ပရီးမီးယားလိဂ်ပြိုင်ပွဲ သမိုင်းတစ်လျှောက် သွင်းဂိုးအများဆုံး ကစားသမားဖြစ်ရန် ကြိုးစားမည်ဖြစ်ကြောင်း စပါးအသင်း တိုက်စစ်မှူး ဟယ်ရီကိန်းပြော
စပါးအသင်း တိုက်စစ်မှူး ဟယ်ရီကိန်းက ပရီးမီးယားလိဂ်ပြိုင်ပွဲ သမိုင်းတစ်လျှောက် သွင်းဂိုးအများဆုံး ကစားသမားတစ်ဦး ဖြစ်ရန် ကြိုးစားမည်ဟု ပြောကြားခဲ့ကြောင်း သိရသည်။
ဟယ်ရီကိန်းသည် ပရီးမီးယားလိဂ် ပွဲစဉ်(၄)အဖြစ် စပါးအသင်းနှင့် နော်တင်ဟမ်အသင်းတို့ ကစားခဲ့သည့် ပွဲစဉ်တွင် အသင်းအတွက် သွင်းဂိုး နှစ်ဂိုးသွင်းယူနိုင်ခဲ့ ပြီးနောက် ပရီးမီးယားလိဂ်ပြိုင်ပွဲ သမိုင်းတစ်လျှောက် သွင်းဂိုးအများဆုံး ကစားသမားစာရင်းတွင် မန်ယူအသင်း ဂန္ထဝင်ကစားသမားဟောင်း အင်ဒီကိုးလ်၏ သွင်းဂိုးစံချိန်ကို လိုက်မီနိုင်ခဲ့ခြင်းဖြစ်သည်။
ဟယ်ရီကိန်းက “ပရီးမီးယားလိဂ်ပြိုင်ပွဲ သမိုင်းတစ်လျှောက် သွင်းဂိုးအများဆုံး ကစားသမားတစ်ဦး ဖြစ်ဖို့ အများကြီး လိုအပ်နေသေးတာ မှန်ပါတယ်။ လက်ရှိ ကျွန်တော့်ရဲ့ကြံ့ခိုင်မှုက အကောင်းဆုံးပုံစံမှာ ရှိနေသလို နှစ်တွေအများကြီး ကစားဖို့ ကျန်ပါသေးတယ်။
ဘောလုံးရာသီတိုင်းမှာ ကျွန်တော်သွင်းဂိုးတွေ အများကြီးရပြီး ပရီးမီးယားလိဂ်ပြိုင်ပွဲ သမိုင်းတစ်လျှောက် သွင်းဂိုးအများဆုံး ကစားသမားတစ်ဦးအဖြစ်နဲ့ ကစားသမားဘဝက အနားယူနိုင်အောင် ကြိုးစားမှာပါ”ဟု ပြောသည်။
လက်ရှိပရီးမီးယားလိဂ် ပြိုင်ပွဲ၏ သွင်းဂိုးအများဆုံး ကစားသမား စာရင်းတွင် အလန်ရှီးယားက သွင်းဂိုး ၂၆၀ ဖြင့် ထိပ်ဆုံးမှ ရပ်တည်လျက် ရှိကြောင်း သိရသည်။
Ref;Sky Sports