတော်စီမံအုပ်ချု်ပရေးကောင်စီဥက္ကဋ္ဌ နိုင်ငံတော်ဝန်ကြီးချုပ် နှင့် အဖွဲ့ဝင်များသည် ပြည်ထောင်စုခန်းမကြီးနှင့် အနော်ရထာရိပ်သာတို့အတွင်း လှည့်လည် ကြည့်ရှုစစ်ဆေးပြီး တာဝန်ရှိသူများ၏ တင်ပြချက်များအပေါ် လိုအပ်သည်များ လမ်းညွှန် မှာကြားခဲ့သည်။

အဆိုပါ အမျိုးသားညီလာခံကျင်းပခဲ့သည့် ပြည်ထောင်စုခန်းမအဆောက်အဦးတွင် ဖွဲ့စည်းပုံအခြေခံဥပဒေ (၂၀၀၈ ခုနှစ်) အတည်ပြုပြဋ္ဌာန်းနိုင်ရေးအတွက် ၂၀၀၄ ခုနှစ်မှ ၂၀၀၇ အထိ အစုအဖွဲ့ ၈ ဖွဲ့မှ ကိုယ်စားလယ် ၇၀၂ ဦးဖြင့် အမျိုးသားညီလာခံ ၇ ကြိမ် ကျင်းပခဲ့ကြောင်း၊ ဖွဲ့စည်းပုံအခြေခံဥပဒေ (၂၀၀၈ ခုနှစ်)အတည်ပြုပြဋ္ဌာန်းပြီးချိန်တွင် အဆိုပါညီလာခံခန်းမကြီးကို အသုံးပြုခြင်း မရှိတော့ကြောင်း၊ အမျိုးသားညီလာခံ ကျင်းပ ပြုလုပ်ရာမြေနေရာသည် ဧရိယာအားဖြင့် ၅၈၅ ဒသမ ၈၁ ဧကကျယ်ဝန်းပြီး ဧက ၂၀၀ ကိုစိုက်ပျိုးရေးဇုန်အဖြစ် လည်းကောင်း၊ ဧက ၁၀၀ ခန့်ကို မွေးမြူရေးဇုန်အဖြစ် လည်းကောင်း အသုံးပြုထားကြောင်း၊ ပြုပြင်ထိန်းသိမ်းမှုများ အားနည်းခဲ့သဖြင့် ယခုကဲ့သို့ ပျက်ဆီးမှုများ ဖြစ်ပေါ်ခဲ့ခြင်းဖြစ်ကြောင်း သိရှိရပြီး ယခုအခါ ပြန်လည်ပြုပြင် ထိန်းသိမ်းခြင်းများ ဆောင်ရွက်သွားမည်ဖြစ်ကြောင်းသိရှိရ သည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် နှင့် အဖွဲ့ဝင်များသည် ညောင်နှစ်ပင် စိုက်ပျိုးမွေးမြူရေးအထူးဇုန်သို့ရောက်ရှိရာ အစည်း အဝေးခန်းမတွင် ရန်ကုန်တိုင်းဒေသကြီးဝန်ကြီးချုပ် ဦးစိုးသိန်းနှင့် စိုက်ပျိုးရေး၊မွေးမြူရေး နှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာ အောင်ကြီးတို့က စိုက်ပျိုးမွေးမြူ ရေးဇုန်အတွင်း စိုက်ပျိုးရေးနှင့် မွေးမြူရေးလုပ်ငန်းများကို အပိုင်းလိုက်ခွဲခြားဆောင်ရွက် ထားရှိမှု၊ လမ်းများဇုန်အလိုက် ဖောက်လုပ်နေမှု၊ ဇုန်အလိုက်စိုက်ပျိုးရေးနှင့် မွေးမြူရေး လုပ်ငန်းများဆောင်ရွက်၍ အသီးအနှံများ၊ အသား၊ နွားနို့နှင့် ဥများ ထုတ်လုပ်၍ ရောင်းချ ပေးနိုင်မှု၊ ဒေသခံပြည်သူများအလုပ်အကိုင်ရရှိရေး ဖော်ဆောင်ပေးနိုင်မှုအခြေအနေများ နှင့် စိုက်ပျိုးမွေးမြူရေးဇုန်ကို ဆက်လက်အကောင်အထည်ဖော်ဆောင်ရွက်မည့် အခြေ အနေများကိုရှင်းလင်းတင်ပြသည်။

