တပ်မတော်ပင်လယ်သွားဆေးရုံရေယာဉ်(သံလွင်)သည် ငပုတောမြို့နယ်တွင်လည်းကောင်း၊ တပ်မတော်မြစ်တွင်းသွား ဆေးရုံရေယာဉ်(ရွှေပုဇွန်)နှင့် မြစ်ရေယာဉ်(စကု) တို့သည် အဖျောက်မြို့၊ မြို့ပေါ်ရပ်ကွက်များနှင့် ပတ်ဝန်းကျင်ကျေးရွာများတွင်လည်းကောင်း ဒေသခံ ပြည်သူများအား ကျန်းမာရေးစောင့်ရှောက်မှုလုပ်ငန်းများ ဆက်လက်ဆောင်ရွက်
နေပြည်တော်၊ ၂၀၂၃ နိုဝင်ဘာ - ၄
ရန်ကုန်တိုင်းဒေသကြီး၊ ကိုကိုးကျွန်းမြို့နယ်နှင့် ဧရာဝတီတိုင်းဒေသကြီး၊ ဟိုင်းကြီး ကျွန်းနှင့် အနီးပတ်ဝန်းကျင် ကျေးရွာများမှ ဒေသခံပြည်သူများနှင့် ရခိုင်ပြည်နယ် အတွင်းရှိ ကမ်းရိုးတန်းဒေသတစ်လျှောက်မှ ဒေသခံပြည်သူများအား ကျန်းမာရေး စောင့်ရှောက်မှု လုပ်ငန်းများ ဆောင်ရွက်ပေးရန် ထွက်ခွာလာသည့် တပ်မတော်နှင့် ကျန်းမာရေး ဝန်ကြီးဌာနတို့မှ ပါရဂူများ၊ ဆေးမှူးများနှင့် သူနာပြုများပါဝင်သော နယ်လှည့်အထူးကု ဆေးအဖွဲ့များ လိုက်ပါလာသည့် တပ်မတော်ပင်လယ်သွားဆေးရုံ ရေယာဉ်(သံလွင်)သည် ယနေ့တွင် ဧရာဝတီတိုင်းဒေသကြီး၊ ငပုတောမြို့နယ်၊ ကျုံကူးကျေးရွာ၌ အခြေပြု၍ ဒေသခံပြည်သူ ၁၀၆၅ ဦးအား ကျန်းမာရေးစောင့်ရှောက်မှု လုပ်ငန်းများ ဆက်လက် ဆောင်ရွက်ပေးသည်။
ထိုသို့ ဆောင်ရွက်ပေးရာတွင် ဆေးကုသမှုဆိုင်ရာရောဂါ ၃၄၀ ဦး၊ ခွဲစိတ်ရောဂါ ၈၇ ဦး၊ သားဖွား/ မီးယပ်ရောဂါ ၅၂ ဦး၊ ကလေးရောဂါ ၅၅ ဦး၊ အရိုးရောဂါ ၁၂၀ ဦး၊ နား/ နှာခေါင်း/ လည်ချောင်းရောဂါ ၆၅ ဦး၊ မျက်စိရောဂါ ၂၄၇ ဦးနှင့် သွားနှင့်ခံတွင်းရောဂါ ၉၉ ဦးတို့ကို လိုအပ်သည့် ဆေးဝါးကုသမှုများ ဆောင်ရွက်ပေးသည်။ ထို့အပြင် ခွဲစိတ်ကုသရန် လိုအပ်သူ အထွေထွေခွဲစိတ်လူနာ ၁၀ ဦး၊ မျက်စိခွဲစိတ်လူနာ ၁၄ ဦး၊ ဓာတ်မှန်ရိုက်လူနာ ၂၅ ဦး၊ အာထရာဆောင်းဖြင့် စမ်းသပ်စစ်ဆေးလူနာ ၅၀ ဦး၊ ECG စက်ဖြင့် နှလုံးစမ်း သပ်လူနာ ၃၄ ဦးနှင့် ဓာတ်ခွဲစမ်းသပ်လူနာ ၅၅ ဦးတို့ကို ရောဂါရှာဖွေစမ်းသပ် ကုသပေး ခြင်းများ ဆောင်ရွက်ပေးသည်။
