စောစောလမ်းလျှောက်ကြပါစို့

စောစောလမ်းလျှောက်ကြပါစို့

“စောစောအိပ်လို့၊ စောစောထလို့။ စောစော လမ်းလျှောက်ကြပါစို့၊ ကိုယ်ခန္ဓာသန်စွမ်းစေဖို့၊ စိတ်နှလုံးရွှင်ပြုံးစေဖို့၊ သူငယ်ချင်း အပေါင်းအသင်း တစ်စုတို့ ပျော်ဖို့ရွှင်ဖို့ကျန်းမာစေဖို့” ဆိုတဲ့တေးသံမှာ မြန်မာ့အသံရေဒီယိုက နံနက် ၇ နာရီ၊ နံနက်ချိန်ခါ တေးသံသာ အစီအစဉ်မှာ အသံလွှင့်နေကျဖြစ်ပြီး လူအတော်များများရင်းနှီးကြသလို နှစ်သက်ကြတဲ့ သီချင်းလေးတစ်ပုဒ်ဖြစ်ပါတယ်။ ဒီသီချင်းကို ရေးသားခဲ့သူက ဗဟိုထွန်းကြူဖြစ်ပြီး တေးနံ့သာမြိုင်အဖွဲ့က သီဆိုထားရာ အလွန်ကျော်ကြားခဲ့တဲ့ ရေဒီယိုသီချင်း တစ်ပုဒ်ဖြစ်ပါ တယ်။ အထူးသဖြင့် ယခုလိုအေးမြလှတဲ့ ဒီဇင်ဘာလမှာ ဒီသီချင်းသံကိုကြားလိုက်တယ်ဆိုလျှင်ပဲ လမ်းလျှောက်ချင်စိတ်တွေ ဖြစ်ပေါ်လို့ လာပါတော့တယ်။ မြန်မာနိုင်ငံမှာ နွေ၊ မိုး၊ ဆောင်းရယ်လို့ ရာသီဥတုသုံးမျိုးရှိရာ ဒီဇင်ဘာလဟာ အအေးဆုံးလ ဖြစ်ပါတယ်။ ရာသီဥတုအေးမြတဲ့အတွက် လူ့ခန္ဓာကိုယ်မှာရှိတဲ့ အကြောအခြင်တို့ဟာ တုံ့ဆိုင်းလေးလံနေတတ်တဲ့အတွက် အသက် အရွယ်မရွေး လမ်းလျှောက်ထွက်ကြပါတယ်။

“လမ်းလျှောက်ခြင်းက အကောင်းဆုံးဆေးဝါး” ဆိုတဲ့အဆိုတစ်ရပ်ရှိပါတယ်။ လူတစ်ဦးဟာ အိပ်ရေး၀၀ အိပ်စက်ခြင်းနဲ့ ကျန်းမာတဲ့ အစာအာဟာရစားသုံးခြင်းတို့ကို လမ်းလျှောက်ခြင်းနဲ့ ပေါင်းစပ်လိုက်လျှင် ကျန်းမာသူတစ်ဦးဖြစ်မှာ အသေအချာပါပဲ။ လမ်းလျှောက် ခြင်းဟာ အယ်ဇိုင်းမားရောဂါ ဖြစ်ပွားနိုင်ခြေကို လျော့ကျစေပါတယ်။ ခြေထောက်နဲ့မျက်စိက ဆက်စပ်ကြည့်လျှင် အဝေးကြီး ဆိုပေမယ့် နေ့စဉ်ပုံမှန်လမ်းလျှောက်ပေးလျှင် ခြေထောက်မှအပူ များထွက်တတ်သဖြင့် မျက်စိကိုကြည်လင်စေပါတယ်။ လမ်းလျှောက်ခြင်းက သွေးကြောအတွင်းမှာ အောက်ဆီဂျင်စီးဆင်းမှုကို ကောင်းမွန်စေပြီး အဆုတ်ကိုလေ့ကျင့်ပေးတဲ့ သဘော သက်ရောက်ပါတယ်။

