မိုင်းရယ် နိုဝင်ဘာ ၁၆
ရှမ်းပြည်နယ်(မြောက်ပိုင်း) လားရှိုးခရိုင် မိုင်းရယ်မြို့ ရပ်ကွက်(၃)၌ နိုဝင်ဘာ ၁၅ ရက် မွန်းလွဲပိုင်းက စိတ်ကြွရူးသွပ်ဆေးပြား နှစ်သောင်းကျော်နှင့် လက်ပစ်ဗုံးတစ်လုံး တို့ကို ဖမ်းဆီးရမိကြောင်းသိရသည်။
ဖြစ်စဉ်မှာ မိုင်းရယ်မြို့ ရပ်ကွက်(၃)၌နေထိုင်သူ ဦးလုံးအောင်၏ နေအိမ်သို့ ယမန်နေ့ မွန်းလွဲ ၁ နာရီက မိုင်းရယ်မြို့ နယ်ရဲတပ်ဖွဲ့၊ သတင်းတပ်ဖွဲ့နှင့်ပူးပေါင်း အဖွဲ့များကဝင်ရောက်ရှာဖွေရာ ဦးလုံး အောင် ၅၀ နှစ်၊ ၎င်း၏သားဖြစ်သူ ဆန်ဆာ ၂၅ နှစ်နှင့် မောင်စော ၂၅ နှစ်တို့ကို တွေ့ရှိရသည်။ နေအိမ်အတွင်းဆက်လက် ရှာဖွေရာ နေအိမ်အိပ်ခန်းအတွင်းရှိ အိပ်ရာပေါ်မှ Fashion Superstar စာတန်းပါ နီ/ဖြူ/နက်ကြား အနွေးထည်အင်္ကျီလက် ရှည်၏ ဝဲဘက်အိတ်ကပ်အတွင်းမှ အပြာ ရောင်ကပ်ခွာအိတ်ငယ်ဖြင့် ထည့်လျက် တစ်ထုပ်လျှင် WY စာတန်းပါ လိမ္မော်ရောင် စိတ်ကြွရူးသွပ်ဆေးပြား ၂၀၀ ပြားစီပါ နှစ်ထုပ်၊ နေအိမ်အိပ်ခန်း တံခါး ဝဲဘက်ခြမ်း သစ်သားတန်းပေါ်၌တင်ထားသည့် တရုတ် နိုင်ငံထုတ် အစိမ်းရောင်လက်ပစ်ဗုံးတစ်လုံး (ပင်တပ်လျက်)တို့ကို သိမ်းဆည်းရမိသည်။
ဆက်လက်၍ရှာဖွေစစ်ဆေးရာ နေအိမ်အနောက်ဘက် ပေ ၁၀၀ ခန့်အကွာ စိုက်ခင်းအတွင်း၌ မြေမြှုပ်သိမ်း ဆည်းထားသော အဝါရောင်ပလတ်စတစ်ပုံးဖြင့်ထည့်လျက် တစ်ထုပ်လျှင် ၂၀၀၀ ပြားစီပါ WY စာတန်းပါ စိတ်ကြွရူးသွပ်ဆေးပြား ၁၁ ထုပ် စုစု ပေါင်းအပြား ၂၂၀၀၀ ပြားကိုလည်းကောင်း၊ အမွှေးတိုင်အိတ်အစုတ် အတွင်း အပြာရောင်ကပ်ခွာ အိတ်ငယ်ဖြင့်ထည့်လျက် WY စာတန်းပါ လိမ္မော်ရောင်စိတ်ကြွရူးသွပ် ဆေးပြား ၁၉၀ ပြားပါ တစ်ထုပ်နှင့် ၂၀၀ ပြားတစ်ထုပ်တို့ကိုလည်းကောင်း၊ JIANGHE ဆပ်ပြာမှုန့်ထည့်သည့် ပလတ်စတစ် အိတ်အစုတ်ဖြင့်ထည့်ထားပြီး အပြာရောင် ကပ်ခွာအိတ်ငယ်ဖြင့်ထည့်ထားသည့် WY စာတန်းပါ လိမ္မော်ရောင်စိတ်ကြွရူးသွပ် ဆေးပြား ၂၀၀ ပြားစီပါ ငါးထုပ်ကိုလည်း ကောင်း စုစုပေါင်းစိတ်ကြွ ရူးသွပ် ဆေးပြား ၂၃၇၉၀ ပြား ကာလတန်ဖိုးငွေကျပ်တစ်ပြားလျှင် ၂၀၀၀ ကျပ်နှုန်းဖြင့် ငွေကျပ် ၄၇၅၈၀၀၀၀ ကို သိမ်းဆည်းရမိခဲ့သည်။
အဆိုပါဖြစ်စဉ်နှင့် ပတ်သက်၍ မူးယစ် ဆေးဝါးများကို ပြန်လည်ရောင်းချရန် လက်ဝယ်ထားရှိသည့်အပြင် လက်ပစ်ဗုံးတစ်လုံး ကိုပါလက်ဝယ်ထားရှိခဲ့ကြသူ ဦးလုံးအောင်၊ ဆန်ဆာနှင့် မောင်စောတို့သုံးဦးကို မိုင်းရယ် မြို့မရဲစခန်းက အမှုဖွင့်အရေးယူဆောင် ရွက်ထားကြောင်း သိရသည်။
ခင်မာလာ