ကော့သောင်းနှင့် ကျိုင်းတုံမြို့တို့တွင် မူးယစ်ဆေးဝါးများ ဖမ်းဆီးရမိ
နေပြည်တော် ဇူလိုင် ၁၅
မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့မှတပ်ဖွဲ့ဝင်များ ပါဝင်သော ပူးပေါင်းအဖွဲ့သည် ဇူလိုင်လ ၁၄ ရက် ညနေ ၄ နာရီ ၄၅ မိနစ်တွင် ကျိုင်းတုံမြို့၊ ရပ်ကွက်(၁)၊ မြို့မစျေး အနောက်ဘက်တွင် စိန်မိ မောင်းနှင်ပြီး မဟာပို့၊ ကျော်ထွန်းနှင့်ရီဟွမ်ချင်တို့ လိုက်ပါလာသည့် TOYOTA ALPHARD အမျိုးအစား မော်တော်ယာဉ်ကို ရပ်တန့်စစ်ဆေးရှာဖွေရာ စိတ်ကြွရူးသွပ်ဆေးပြား ၁၆၈၀၀၀ ကိုလည်းကောင်း၊ စစ်ဆေးချက်အရ ည ၆ နာရီခွဲတွင် ကျိုင်းတုံမြို့နယ်၊ မိုင်းခွန်ကျေးရွာအုပ်စု၊ ကောင်းကန်ကျေးရွာရှိ ကျော်ထွန်း၏ နေအိမ်မှစိတ်ကြွရူးသွပ်ဆေးပြား ၃၀၀၀ ဆက်လက်သိမ်းဆည်း ရမိခဲ့ကြောင်း၊ ယင်းနေ့ည ၆ နာရီခွဲတွင် ကျိုင်းတုံမြို့နယ်၊ မိုင်းခွန်ကျေးရွာအုပ်စု၊ ကောင်းကန်ကျေးရွာအနီးတွင် ကျလောရှီး မောင်းနှင်ပြီး နိုးဝေလိုက်ပါလာသည့် မော်တော်ဆိုင်ကယ်ကို ရပ်တန့်စစ်ဆေးရှာဖွေရာ စိတ်ကြွရူးသွပ်ဆေးပြား ၂၀၀၀၀ ကိုလည်းကောင်း၊ ထိုနေ့ မွန်းတည့် ၁၂ နာရီတွင် ကော့သောင်းမြို့၊ ရွှေပြည်သာရပ်ကွက်၊ မြို့ပတ်(၂) လမ်းတွင် စောမင်းဌေး မောင်းနှင်ပြီး မဇင်မာဖြိုး(ခ)ဘဲဥ လိုက်ပါလာသည့် မော်တော်ဆိုင်ကယ်ကို ရပ်တန့်စစ်ဆေးရှာဖွေရာ စိတ်ကြွရူးသွပ်ဆေးပြား ၃၉ဝဝကို လည်းကောင်း၊ ကွင်းဆက်အရ မွန်းလွဲ ၁ နာရီ ၅ မိနစ်တွင် စိတ်ကြွရူးသွပ်ဆေးပြားများ သယ်ဆောင်ခိုင်းသူ မလှိုင်စံပယ်(ခ)နိုနိုအား ကော့သောင်းမြို့၊ ပိတောက်ရွှေဝါရပ်ကွက်ရှိ ၎င်း၏နေအိမ်တွင် ဆက်လက်ဖမ်းဆီး ရမိခဲ့သဖြင့် ၎င်းတို့အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားကြောင်း သိရသည်။