အသက်ခပ်ပြင်းပြင်း၊ ခပ်၀၀ရှူပေးလျှင် အဆုတ်နဲ့ ပတ်သက်တဲ့ ရောဂါလက္ခဏာတွေကို သက်သာစေပါတယ်။ နေ့စဉ်မိနစ် ၃၀ ကြာလမ်းလျှောက်ပေးလျှင် အစာခြေစနစ်ကောင်းမွန်စေကာ ဝမ်းချုပ်ခြင်းမဖြစ်စေဘဲ အူမကြီးကင်ဆာ ဖြစ်ပွားနိုင်ခြေနည်းပါတယ်။ ကျောကုန်းခဏခဏ အောင့်တတ်တဲ့လူတွေအတွက် ထိရောက်တဲ့ကုသနည်းက လမ်းလျှောက်ခြင်းပါ။ သွေးလှည့်ပတ်စီးဆင်းမှု ကောင်းမွန်စေပြီး ကိုယ်ဟန်အနေအထား မှန်ကန်စေတာကြောင့် ကျောအောင့်ခြင်းကို သက်သာစေပါတယ်။ သူငယ်ချင်းတွေ၊ ချစ်ခင်ရသူတွေနဲ့ အတူတကွ လမ်းလျှောက်တာက စိတ်ပျော်ရွှင်မှုကို ရရှိစေတာအမှန်ပါ။ လမ်းလျှောက်ခြင်းဟာ အခြား အားကစားနည်းတွေလို  အသင်းဝင်ကြေး၊ အားကစားကိရိယာတွေ မလိုတဲ့အတွက် ငွေကြေးအကုန်အကျလည်း နည်းပါးလှပါတယ်။  နေ့စဉ်သွားလာ လုပ်ကိုင်နေကျဖြစ်ပြီး  ထူးထူးထွေထွေ သင်ကြားစရာမလိုတဲ့ အလွယ်ကူဆုံး အားကစားနည်းတစ်ခု ဖြစ်ပါတယ်။ လမ်းလျှောက်ခြင်းက သွေးတိုး၊ ကိုလက်စထရောတို့ကို ကျဆင်းစေပြီး စိတ်ဖိစီးမှုနဲ့ စိတ်ကျခြင်းတို့ကို သက်သာစေပါတယ်။ ကိုယ်အလေး ချိန်ကျအောင်ကူညီပေးတဲ့အပြင် နှလုံးရောဂါနဲ့ လေဖြတ်၊ လေဖြန်း စတဲ့နာတာရှည်ရောဂါ ဖြစ်နိုင်ခြေကိုလည်း လျော့နည်းစေပါတယ်။ လမ်းလျှောက်ခြင်းဟာ အန္တရာယ်မရှိသလို ထိခိုက်အနာတရဖြစ်တာတွေလည်း မရှိပါ။ အလွယ်တကူ လုပ်ဆောင်လို့ရတာမျိုး ဖြစ်ပြီး မိမိရဲ့အိမ်ခန်းအတွင်း၊ ခြံဝင်းအတွင်း၊ လမ်းဘေးဝဲယာတစ်လျှောက်၊ ဘောလုံးကွင်း၊ အားကစားကွင်း စသည်ဖြင့် လမ်းလျှောက်လို့ ရတဲ့နေရာတွေလည်း အများကြီးရှိပါတယ်။ လမ်းလျှောက်တဲ့ အလေ့အကျင့်မရှိသူဆိုလျှင် ဦးစွာ တစ်ရက်ကို ၁၀ မိနစ် လမ်းလျှောက်ကြည့်ပါ။ တဖြည်းဖြည်းတိုးသွားပါ။ လမ်းစလျှောက်လျှင် သက်သောင့်သက်သာ ဖြစ်စေမယ့် နှုန်းနဲ့စတင်ပြီး ရက်သတ္တပတ်တစ်ပတ်မှာ ၃ မိနစ်ကနေ ၅ မိနစ်တိုး၍ လျှောက်ကြည့်ပါ။ ရည်မှန်းချက်ကတစ်ပတ်ကို ငါးရက်၊ တစ်ရက်ကို မိနစ် ၃၀ စသည်ဖြင့် အမြန်လျှောက်နိုင်ဖို့ပဲ ဖြစ်ပါတယ်။ စတင်တဲ့ရက်အနည်းငယ်မှာ ဘယ်လောက် လမ်းလျှောက်လဲ ဆိုတာကို မှတ်သားထားပါ။ ခြေလှမ်းတိုင်း ကိရိယာနဲ့နာရီကို အသုံးပြုပြီး သင်ဘယ်နှမိနစ် လျှောက်ပြီးပြီလဲ။ သင်ခြေလှမ်း ဘယ်လောက်လျှောက်ပြီးပြီလဲစစ်ပါ။ အရေးကြီးတာက နေ့စဉ်အချိန်မှန်မှန်နဲ့ သက်သောင့်သက်သာ လျှောက်ဖို့ပဲ ဖြစ်ပါတယ်။  လမ်းလျှောက်လျှင် ပုံစံမှန်မှန်နဲ့လျှောက်ပါ။ ရှေ့ကိုကြည့်ပါ။ မြေကြီးကို ကြည့်ပြီး မလျှောက်ပါနဲ့။ ဦးခေါင်းနဲ့မေးစေ့ကို မတ်မတ်ထားပြီး လမ်းလျှောက်ပါ။ သင်လမ်းမလျှောက်ခင် ရေအနည်းငယ်သောက်ထားတာက ရေဓာတ်ခန်း ခြောက်တာ မဖြစ်အောင်  ကာကွယ်ပေးနိုင်ပါတယ်။ လမ်းလျှောက်ခြင်းနဲ့ လေ့ကျင့်ခန်းလုပ်ခြင်းအတွက် သီးသန့်ထုတ်ထားတဲ့ ဖိနပ်တွေစီးလျှင် လည်း အဆင်ပြေစေမှာဖြစ်ပါတယ်။ လမ်းလျှောက်တာကို အလေ့အကျင့်ရသွားတာနဲ့  နောက်တစ်ဆင့်တက်ရမယ့် နည်းလမ်းများမှာ လမ်းလျှောက်နေစဉ်တစ်ချက်၊ တစ်ချက်အရှိန်မြှင့်ပြီး နှလုံးခုန်မြန်လာအောင်လုပ်ပါ။ ခံနိုင်ရည်မြင့်ဖို့ လျှောက်နေကျ အကွာအဝေးကို တိုး၍လျှောက်ပါ။ မြန်မြန်နဲ့ ဝေးဝေးလျှောက်ပါ။ ကုန်းတက်တွေကိုပါ လျှောက်ပါ။ သင်လျှောက်ပုံ လျှောက်နည်းကို ပြောင်းပါ။ တချို့နေ့တွေမှာ ခရီးတိုတိုကို မြန်မြန်လျှောက်ပြီး တချို့နေ့တွေမှာ  ဝေးဝေးလျှောက်ပါ။

