ဆီဗီလာအသင်းက လစ်လပ်နေသည့် အသင်းနည်းပြရာထူးအတွက် စပိန်လူမျိုးနည်းပြ တစ်ဦးဖြစ်သည့် နည်းပြဆန်းချက်ဇ်ကို ခန့်အပ်
ဆီဗီလာအသင်းက လစ်လပ်နေသည့် အသင်းနည်းပြ ရာထူးအတွက် စပိန်လူမျိုး နည်းပြ ဆန်းချက်ဇ်ကိုခန့်အပ်ကြောင်း အတည်ပြုကြေညာခဲ့သည်။
ဆီဗီလာအသင်းက ရလဒ်ဆိုးများ ဆက်တိုက် တွေ့ကြုံနေရသည့်အတွက် ဒီဇင်ဘာလ ၁၇ ရက်က စပိန်လာလီဂါပွဲစဉ်အဖြစ် ကစားသည့် ဂီတာဖေးလ် အသင်းကို ၃ ဂိုး -ဂိုးမရှိဖြင့်ရှုံးနိမ့်သည့် ပွဲစဉ်အပြီးတွင် နည်းပြ ဒီယေဂိုအလွန်ဆိုကို ရာထူးမှ ထုတ်ပယ်ခဲ့ခြင်း ဖြစ်သည်။
နည်းပြ ဒီယေဂိုအလွန်ဆိုသည် ဆီဗီလာအသင်းကို ပြီးခဲ့သည့် အောက်တိုဘာလက စတင်တာဝန်ယူ ကိုင်တွယ်ခဲ့သော်လည်း ရလဒ်ကောင်းများ ရရှိအောင် စွမ်းဆောင်နိုင်ခြင်းမရှိသည့်အတွက် နည်းပြရာထူးမှ ထုတ်ပယ်ခံခဲ့ရခြင်းဖြစ်သည်။
ဆီဗီလာအသင်းသည် အောက်တိုဘာလ ၈ ရက်က စပိန်လာလီဂါပွဲစဉ်အဖြစ် ကစားသည့် ဗယ်လ်ကာနို အသင်းနှင့် နှစ်ဂိုးစီသရေရလဒ် ထွက်ပေါ်ခဲ့သည့်ပွဲစဉ် အပြီးတွင် နည်းပြ မန်ဒီလီဘာကို ထုတ်ပယ်ပြီးနောက် နည်းပြ ဒီယေဂိုအလွန်ဆို ကို ခန့်အပ်ခဲ့သော်လည်း ရလဒ်များ ဆက်လက် ဆိုးရွားနေသည့်အတွက် ပြန်လည်ထုတ်ပယ်ခဲ့ခြင်းဖြစ်သည်။
အသက် ၅၈ နှစ်အရွယ် နည်းပြ ဆန်းချက်ဇ်သည် ပြီးခဲ့သည့်ဧပြီလက ဂီတာဖေးလ်အသင်း နည်းပြရာထူးမှ ထုတ်ပယ်ခံခဲ့ရပြီးနောက် ကလပ်အသင်း လက်မဲ့ဖြစ်နေရာမှ ယခုအခါ ဆီဗီလာအသင်း နည်းပြအဖြစ် ခန့်အပ်ခံခဲ့ရကြောင်း သိရသည်။