ယင်းသို့ ဆောင်ရွက်ပေးနေမှုများကို ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်း၊ အနောက်တောင်တိုင်းစစ်ဌာနချုပ် တိုင်းမှူး ဗိုလ်မှူးချုပ် ဝေလင်းနှင့် တာဝန်ရှိသူများက လိုက်လံကြည့်ရှုအားပေးပြီး လိုအပ်သည်များ ညှိနှိုင်းဆောင်ရွက် ပေးကာ နယ်လှည့်အထူးကု ဆေးအဖွဲ့အတွက် ဆေးဝါးများ၊ ထောက်ပံ့ငွေများနှင့် စားသောက်ဖွယ်ရာများ ပေးအပ်သည်။
အလားတူ ဧရာဝတီတိုင်းဒေသကြီး၊ ဧရာဝတီမြစ်ကြောင်းတစ်လျှောက်ရှိ မြစ်ဝကျွန်းပေါ် နေမြို့နယ်၊ ရပ်ကွက်များနှင့် ပတ်ဝန်းကျင်ကျေးရွာများမှ ဒေသခံ ပြည်သူများအား ကျန်းမာရေး စောင့်ရှောက်မှုလုပ်ငန်းများ ဆောင်ရွက်ပေးရန်ရောက်ရှိ နေသော တပ်မတော်နှင့်ကျန်းမာရေးဝန်ကြီးဌာနတို့မှ ပါရဂူများ၊ ဆေးမှူးများနှင့် သူနာပြုများ ပါဝင်သော နယ်လှည့်အထူးကုဆေးအဖွဲ့များ လိုက်ပါလာသည့် တပ်မတော် မြစ်တွင်းသွား ဆေးရုံရေယာဉ်(ရွှေပုဇွန်)နှင့် မြစ်ရေယာဉ်(စကု)တို့သည့် ယနေ့တွင် အဖျောက်မြို့၊ လောကမာန်အောင်ဘုရားကြီး(မဟာသံတန်ဆောင်းတော်)၌ အခြေပြု၍ အဖျောက်မြို့ပေါ် ရပ်ကွက်များနှင့် ပတ်ဝန်းကျင်ကျေးရွာများမှ ဒေသခံပြည်သူ ၅၇၆ ဦးအား ကျန်းမာရေး စောင့်ရှောက်မှုလုပ်ငန်းများ ဆက်လက်ဆောင်ရွက်ပေးသည်။
ထိုသို့ ဆောင်ရွက်ပေးရာတွင် ဆေးကုသရေးအဖွဲ့က ဆေးကုသမှုဆိုင်ရာ ရောဂါ ၁၈၅ ဦး၊ ခွဲစိတ်ရောဂါ ၈၂ ဦး၊ သားဖွား/ မီးယပ်ရောဂါ ၁၁ ဦး၊ ကလေးရောဂါ ၂၀ ဦး၊ အရိုးရောဂါ ၁၁၅ ဦး၊ နား၊ နှာခေါင်း၊ လည်ချောင်းရောဂါ ၂၇ ဦး၊ မျက်စိရောဂါ ၉၉ ဦးနှင့် သွားရောဂါ ၃၇ ဦးတို့ကို လိုအပ်သည့် ဆေးဝါးကုသမှုများ ဆောင်ရွက်ပေးသည်။ ထို့အပြင် ခွဲစိတ်ကုသရန် လိုအပ်သူ အထွေထွေခွဲစိတ်လူနာ ၃ ဦး၊ ဓာတ်မှန်ရိုက်လူနာ ၄ ဦး၊ တယ်လီဗေးရှင်း ဓာတ်မှန်ရိုက်လူနာ ၂၈ ဦး၊ ECG စက်ဖြင့် နှလုံးစမ်းသပ်လူနာ ၁၃ ဦးနှင့် ဓာတ်ခွဲစမ်းသပ်လူနာ ၅ ဦးတို့ကို ရောဂါရှာဖွေစမ်းသပ် ကုသပေးခြင်းများ ဆောင်ရွက်ပေးသည်။
ယင်းသို့ ဆောင်ရွက်ပေးနေမှုများကို သက်ဆိုင်ရာတာဝန်ရှိသူများက သွားရောက် ကြည့်ရှု အားပေးပြီး လိုအပ်သည်များ ညှိနှိုင်းဆောင်ရွက်ပေးသည်။