မြန်မာနိုင်ငံနေရာအနှံ့မှာ ဒီဇင်ဘာလလူထုလမ်းလျှောက်ပွဲနဲ့ ဌာနဆိုင်ရာလမ်းလျှောက်ပွဲများကို ကျင်းပလျက်ရှိလို့ ပါဝင်လုပ် ဆောင်နိုင်ပါတယ်။ လမ်းလျှောက်ခြင်းဟာ အလွယ်ကူဆုံး သွေးပူလေ့ကျင့်ခန်းတစ်ခု ဖြစ်ပါတယ်။ လမ်းလျှောက်ခြင်းက သင့်ရဲ့ နှလုံးခုန်နှုန်း၊ ကြွက်သားတွေ၊ ကိုယ်တွင်းအပူချိန် စတာတွေကို တဖြည်းဖြည်း မြင့်တက်လာစေနိုင်ပြီး သွေးလည်ပတ်မှုကိုလည်း ကောင်းမွန်စေနိုင်ပါတယ်။

မပြေးခင်မှာ ၃ မိနစ်မှ ၅ မိနစ်လောက်အသက်ကို ပုံမှန်ရှူပြီး ညင်သာစွာ လမ်းလျှောက်ပေးခြင်းက ခန္ဓာကိုယ်အတွက်   အကောင်းဆုံးဖြစ်ပါတယ်။  လမ်းလျှောက်ပြီးတဲ့အခါမှာ အကြောလျှော့ခြင်းကို သွေးပူလေ့ကျင့်ခန်းအနေနဲ့ လုပ်ဆောင်ရာမှာ များသောအားဖြင့် ခြေထောက်လှုပ်ရှားမှုတွေကို ပြုလုပ်ကြပါတယ်။ ခြေထောက်ကိုသုံးပြီး လှုပ်ရှားတဲ့ လေ့ကျင့်ခန်းတွေ များစွာ ရှိပါတယ်။ အဲဒီထဲက အခြေခံလေ့ကျင့်ခန်းတချို့ကို ဆက်လက်ဖော်ပြပါ့မယ်။

(၁)       သင့်ရဲ့ညာခြေထောက်ကို ဒူးကွေးထားတဲ့ အနေအထားနဲ့အပေါ်ကို မြှောက်တင်လိုက်ပါ။ သင့်နောက်ကျောကို ဖြောင့်တန်းအောင်ထားပြီး ညာခြေထောက်ရဲ့ အတွင်းဘက်ကိုထိဖို့ သင့်ဘယ်လက်ကိုအသုံးပြုပါ။ တစ်ဖက်စီအတွက် ၁၀ ကြိမ်ခန့်  အတင်အချ လုပ်ဆောင်ပေးပါ။

(၂)        ဒူးကို ၉၀ ဒီဂရီဖြစ်အောင်ထားပါ။ တစ်ဖက်စီအတွက် ၁၀ ကြိမ်စီ ခန့်အတင်အချလုပ်ဆောင်ပါ။

(၃)       သင့်ရဲ့ခြေထောက်ကို အနောက်နဲ့အပေါ်ဘက်ကို ပြင်းပြင်းထန်ထန်ကွေးလိုက်ပြီး သင့်ဖနောင့်ကတင်ပါးကိုထိတဲ့ အထိ လုပ်ဆောင်ရပါမယ်။ ယခုကဲ့သို့လုပ်ဆောင်နေတဲ့အချိန်မှာ   ဖြောင့်ဖြောင့်မတ်မတ်ရပ်နေဖို့အရေးကြီးပါတယ်။ 

(၄)       သင့်ရဲ့ခြေထောက်ကိုအနောက်ကိုကွေးလိုက်ပြီး သင့်ဖနောင့်က တင်ပါးကို ထိလုနီးပါးအချိန်အထိ လုပ်ဆောင်ရပါမယ်။  ပြီးတဲ့အခါ တင်ပါးနားမှာဖနောင့်ကိုရှိနေအောင် လက်နဲ့ထိန်းထားပြီး ၁ မှ ၁၀ ထိရေတွက်ပြီးသည်အထိထားရပါမယ်။ တစ်ဖက်စီ အတွက် ၃ ကြိမ်မှ ၅ ကြိမ်ခန့်အထိ  လုပ်ဆောင်ပေးပါ။ သတိထားရမှာက အကြောတင်းလာရုံမျှသာ ဖိပြီးနာကျင်အောင် သို့မဟုတ် မအီမသာဖြစ်အောင်  အတင်းဖိအားပေး လုပ်ဆောင်ရန် မလိုအပ်ပါ။

