နေပြည်တော်၊ အောက်တိုဘာ - ၈
Covid-19 ရောဂါ ကာကွယ်ထိန်းချုပ်ကုသရေးလုပ်ငန်းများ ဆောင်ရွက်သည့် ကာလအတွင်း သွားလာမှုကန့်သတ်ချက်များကြောင့် ဘုန်းတော်ကြီး ကျောင်းများနှင့် သာသနာ နွယ်ဝင်သီလရှင်ကျောင်းများ၌ ဆွမ်း၊ ကွမ်းအဆင်ပြေစေရေးအတွက် ၂၀၂၀ ပြည့်နှစ်၊ ဧပြီလဆန်းမှ စတင်၍ တိုင်းစစ်ဌာနချုပ်များအလိုက် မြို့နယ်အသီးသီးရှိ ဘုန်းတော်ကြီး ကျောင်းများ၊ သာသနာ့နွယ်ဝင် သီလရှင်ကျောင်းများသို့ တပ်မတော်(ကြည်း၊ရေ၊လေ)အရာရှိ၊ စစ်သည်၊ အရာထမ်း၊ အမှုထမ်းများက လှူဒါန်းသည့် ဆွမ်းဆန်တော်၊ ဆီ၊ ဆား၊ ပဲ အမယ်(၄)မျိုးနှင့် စားသောက်ဖွယ်ရာများ၊ လှူဖွယ်ပစ္စည်းများကို ပေးအပ်လှူဒါန်းလျက်ရှိသည်။
ထိုသို့ လှူဒါန်းလျက်ရှိရာ ယနေ့တွင် မြို့နယ်စုစုပေါင်း ၂၈ မြို့နယ်အတွင်းရှိ ဘုန်းတော်ကြီးကျောင်းများ၊ သာသနာ့နွယ်ဝင်သီလရှင်စာသင်တိုက်နှင့် အခြားဘာသာရေး ကျောင်း ၄၄ ကျောင်းသို့ သက်ဆိုင်ရာ တိုင်းစစ်ဌာနချုပ်များအလိုက် တိုင်းမှူးများနှင့် တာဝန်ရှိသူများက သွားရောက်၍ ဆွမ်းဆန်တော်၊ ဆီ၊ ဆား၊ ပဲ အမယ်(၄)မျိုးနှင့် လှူဖွယ်ပစ္စည်းများ ကို ဆက်ကပ်လှူဒါန်းကြသည်။
ထို့အပြင် Covid-19 ရောဂါကူးစက်ပြန့်ပွားမှု မရှိစေရေးအထောက်အကူဖြစ် စေရန်အတွက် ယနေ့တွင် ရှမ်းပြည်နယ် (တောင်ပိုင်း)၊ တောင်ကြီးမြို့၊ စဝ်စံထွန်းရပ်ကွက်ရှိ ရှမ်းပိဋကတ်ကျောင်းနှင့် ကံကြီးရပ်ကွက်၊ ပဒုမ္မာစာရီပအိုဝ်းသီလရှင်ကျောင်း၊ ရှမ်းပြည်နယ် (တောင်ပိုင်း)၊ လင်းခေးမြို့၊ မဟာဝိဟာရကျောင်းကြီးကျောင်းတိုက်၊ တနင်္သာရီတိုင်းဒေသကြီး၊ ကျွန်းစုမြို့၊ ထိန်ကျောင်းကျေးရွာဘုန်းတော်ကြီးကျောင်းတိုက်နှင့် ကပကျေးရွာ၊ ခရစ်ယာန် ဘာသာရေးကျောင်းများ၊ မန္တလေးတိုင်းဒေသကြီး၊ ပြည်ကြီးတံခွန် မြို့နယ်ရှိ မစိုးရိမ်တိုက်သစ်တို့၌ တပ်မတော်မှ ဆေးအဖွဲ့များက ကျန်းမာရေးစစ်ဆေး ပေးခြင်းများ အပါအဝင် ကြိုတင် ကာကွယ်ရေးလုပ်ငန်းများ ဆောင်ရွက်ပေးခြင်း၊ ကာကွယ်ရေး အထောက် အကူပြုဆေး ပစ္စည်း များ ဖြန့်ဝေပေးခြင်းကို ဆောင်ရွက်ပေးခဲ့ကြရာ တိုင်းမှူးများနှင့် တာဝန်ရှိသူများက လိုက်လံကြည့်ရှု၍ လိုအပ်သည်များ ညှိနှိုင်းဆောင်ရွက် ပေးခဲ့ကြောင်း သတင်းရရှိသည်။