တပ်မတော်ပင်လယ်သွားဆေးရုံ ရေယာဉ်(သံလွင်)၊ တပ်မတော်မြစ်တွင်း သွားဆေးရုံရေယာဉ်(ရွှေပုဇွန်)နှင့် မြစ်ရေယာဉ်(စကု)တို့မှ ကျန်းမာရေး ဆောင်ရွက်ပေး မှုအပေါ် ဒေသခံပြည်သူများ၏ စကားသံများကို ယခုလိုပဲကြားသိခဲ့ရပါတယ်-
မနော်ဟေမူးဖော ( ဒေသခံ ကျုံကူးရွာ)
သမီးက နှလုံးအောင့်တာ သုံးနှစ်ကျော်လောက်ရှိပါပြီ အခုက နယ်လှည့် ဆေးကုသရေးအဖွဲ့ကို လာပြတာပါ။ ရင်ထဲမှာ ပီတိလဲဖြစ်တယ်ပေါ့နော် ဒီလိုမျိုး ကုသမှုမျိုးလည်းမခံယူဗူး ဘူးလေ ဒါပထမဆုံးပဲ။ ပါရဂူကြီးတွေနဲ့ လာပြရတာ ပေါ့နော် ရောဂါလဲ သက်သာသွားပါတယ်။ အဆင်လည်းပြေတယ်ပေါ့နော်။ တပ်မတော်နယ်လှည့်ဆေးကုသရေးအဖွဲ့က အခုလိုလာရောက်ဆေးကုသပေး တော့ သမီးရင်ထဲမှာ အရမ်းဝမ်းသာပါတယ်။ သမီးတို့ရွာကိုလည်း ခနခနလာပြီး တော့ ဆေးကုသပေးစေချင်ပါတယ်။ သမီးတို့ရွာမှာ လူတွေအများကြီးရှိပါတယ် ပေါ့နော် ရောဂါသည်တွေလဲ အများကြီးပဲပေါ့။ အခုလိုမျိုး အခမဲ့လာကုသပေး တာလဲ ကျေးဇူးအများကြီး တင်ပါတယ်လို့။ အခုလိုစီစဉ်ပေးတဲ့ တပ်မတော်ကာ ကွယ်ရေးဦးစီးချုပ်နဲ့ တာဝန်ရှိသူအားလုံးကိုလည်း အထူးပဲ ကျေးဇူးတင်ရှိပါ တယ်။
ဦးစန်းမောင်( အမှတ်(၁)ရပ်ကွက်၊ အဖျောက်မြို့)
အဘအသက်က ၇၀ ရှိပါပြီ အရိုးအကြော ၊ အာရုံကြောအားနည်းတယ်ဆို လို့ ဒီကိုလာပြီးတော့ ပြသရခြင်းဖြစ်ပါတယ်။ ဆေးခန်းမှာ အဘပြတဲ့ အခါကြ တော့ ဒေါက်တာက အာရုံကြော အားနည်းတယ်ဆိုလို့ ဒေါက်တာ ရေးပေးတဲ့ ဆေးကိုပဲ အခုဝယ်ပြီး စားနေရပါတယ်။ အဘရောဂါက သုံးနှစ်လောက်ဖြစ်သွား ပြီ တပ်မတော် ဆေးကုသရေးအဖွဲ့ကနေပြီး အဖျောက်ကိုလာပြီးတော့ အခမဲ့ ဆေးကုသပေးတဲ့အတွက် လာရောက်ပြရခြင်းပဲ ဖြစ်ပါတယ်။ အဘပတ်ဝန်ကျင် မှာရှိတဲ့ ရောဂါဝေဒနာခံစားနေရတဲ့ ပုဂ္ဂိုလ်တွေလည်း ဒီမှာလာပြီးတော့ ဆေးကု သရေးအဖွဲ့ကိုသွားပြီးတော့ စေတနာကောင်းမွန်စွာနဲ့ သူတို့စမ်းသပ်စစ်ဆေးပေး တယ်ဆိုတဲ့အကြောင်းကို မျှဝေပေးချင်ပါတယ်။ ဒါကြောင့်မို့ အဘတို့လို မပြည့်စုံ တဲ့သူတွေ ရန်ကုန်ဆေးရုံဆေးခန်းကြီးတွေ မသွားနိုင်တဲ့အတွက် အခုလိုအခမဲ့ လာရောက်ကုသပေးတဲ့အတွက် တပ်မတော်ဆေးကုသရေးအဖွဲ့ကိုလည် အဘ အများကြီး ကျေးဇူးတင်ပါတယ်။