ရီးယဲလ်မက်ဒရစ်အသင်းက အသစ်ခေါ်ယူထားသည့် လူငယ်တိုက်စစ် ကစားသမား အန်းဒရစ်နှင့် မိတ်ဆက်ပွဲပြုလုပ်ခဲ့ပြီး အသင်းတွင် ကျောနံပါတ်(၁၆)ကို ဝတ်ဆင်ကစားမည်ဖြစ်ကြောင်း အတည်ပြု
ရီးယဲလ်မက်ဒရစ်အသင်းက လက်ရှိနွေရာသီ ကစားသမား အပြောင်းအရွှေ့ကာလတွင် အသစ်ခေါ်ယူထားသည့် လူငယ်တိုက်စစ်ကစားသမား အန်းဒရစ်နှင့် မိတ်ဆက်ပွဲပြုလုပ်ပြီး အသင်းတွင် ကျောနံပါတ်(၁၆)ကို ဝတ်ဆင် ကစားမည်ဖြစ်ကြောင်း အတည်ပြုခဲ့သည်။
ဘရာဇီးအသင်း လူငယ်ကြယ်ပွင့် ကစားသမားများကို ခေါ်ယူလေ့ရှိသည့် ရီးယဲလ်မက်ဒရစ်အသင်းသည် ယခုအခါ ဘရာဇီးကြယ်ပွင့် ကစားသမားတစ်ဦး ဖြစ်သော ပါးမီးယက်စ်အသင်းမှ လူငယ်တိုက်စစ် ကစားသမား အန်းဒရစ်ကို လက်ရှိနွေရာသီကစားသမား အပြောင်းအရွှေ့ ကာလတွင် ခေါ်ယူခဲ့သည်။
အသက် ၁၈ နှစ်အရွယ် အန်းဒရစ်သည် ပါးမီးယက်စ် အသင်းအကယ်ဒမီထွက် ကစားသမား တစ်ဦးဖြစ်ပြီး ၂၀၂၂ ခုနှစ်က ပါးမီးယက်စ်အသင်းနှင့် လက်တွဲခဲ့ကာ ပြီးခဲ့သည့် ဘောလုံးရာသီက ပါးမီးယက်စ်အသင်းနှင့် အတူ အကောင်းဆုံး ခြေစွမ်းပြနိုင်ပြီးနောက် ရီးယဲလ်မက်ဒရစ်အသင်းက ဇန်နဝါရီလ အပြောင်းအရွှေ့ ကာလကတည်းက ခေါ်ယူရန် သဘောတူညီမှုရရှိခဲ့သော်လည်း လက်ရှိနွေရာသီ ကစားသမားအပြောင်း အရွှေ့ကာလမှသာ ခေါ်ယူနိုင်ခြင်းဖြစ်သည်။ အစောပိုင်းက အသင်းတွင် ကာမာဗင်ဂါက ကျောနံပါတ်(၁၆) ဝတ်ဆင်ရာမှ ကျောနံပါတ်(၁၂)ကို ပြောင်းလဲ ဝတ်ဆင်ခဲ့သည့်အတွက် အန်းဒရစ်က ကျောနံပါတ်(၁၆)ကို ဝတ်ဆင် ကစားမည်ဖြစ်ကြောင်း သိရသည်။