ထိုင်းကလပ် လမ်ဖွန်အသင်း၌ ကစားနေသည့် ကွင်းလယ်ကစားသမား မောင်မောင်လွင်ကို မော်လ်တာကလပ်အသင်း တစ်သင်းက ခေါ်ယူရန် ကမ်းလှမ်းထား
ထိုင်းကလပ် လမ်ဖွန်အသင်း၌ ကစားနေသည့် မြန်မာ့လက်ရွေးစင် အသင်း ကွင်းလယ်ကစားသမား မောင်မောင်လွင်ကို မော်လ်တာနိုင်ငံမှ ကလပ်အသင်းတစ်သင်းကခေါ်ယူရန် ကမ်းလှမ်းမှု ရရှိထားကြောင်း သိရသည်။
မြန်မာ့လက်ရွေးစင်အသင်း ကွင်းလယ်ကစားသမား မောင်မောင်လွင်သည် ပြီးခဲ့သည့် ဘောလုံးရာသီက မြန်မာနေရှင်နယ် လိဂ်ကလပ် ရန်ကုန်ယူနိုက်တက် အသင်းမှ ထိုင်းလိဂ်-၂ ကလပ် လမ်ဖွန်အသင်းထံ ပြောင်းရွှေ့ ကစားခဲ့သူဖြစ်ပြီး ၎င်းအနေဖြင့် လမ်ဖွန်အသင်းတွင် အကောင်းဆုံး ခြေစွမ်းပြသနိုင်ခဲ့ပြီး ယခုနှစ်ဘောလုံးရာသီတွင် ထိုင်းလိဂ်-၂ ပြိုင်ပွဲမှ လိဂ်-၁ ပြိုင်ပွဲသို့ လမ်ဖွန်အသင်း တက်ရောက်ခဲ့ရာတွင် အဓိကနေရာမှ ပါဝင်ခြေစွမ်းပြသနိုင်သူဖြစ်သည်။
မောင်မောင်လွင်သည် ပြီးခဲ့သည့် ဘောလုံးရာသီက လမ်ဖွန်အသင်းနှင့် လေးဂိုးသာ သွင်းယူနိုင်ခဲ့သော်လည်း အသင်းဖော်များ ဂိုးသွင်းယူနိုင်ရန် ရှစ်ကြိမ်အထိ ဂိုးဖန်တီးမှုပြုလုပ်နိုင်ခဲ့ပြီး အသင်း၏ အဓိက ပွဲထွက်ကစားသမားအဖြစ် ပါဝင်ခွင့်ရရှိခဲ့သည်။
ယခုနှစ်ဘောလုံးရာသီတွင် မောင်မောင်လွင်အနေဖြင့် ပခုံးဒဏ်ရာရရှိပြီးနောက် အနားယူခဲ့ရပြီး ကြံ့ခိုင်မှုပြန်လည်ပြည့်ဝရန် ကြိုးပမ်းနေသည့်အတွက် ပုံမှန်ပွဲထွက်ခွင့် မရရှိသေးသော်လည်း ပြီးခဲ့သည့် ဘောလုံး ရာသီကပြသခဲ့သော အကောင်းဆုံး ခြေစွမ်းများကြောင့် အမည်ဖော်ပြခြင်း မရှိသေးသည့် မော်လ်တာနိုင်ငံမှ ကလပ်အသင်း
တစ်သင်းက မောင်မောင်လွင်ကို ခေါ်ယူရန် ကမ်းလှမ်းခဲ့ကြောင်း သိရသည်။