(၅)       သင့်ရဲ့ခြေသလုံး ကြွက်သားတွေက သင်ပြေးတဲ့အချိန်မှာ အရေးကြီးတဲ့အပိုင်းကနေ ပါဝင်ပါတယ်။ အဲဒီကြွက်သားတွေဟာ သင့်ခြေထောက်က မြေပြင်ပေါ်ကနေ ကြွလိုက်တာနဲ့ကျုံ့သွားပါတယ်။ ခြေဖျားထောက်ပြီး ရပ်တာကနေ စတင်လိုက်ပါ။ ပြီးလျှင် တဖြည်းဖြည်းခြေဖနောင့်ကို ပြန်ချလိုက်ပါ။ သင့်ရဲ့ခြေသလုံးကြွက်သားမှာ တင်းတယ်လို့ခံစားရပါလိမ့်မယ်။ တင်းနေတုန်း ခဏရပ်ပြီး ပြန်ချလိုက်ပါ။ လှေကားထစ်အစွန်းမှာ ယခုလိုလေ့ကျင့်ခန်းလုပ်ခြင်းဟာ ပိုမိုကောင်းမွန်ပါတယ်။ လိုအပ်လျှင် လှေကားလက်ရန်းကို ကိုင်နိုင်ပါတယ်။ ကောင်းမွန်တဲ့ သွေးပူလေ့ကျင့်ခန်းတစ်ခုဟာ ခန္ဓာကိုယ်ကို ကြိုတင်ပြင်ဆင်ဖို့ အခွင့်အလမ်း တွေပိုမိုရရှိစေနိုင်ပါတယ်။

သာမန်လူတစ်ဦးဟာ တစ်နေ့တာ၂၄ နာရီမှာ ထိုင်နေရတဲ့ အချိန်ကများတဲ့အတွက် ကိုယ်လက်လှုပ်ရှားဖို့လိုအပ်လှပါတယ်။ ကိုယ်လက် လှုပ်ရှားတဲ့နေရာမှာ အလွယ်ကူဆုံးနဲ့ အရင်းနှီးဆုံးကတော့ လမ်းလျှောက်ခြင်းဖြစ်ပါတယ်။ ဒါ့ကြောင့် သင့်ရဲ့ တစ်နေ့ တာမှာ အနည်းဆုံးမိနစ် ၃၀ ခန့်လမ်းလျှောက်ဖို့ လိုအပ်ပါတယ်။ ပုံမှန်လမ်းလျှောက်ပေးခြင်းဖြင့် နှလုံးကျန်းမာရေးကို အထောက် အကူပြုစေပါတယ်။ အရိုးအဆစ်တွေကို သန်မာစေပါတယ်။ ခန္ဓာကိုယ်မှာရှိတဲ့ အဆီပိုတွေကို လျှော့ချပေးနိုင်ပါတယ်။ ကြွက်သားများကို သန်မာစေပါတယ်။ ဒါ့ကြောင့်  ယခုလိုအေးမြလှတဲ့ ဒီဇင်ဘာလဆောင်းရာသီမှာ လမ်းလျှောက်ခြင်းကို အစုအဖွဲ့နှင့် ဖြစ်စေ၊ မိတ်ဆွေ အပေါင်းအသင်းနှင့်ဖြစ်စေ၊ မိသားစုနှင့်ဖြစ်စေ၊ တစ်ဦးတည်းဖြစ်စေ ဆောင်ရွက်သင့်ကြောင်း  ရေးသား လိုက်ရပါတော့တယ်။    ။

ကိုးကား- Dr. Thanda Lin www.drmyanmar.com မှရေးသားချက်။

 စိန်ဌေးလှိုင်(ပခုက္ကူ)