နိုင်ငံရဲ့အမည်ကို လွတ်လပ်ရေးပေးခြင်း သို့မဟုတ် အိန္ဒိယကို ဘားရတ်ဟု ခေါ်စေသတည်း(၃)

နိုင်ငံရဲ့အမည်ကို လွတ်လပ်ရေးပေးခြင်း သို့မဟုတ် အိန္ဒိယကို ဘားရတ်ဟု ခေါ်စေသတည်း(၃)

 

ရှုပ်ထွေးလှတဲ့ ဘားရတ်သမိုင်းကြောင်း

      ဘားရတ်ဆိုတဲ့ စကားလုံးကို လွန်စွာရှေးကျလှသော ဝေဒစာပေများထဲမှာ တွေ့ရသည်။ သက္ကရာဇ်အားဖြင့် ဆိုလျှင် ဘီစီ ၁၄၂၀ ဝန်းကျင်ခန့်ကဖြစ်သည်။

အဲဒီကာလတုန်းက ရေကြည်ရာမြက်နုရာ လှည့်လည်သွားလာနေတဲ့ မျိုးနွယ်စုများက ယခုလက်ရှိဒေသသို့ ဝင်ရောက်လာခဲ့ခြင်းဖြစ်သည်။

ဘားရတ်ဆိုတဲ့စကားလုံးဟာ အဲဒီမျိုးနွယ်စုများကြားမှာ အလွန်ရေပန်း အစားဆုံးနဲ့ လွှမ်းမိုးမှုအရှိဆုံး စကားလုံးတစ်ခုဖြစ်သည်။

ပြောရလျှင် စကြဝဠာကို ပထမဆုံး အုပ်စိုးသူအဖြစ် ယူဆရသူကို ဘားရတ်တာဟုခေါ်ပြီး ၎င်းသည် ရှေးဦးဝေဒ မျိုးနွယ်စုများကြားတွင် ကျော်ကြားသူဖြစ်သည်။ ဒါကြောင့် ၎င်းမှဆက်သက်လာတဲ့ သားမြေးစဉ်ဆက်တို့ အုပ်ချုပ်ရာနေရာကို ဘားရတ်တာဟု ခေါ်ခြင်းဖြစ်သည်။

“ယာနလို့လည်းခေါ်တဲ့   အဲဒီမျိုးနွယ်စုတွေဟာ အစောပိုင်းတုန်းက  နေရာအတည်တကျ မရှိပါဘူး။ ဒါပေမဲ့ ဝေဒခေတ်နှောင်းပိုင်း ကာလ ဘီစီ ၁၀၀၀ နဲ့ ၆၀၀ ကြားမှာ အရှေ့ဘက်နယ်မြေတွေဆီကို ရွေ့လျားလာပြီး စိုက်ပျိုးမွေးမြူရေးကို သူတို့ရဲ့ အသက်မွေးဝမ်းကျောင်းအဖြစ် လုပ်ဆောင်ကာ အဲဒီဒေသတွေမှာပဲ အခြေချနေထိုင်မှုတွေ လုပ်လာတဲ့အတွက် အဲဒီနေရာတွေကို ယာနပါဒလို့ခေါ်လာပါတယ်” ဟု ကာနတ်ဆင်းဟာ ပြောသည်။

ဒီအချိန်မှာ ဘားရတ်တာတွေက ပူရူးမျိုးနွယ်စုများနဲ့ အတူတကွ ပေါင်းစည်းနေထိုင်ပြီး ကူရူးဆိုတဲ့မျိုးနွယ်စုကို ဖြစ်ပေါ်လာစေသည်။ သူတို့နေထိုင်ရာ ယာနပါဒကိုလည်း ကူရူးသျှတ္တရာလို့ အမည်ပေးသည်။

အဲဒီမျိုးနွယ်စုတွေကနောက်ပိုင်းမှာ တော်ဝင်မင်းဆက်များ ဖြစ်လာပြီး သူတို့ရဲ့အမည်များသည်လည်း ဘုရင်များရဲ့ အမည်များအဖြစ် ပြောင်းလဲလာရသည်။

နောက်ပိုင်းမှာ ကူရူး-ပန်ချလာ ဘုရင့်နိုင်ငံတော်များ ပေါင်းစည်းပြီးတဲ့အခါ မဟာဘားရတ်တာ ဆိုသည့်အမည်ကို မှည့်ခေါ်စေခဲ့သည်။