ရှင်းလင်းတင်ပြမှုများအပေါ် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်က ရန်ကုန်မြို့ မိုင် ၃၀ ပတ်ဝန်းကျင် စိမ်းလန်းသာယာရေး၊ ရန်ကုန်မြို့တော် နေပြည်သူများ စားသောက်မှုအဆင်ပြေစေရေးအတွက် ယခင်တပ်မတော်အစိုးရ အဆက် ဆက် တာဝန်ယူဆောင်ရွက်စဉ်ကတည်းက စိုက်ပျိုးမွေးမြူရေးလုပ်ငန်းများကို ဇုန်များ အလိုက် အကောင်အထည်ဖော် ဆောင်ရွက်ပေးခဲ့ခြင်းဖြစ်ကြောင်း၊ ညောင်နှစ်ပင်စိုက်ပျိုး မွေးမြူရေးအထူးဇုန် အနေဖြင့် သီးနှံပင်များကိုစိုက်ပျိုးလျက်ရှိပြီး စားရေးအတွက် အထောက်အကူပြုသည့် နှစ်ရှည်ပင်များဖြစ်သည့် သရက်၊ ပိန္နဲ၊ မာလကာ၊ ရှောက် စသည့် အပင်များစိုက်ပျိုးရန်လိုသကဲ့သို့ ဟင်းသီးဟင်းရွက်သီးနှံပင်များကိုလည်း အောင်မြင် အောင် စိုက်ပျိုးရန်လိုကြောင်း၊ စိုက်ဧကများအားလုံး ပြည့်ဝစွာစိုက်ပျိုး၍မြေကို အကျိုး ရှိစွာ အသုံးချရန်လိုကြောင်း၊ စိုက်နည်းစနစ်များ မှန်ကန်ရန်နှင့် ရေများကိုလည်း အကျိုး ရှိရှိအသုံးချရန်လိုကြောင်း၊ အထွက်နှုန်းများကောင်းမွန်အောင် ဆောင်ရွက်ရန်လိုကြောင်း၊ မွေးမြူရေးလုပ်ငန်းများ ဆောင်ရွက်ရာတွင်လည်း စနစ်တကျဖြင့်မွေးမြူရန်လိုကြောင်း၊ မွေးမြူရေးလုပ်ငန်းများ အောင်မြင်ဖြစ်ထွန်းစေရေးအတွက် တိရစ္ဆာန်များကို သတ်မှတ် ထားသည့်အစာများကို စနစ်တကျကျွေးမွေးရန်နှင့် တိရစ္ဆာန်မွေးမြူရေး လု်ပငန်းများမှ ထွက်ရှိလာသည့် စွန့်ပစ်ပစ္စည်းများကို စိုက်ပျိုးရေးလုပ်ငန်းများအတွက် လိုအပ်သည့် ဇီဝမြေဩဇာအဖြစ် အသုံးပြုနိုင်ရန်လိုကြောင်း၊ စိုက်ပျိုးရေးလုပ်ငန်းများနှင့် မွေးမြူရေး လုပ်ငန်းများသည် အပြန်အလှန် မှီခိုလျက်ရှိကြောင်း၊ ခေတ်မီသည့်စိုက်ပျိုး မွေးမြူရေး စနစ်ကို ဆောင်ရွက်နိုင်ရန်လိုကြောင်း၊ စိုက်ပျိုးမွေးမြူရေးပညာရပ်များ တတ်ကျွမ်းစေ ရေးအတွက် သက်ဆိုင်ရာ ကျောင်းများ၊ တက္ကသိုလ်၊ ကောလိပ်များမှ စနစ်တကျ သင်ကြားပေးရန်လိုကြောင်း၊ ပုဂ္ဂလိကလုပ်ငန်းများအနေဖြင့် စိုက်ပျိုးမွေးမြူ ရေးဆောင် ရွက်ရန်အတွက် ခွင့်ပြုပေးထားသည့် မြေများကို ပြည့်ဝစွာစိုက်ပျိုးမွေးမြူရန်နှင့် စိုက်ပျိုး မွေးမြူရေးနှင့် မသက်ဆိုင်သည့် မြေအသုံးချမှုများမရှိစေရေး တာဝန်ရှိသူများ က စနစ်တကျ ကြပ်မတ်ဆောင်ရွက်ရန်လိုကြောင်း၊ ရန်ကုန်မြို့တော်ရှိပြည်သူများ စားသောက်ရန်အတွက် အသားနှင့်ငါးများ နေ့စဉ်လိုအပ်ချက်ရှိကြောင်း၊  ငါးမွေးမြူရေး နှင့် ပတ်သက်၍ ချောင်းများ၊ မြောင်းများ၊ ပင်လယ်များမှရရှိသည့် ငါးသယံဇာတများကို ဖမ်းယူစားသုံးမှု များပြားလာခြင်းကြောင့် သဘာဝမှရရှိသည့် ငါးသယံဇာတများ နည်းပါး လာကြောင်း၊ ထို့ကြောင့် ငါးမွေးမြူရေးလုပ်ငန်းများကို စနစ်တကျမှန်မှန်ကန်ကန် ဖြစ်ထွန်းအောင် မွေးမြူခြင်းဖြင့် ရန်ကုန်မြို့တော်အတွက်လိုအပ်သည့် ငါးများပြည့်ဝစွာ ရရှိရေးဆောင်ရွက်ရမည်ဖြစ်ကြောင်း၊ ငါးသည် လူများစားသုံးသည့်အသားများထဲတွင် ဈေးနှုန်းအသက်သာဆုံး ဖြစ် သည့်အတွက် ရေရှည်တွင်ငါးသယံဇာတပစ္စည်းများ ပြည့်ဝစွာထုတ်လုပ်နိုင်ရေး တာဝန်ရှိသူများအနေဖြင့် ကြိုးပမ်းဆောင်ရွက်ကြရန် လို ကြောင်း၊ ပြည်သူများဈေးနှုန်း သက်သာစွာဖြင့် ဝယ်ယူစားသုံးနိုင်ရေးအတွက် စိုက်ပျိုးမွေးမြူရေးလုပ်ငန်းများကို အောင်မြင်အောင် ဆောင်ရွက်၍ အသား၊ ငါးနှင့် ဟင်သီးဟင်းရွက်များကို အပြည့်အဝ ထုတ်လုပ်နိုင်ရန်လိုကြောင်း၊ အလားတူ ပြည်သူများ နွားနို့ကိုပြည့်ဝစွာသောက်သုံးနိုင်ရေးနှင့် ပြည်တွင်းနို့လိုအပ်ချက်ကို ဖြည့်ဆည်းပေး နိုင်ရေးအတွက် နို့စားနွားမွေးမြူခြင်း လုပ်ငန်းများကို စနစ်တကျဖြင့်အောင်မြင် ဖြစ်ထွန်း အောင် ဆောင်ရွက်ကြရန်လိုကြောင်းဖြင့် မှာကြားသည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည် ရန်ကုန်တိုင်းဒေသကြီး၊ စိုက်ပျိုးရေးဦးစီးဌာန၊ မွေးမြူရေးနှင့် ကုသရေးဦးစီးဌာန၊ ငါး လုပ်ငန်းဦးစီးဌာန တို့မှ တိုင်းဦးစီးမှူးများ၏ စိုက်ပျိုးရေးနှင့် မွေးမြူရေးလုပ်ငန်း ဆောင်ရွက် နေမှုနှင့် ဆက်လက်ဆောင်ရွက်သွားမည့် အခြေအနေများနှင့် ပတ်သက်၍ တင်ပြချက် များအပေါ် သိရှိလိုသည်များမေးမြန်း၍ တစ်နိုင်ငံလုံး အတိုင်းအတာဖြင့် စိုက်ပျိုး မွေးမြူ ရေး ကဏ္ဍ ဖွံ့ဖြိုးတိုးတက်ရေးအတွက် ဆက်လက်ဆောင်ရွက်နိုင်မည့် အခြေအနေများနှင့် ပတ်သက်၍ အပြန်အလှန်ဆွေးနွေးပြောကြားသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်  အဖွဲ့ဝင်များသည် စိုက်ပျိုးမွေးမြူရေးဇုန်အတွင်း လှည့်လည်၍ စိုက်ပျိုးရေးဦးစီးဌာနနှင့် စိမ်းလန်း သမဝါယမအဖွဲ့တို့ ပူးပေါင်းဆောင်ရွက်သည့် ဓာတုကင်းလွတ် ဟင်းသီး ဟင်းရွက်စိုက်ခင်းနှင့် CJ Feed Myanmar ကြက်မွေးမြူရေးလုပ်ငန်း တို့၏ လုပ်ငန်း ဆောင်ရွက်နေမှုအခြေအနေများကို လိုက်လံကြည့်ရှုစစ်ဆေးရာ လုပ်ငန်းအလိုက်တာဝန် ရှိသူများက ရှင်းလင်းတင်ပြခဲ့ကြောင်းနှင့် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က သိရှိလိုသည်များအား ပြန်လည်မေးမြန်းဆွေးနွေးခဲ့ကြောင်း သတင်းရရှိသည်။