ONE Fight Night ပြိုင်ပွဲတွင် အောင်လအန်ဆန်၏ ပြိုင်ဘက်ကစားသမား အပြောင်းအလဲဖြစ်ပေါ်
ONE Championship မှ ကြီးမှူး ကျင်းပမည့် ONE Fight Night ပြိုင်ပွဲတွင် မစ်ဒယ်ဝိတ်တန်းစိန်ခေါ်ပွဲအဖြစ် ယှဉ်ပြိုင်မည့် အောင်လအန်ဆန်၏တွဲဆိုင်း အပြောင်းအလဲဖြစ်ပေါ်ခဲ့ပြီး ဘရာဇီးနိုင်ငံသား ဂျီဘာတိုဂယ်ဗီအိုနှင့် ပြောင်းလဲယှဉ်ပြိုင်ရမည်ဖြစ်ကြောင်း သိရသည်။
ပြိုင်ပွဲကို ဇန်နဝါရီ ၁၃ ရက်တွင် ထိုင်းနိုင်ငံ ဗန်ကောက်မြို့ Impact Arena အားကစားခန်းမ၌ ကျင်းပမည်ဖြစ်ပြီး အဓိကချန်ပီယံခါးပတ်စိန်ခေါ်ပွဲ သုံးဆိုင်းနှင့် တခြားစိန်ခေါ်ပွဲခြောက်ဆိုင်း စုစုပေါင်း ကိုးဆိုင်း ထည့်သွင်းကျင်းပမည်ဖြစ်ကာ အဆိုပါပြိုင်ပွဲကို အမေရိကန်နှင့် ကနေဒါနိုင်ငံတို့၌ ဈေးကွက်ချဲ့ထွင်သည့် အနေဖြင့် ဒေသစံတော်ချိန် နံနက်အစောပိုင်းတွင် ကျင်းပမည်ဖြစ်သည်။
အဆိုပါပြိုင်ပွဲတွင် အောင်လအန်ဆန်သည် မစ်ဒယ်ဝိတ်တန်းစိန်ခေါ် ပွဲစဉ်အဖြစ် တရုတ်ဖိုက်တာ ဖန်ရွန်နှင့်ယှဉ်ပြိုင်ရမည် ဖြစ်သော်လည်း ပွဲကျင်းပရန် နီးကပ်လာသည့်အချိန်တွင် ONE Championship ပြိုင်ဘက်အပြောင်းအလဲပြုလုပ်ခဲ့ပြီး တွဲဆိုင်းပြောင်းလဲခဲ့ခြင်းဖြစ်ကာ ONE Championship က အတိအကျသတင်းမထုတ်ပြန်ခဲ့သော်လည်း ဖန်ရွန်အနေဖြင့် ဒဏ်ရာရရှိခဲ့သည့်အတွက် တွဲဆိုင်းအပြောင်းအလဲ ဖြစ်ပွားခဲ့ခြင်း ဖြစ်ဖွယ်ရှိနေသည်ဟု သတင်းများထွက်ပေါ်လျက်ရှိသည်။
ယခုအခါ အောင်လအန်ဆန်နှင့် ယှဉ်ပြိုင်မည့် တွဲဆိုင်းအပြောင်းအလဲဖြစ်ပေါ်မှုနှင့်အတူ ဝိတ်တန်းပါ အနည်းငယ် အပြောင်းအလဲဖြစ်ပေါ်ခဲ့ကြောင်း သိရသည်။
စည်သူအောင်