လူငယ်ကွင်းလယ်ကစားသမား ကာမာဗင်ဂါအတွက် အာဆင်နယ်အသင်း၏ အငှားစာချုပ်ဖြင့် ကမ်းလှမ်းမှုကို ရီးယဲလ်မက်ဒရစ်အသင်းပယ်ချ
အာဆင်နယ်အသင်းက လက်ရှိ ဇန်နဝါရီကစားသမားအပြောင်းအရွှေ့ကာလမပြီးဆုံးမီ ရီးယဲလ်မက်ဒရစ် အသင်းမှ လူငယ်ကွင်းလယ်ကစားသမား ကာမာဗင်ဂါကို ရာသီဝက်အငှားစာချုပ်ဖြင့် ခေါ်ယူရန် ကမ်းလှမ်းခဲ့သော်လည်း ရီးယဲလ်မက်ဒရစ်အသင်းက ပယ်ချခဲ့ကြောင်း သိရသည်။
အာဆင်နယ်အသင်းသည် ယခုဘောလုံးရာသီတွင် ပရီးမီးယားလိဂ်ချန်ပီယံဆုအတွက် မျှော်လင့်ချက် ရှိနေသောကြောင့် လက်ကျန်ဘောလုံးရာသီတွင်ကစားသမားအင်အားပိုင်း တောင့်တင်းမှုရှိစေရန် လက်ရှိ ဇန်နဝါရီကစားသမား အပြောင်းအရွှေ့ကာလတွင် ကစားသမားသစ်များ ခေါ်ယူအင်အားဖြည့်တင်းရန် ကြိုးပမ်းနေခြင်းဖြစ်သည်။
အာဆင်နယ်အသင်းနည်းပြ အာတီတာကအသင်း ကွင်းလယ်အဖျက်ပိုင်းတွင် သောမက်ပါတေးတစ်ဦး တည်းကိုသာ ပွဲစဉ်တိုင်းအားပြု ကစားနေရသဖြင့် ၎င်းဒဏ်ရာရရှိခဲ့ပါက အစားထိုးရန် ကစားသမား တစ်ဦး လိုအပ်နေသည့်အတွက် ကာမာဗင်ဂါကို ယခုဘောလုံးရာသီကုန်အထိ အငှားစာချုပ်ဖြင့် ခေါ်ယူရန်ကမ်းလှမ်းခဲ့ခြင်း ဖြစ်သည်။
ရီးယဲလ်မက်ဒရစ်အသင်းနည်းပြ အန်ဆယ်လော့တီက ကျွန်တော်တို့အနေနဲ့ ကာမာဗင်ဂါကို အသင်းက နေထွက်ခွာစေဖို့ အစီအစဉ်မရှိပါဘူး။ သူက အသင်းရဲ့ အနာဂတ်ကစားသမားတစ်ဦးပါ။ သူ့ကို ကျွန်တော်တို့ အနေနဲ့ ထွက်ခွာခွင့်ပြုမှာမဟုတ်ပါဘူးဟု ပြောသည်။
Ref:Marca