ပေါရာဏမျိုးရိုးစဉ်ဆက်များ အရဆိုလျှင်လည်း အိန္ဒိယဘုရင်များ အားလုံးဟာ   သူတို့ရဲ့ဒဏ္ဍာရီလာ ဘုရင်ဖြစ်တဲ့ ဘားရတ်တာနဲ့ အမျိုးတော်တယ်လို့ ဆိုထားပြန်သည်။ ဒါကြောင့် ဘားရတ်တာဗာရှာဆိုသည့် အယူအဆ ထွက်ပေါ်လာစေခြင်းဖြစ်သည်။

အိန္ဒိယနဲ့ဘားရတ်တို့ အားပြိုင်ကြရာဝယ်

      ရှေးရိုးစွဲများက ဘားရတ်ဟူသော အမည်သည် ဒေသခံတိုင်းရင်းသား ဘိုးဘေးဘီဘင်များနှင့် ဆက်စပ်မှုရှိသည်ဟု ဂုဏ်ယူစွာ လက်ခံထားကြပြီး အိန္ဒိယဟူသည့် အမည်ကိုတော့ လက်မခံဘဲ ငြင်းဆိုထားကြသည်။

ဒါ့အပြင် သူတို့ရဲ့လွတ်လပ်ရေး ကြိုးပမ်းမှုသမိုင်းကြောင်းကို ပြန်ကြည့်မည်ဆိုပါက "Bharat Maja ki jai" (အမိမြေ အိန္ဒိယအတွက်အောင်ပွဲ)ဟု ကြွေးကြော်ခဲ့ကြသည်ကို တွေ့ရသည်။

တခြားတစ်ဖက်တွင်မူ အိန္ဒိယဟူသော အသုံးအနှုန်းမှာ ပြည်ပ၏ ကျွန်ပြုလွှမ်းမိုးမှုမှ ထွက်ပေါ်လာသည့် အသုံးအနှုန်းဖြစ်သည်ဟု လက်ခံထားသည်။

မွမ်ဘိုင်းမြို့တွင်နေသူများက   အဲဒီမြို့ကို မြို့၏ အမည်နာမတစ်ခုအဖြစ်သာ   သတ်မှတ်ထားသည်။ သူတို့ရဲ့ရင်ထဲမှာတော့ သူတို့နေထိုင်ရာနေရာသည် ဘုံဘေဖြစ်သည်ဟု သတ်မှတ်ထားခြင်းမျိုးဖြစ်သည်။

တကယ်တမ်းတွင် ဘုံဘေသည် ယခင်အမည်နာမ ဖြစ်ပြီး မွမ်ဘိုင်းသည်   မျက်မှောက်ခေတ် အမည်ဖြစ်သည်။ နေရာကား တစ်ခုတည်းပင်ဖြစ်သည်။

ယခု အိန္ဒိယနှင့် ဘားရတ်ဟူသည့် အသုံးအနှုန်းမှာလည်း အလားတူ သဘောတရားကဲ့သို့ပင် ဖြစ်သည်။ သို့သော် ၎င်းတို့နေထိုင်ရာ နေရာသည် ဘားရတ်သာဖြစ်ပြီး အိန္ဒိယဆိုသည်မှာ ကိုလိုနီတို့ သတ်မှတ်ခဲ့သည့် အမည်ဖြစ်သည်ဟု အများစုက ခံယူထားကြသည်။

ကမ္ဘာပေါ်တွင် အမည်ပြောင်းလဲခဲ့ကြသော နိုင်ငံအများအပြားရှိသည်။ တူရကီက တူကီယဲ၊ ချက်သမ္မတနိုင်ငံက ချက်ကီယာ၊   ဆွာဇီလန်က အက်စဝါတီနီ၊ ဟော်လန်က နယ်သာလန်၊ မက်ဆီဒိုးနီးယားက မြောက်မက်ဆီဒိုးနီးယား သမ္မတနိုင်ငံ၊   စီလုံက သီရိလင်္ကာ၊ အိုင်းရစ်လွတ်လပ်သော ပြည်နယ်က အိုင်ယာလန်၊ ကိပ်ဗာ့က ကာဘိုဗာ့၊ ဆီယမ်က ထိုင်းနိုင်ငံ၊ ဘားမားက မြန်မာ၊ ခမာအပါအဝင် အမည်အမျိုးမျိုးမှ ကမ္ဘောဒီးယားနဲ့ ပါးရှားက အီရန်သို့ ပြောင်းလဲခဲ့ခြင်းဖြစ်သည်။

ဆိုလိုချင်သည့်အချက်က နိုင်ငံတစ်နိုင်ငံ၏ အမည်ပြောင်းလဲခြင်းအတွက် သူ့သမိုင်းကြောင်းနဲ့ သူရှိသည်။ သူ့အယူအဆနဲ့ သူရှိသည်။ ဒါကိုဘယ်လို ပြင်ပနိုင်ငံကမှ ဝင်ရောက်စွက်ဖက် ဝေဖန်ပိုင်ခွင့်မရှိ။

လက်ရှိတွင်မူ အမီတာဘာချမ်းကဲ့သို့သော ဂန္ထဝင်မင်းသားကြီးနဲ့တကွ အောင်မြင်ကျော်ကြားသူများက သူတို့ရဲ့နိုင်ငံကို ဘားရတ်ဟု သတ်မှတ်လာသည်။

လက်ရှိအိန္ဒိယ အစိုးရကလည်း ဘားရတ်ဟူသော အသုံးအနှုန်းကို ကမ္ဘာ့ထိပ်သီးခေါင်းဆောင်များရဲ့ အစည်းအဝေးပွဲတွင် တရားဝင်ထုတ်ဖော် အသုံးပြုလာသည်။ အိန္ဒိယဟူသည် ကိုလိုနီတို့ သတ်မှတ်ပေးခဲ့သော အမည်ဖြစ်သည်ဟု သမိုင်းကြောင်းများနှင့်တကွ ဖော်ပြခဲ့ပြီးဖြစ်သည်။ အိန္ဒိယနိုင်ငံသည် သူ့ကျွန်ဘဝရောက်ခဲ့သည်မှာ ၁၈၅၈ ခုနှစ်မှ ၁၉၄၇ ခုနှစ်အထိတိုင် ဖြစ်သည်။

ယခုအခါ အိန္ဒိယနိုင်ငံသည် သူ့ကျွန်ဘဝမှ လွတ်မြောက်လာသည်မှာ နှစ်ပေါင်း ၇၆ နှစ်ကျော်လာပြီဖြစ်သော်လည်း ကိုလိုနီတို့ပေးခဲ့သည့် အိန္ဒိယဟူသည့် အမည်ကား ထင်ကျန်နေဆဲဖြစ်သည်။

ဒီလိုထင်ကျန်နေတဲ့ပုံရိပ်ကို    တစ်နည်းအားဖြင့် သူ့ကျွန်ဘဝကို အမှတ်ရနေစေမည့်   အိန္ဒိယဆိုသည့် အမည်ကို မျိုးရိုးစဉ်ဆက် ခေါ်ဝေါ်လာခဲ့သည့် ဘားရတ်ဆိုသည့် အမည်ဖြင့် အစားထိုးပြောင်းလဲရန် လုပ်ဆောင်လာခြင်းသည် နိုင်ငံတကာ အလယ်မှာ ကိုယ့်မင်းကိုယ့်ချင်း နိုင်ငံအဖြစ်ရပ်တည်ရန် ကြိုးပမ်းလာခြင်းဖြစ်သည်ဟုဆိုနိုင်သည်။

တစ်နည်းဆိုရလျှင် နိုင်ငံရဲ့အမည်ကို လွတ်လပ်ရေး ပေးလိုက်ခြင်းဖြစ်ပြီး အိန္ဒိယအစား ဘားရတ်ဟုခေါ်တွင်စေရန် အစိုးရကိုယ်၌က လုပ်ဆောင်လာခြင်းဖြစ်သည်။ ဒါကြောင့် လက်ရှိအစိုးရအဖွဲ့ရဲ့ လုပ်ဆောင်ချက်က နိုင်ငံရဲ့သမိုင်းကြောင်းအတွက် ကြီးမားသောပြောင်းလဲမှုကြီး တစ်ခုဖြစ်ပြီး နောင်တစ်ချိန် မိမိတို့ရဲ့ သားစဉ်မြေးဆက်များမှာ အိန္ဒိယအမည်အစား ဘားရတ်ဟူသောအမည်ကိုသာ အမှတ်ရနေတော့မည် ဖြစ်ပေသည်။     ။

Ref: RT

ထက်မြတ်