ONE Friday Fights 70 ပြိုင်ပွဲတွင် ထွန်းမင်းအောင် ဒိုင်ပွဲရပ်ဖြင့် အနိုင်ရ
နေပြည်တော် ဇူလိုင် ၁၂
ONE Championship အဖွဲ့အစည်းကစီစဉ်သည့် ONE Friday Fights 70 ပြိုင်ပွဲကို ဇူလိုင်လ ၁၂ ရက်က ထိုင်းနိုင်ငံ ဗန်ကောက်မြို့၌ကျင်းပရာ မြန်မာဖိုက်တာထွန်းမင်းအောင် အနိုင်ရရှိခဲ့သည်။
ထွန်းမင်းအောင်သည် ဗီယက်နမ်ဖိုက်တာ တူရန်ကွမ်ထရန်နှင့်ယှဉ်ပြိုင်ထိုးသတ်ခဲ့ပြီး တတိယအချီတွင် ဒိုင်ပွဲရပ်ဖြင့် အနိုင်ရခဲ့ခြင်းဖြစ်သည်။ ထွန်းမင်းအောင်သည် ONE Championship နှင့်လက်တွဲ အပြီး ပထမဆုံး ထိုးသတ်သည့်ပွဲတွင် အရေးနိမ့်ထား၍ ယခုပွဲရလဒ်မှာ အရေးပါနေသဖြင့် ပွဲစကတည်းက အကောင်းဆုံး ထိုးသတ်ခဲ့သည်။ နှစ်ဦးစလုံးလက်ရည်ကွာခြားမှုမရှိဘဲ တတိယအချီ ၁ မိနစ် ၁ စက္ကန့်တွင် ထွန်းမင်းအောင်၏ တံတောင်ရိုက်ချက်မိပြီး ဗီယက်နမ်ဖိုက်တာ ဆက်လက်မယှဉ်ပြိုင်နိုင်သဖြင့် ထွန်းမင်းအောင် အနိုင်ရခဲ့ ခြင်းဖြစ်သည်။ ထွန်းမင်းအောင်သည် ဒိုင်ပွဲရပ်ဖြင့် အနိုင်ရခဲ့သဖြင့် ONE Championship အဖွဲ့ CEO ချက်သရီဆစ်ယိုထောင်း ချီးမြှင့်သည့် အပိုဆုကြေး ဘတ်သုံးသိန်းခွဲ ရရှိခဲ့သည်။
ထွန်းမင်းအောင်သည် မြန်မာ့ရိုးရာလက်ဝှေ့ကျော် ထွန်းထွန်းမင်း၊ ONE Friday Fights ပြိုင်ပွဲများတွင် ထိုးသတ်နေသည့် မြန်မာဖိုက်တာ ထွန်းမင်းနိုင်(ခ) ဆူလိုင်မန်တို့၏ ညီအရင်းလည်းဖြစ်သည်။
သတင်း-ရှိုင်းထက်ဇော်
ဓာတ်ပုံ- ONE Championship