ဂျူဗင်တပ်စ်အသင်းနှင့် ကွင်းလယ်ကစားသမား အာရွန်ရမ်ဆေးတို့ နှစ်ဖက်သဘောတူ စာချုပ်ဖျက်သိမ်းပြီး ဖြစ်ကြောင်း အတည်ပြုကြေညာ
ဂျူဗင်တပ်စ်အသင်းနှင့် ကွင်းလယ် ကစားသမား အာရွန်ရမ်ဆေးတို့ နှစ်ဖက်သဘောတူ စာချုပ်ဖျက်သိမ်းပြီးဖြစ်သည်ဟု အတည်ပြု ကြေညာခဲ့ကြောင်း သိရသည်။
ကာဒစ်ဖ်အသင်းနှင့် ပရော်ဖက်ရှင်နယ် ကစားသမားဘဝကို စတင်ခဲ့သည့် အာရွန်ရမ်ဆေးသည် အာဆင်နယ်အသင်း၌ ၂၀၁၁ ခုနှစ်မှ ၂၀၁၉ ခုနှစ်အထိ ကစားခဲ့ပြီး အသင်းနှင့်အတူ ကမ္ဘာ့ထိပ်တန်း အဆင့်ရှိ ခြေစွမ်းပြနိုင်ခဲ့ကာ ၂၀၁၉ ခုနှစ်က အာဆင်နယ်အသင်းနှင့် စာချုပ်သက်တမ်း ကုန်ဆုံးခဲ့ပြီးနောက် စာချုပ်သစ်ချုပ်ဆိုမှု မပြုလုပ်တော့ဘဲ အလွတ်ပြောင်းရွှေ့ကြေးဖြင့် ဂျူဗင်တပ်စ် အသင်းသို့ ပြောင်းရွှေ့ကစားခဲ့ခြင်း ဖြစ်သည်။
အာရွန်ရမ်ဆေးသည် ဂျူဗင်တပ်စ်အသင်းနှင့် စာချုပ်သက်တမ်း တစ်နှစ် ကျန်ရှိနေသေးသော်လည်း အာရွန်ရမ်ဆေး၏ ခြေစွမ်းပိုင်းကို နည်းပြ အယ်ဂလီနီက ကြိုက်နှစ်သက်ခြင်း မရှိသည့်အတွက် အစောပိုင်းက ရောင်းချရန် ပြင်ဆင်နေခြင်းဖြစ်သည်။
ဂျူဗင်တပ်စ်အသင်းက အာရွန်ရမ်ဆေးကို ရောင်းချရန် ပြင်ဆင်ခဲ့သော်လည်း ၎င်း၏ မြင့်မားသည့် လုပ်ခလစာကြောင့် ခေါ်ယူလိုသော အသင်းမရှိသည့်အတွက် နှစ်ဖက်သဘောတူ စာချုပ်ဖျက်သိမ်းခဲ့၍ ကလပ်အသင်း လက်မဲ့ဖြစ်နေရာမှ လက်ရှိတွင် နော်တင်ဟမ်အသင်းက ခေါ်ယူရန် ဆွေးနွေးမှုများ ပြုလုပ်နေကြောင်း သိရသည်။