မြန်မာနေရှင်နယ်လိဂ် အနေဖြင့် ၂၀၂၁ ခုနှစ် ဘောလုံးရာသီသစ်တွင် လူငယ်လိဂ်ပြိုင်ပွဲကို အသက် ၂၁ နှစ်အောက် ပြိုင်ပွဲတစ်ခုသာကျင်းပမည်ဖြစ်ကြောင်း လိဂ်ကော်မတီ၏ သတင်းထုတ်ပြန်ချက်အရ သိရသည်။
ပြီးခဲ့သည့်ဘောလုံးရာသီက မြန်မာနေရှင်နယ်လိဂ်သည် ယူ-၂၁ နှင့် ယူ-၁၉ လူငယ်လိဂ်ပြိုင်ပွဲနှစ်ခု ကျင်းပနိုင်ခဲ့သော် လည်း ကလပ်အသင်းများ၏ ဘဏ္ဍာရေး အခြေအနေကြောင့် ယူ-၁၉ လိဂ်ကို ဆက်လက် ကျင်းပနိုင်ခြင်းမရှိဘဲ ယူ-၂၁ လူငယ် လိဂ်ပြိုင်ပွဲတစ်ခုသာ ကျင်းပရန်စီစဉ်ခြင်း ဖြစ်သည်။
ဒီဇင်ဘာ ၃ ရက်ကပြုလုပ်ခဲ့သည့် မြန်မာနေရှင်နယ်လိဂ်ကော်မတီ အစည်းအဝေး၌ လူငယ်လိဂ်နှင့်ပတ်သက်၍ ဆွေးနွေးခဲ့ပြီး လူငယ်ကစားသမားများ ဝင်ရောက်ယှဉ်ပြိုင်မည့် လူငယ်လိဂ်ပြိုင်ပွဲတစ်ရပ်ကို မဖြစ်မနေကျင်းပရန် စီစဉ်ခဲ့ကာ ကလပ်အသင်းများ၏ သဘောတူညီချက်အရ ယူ-၂၁ လူငယ်လိဂ်ပြိုင်ပွဲကိုသာ ကျင်းပရန် ဆုံးဖြတ်ခဲ့ခြင်း ဖြစ်သည်။
လာမယ့်နှစ်မှာ ဘဏ္ဍာရေးအခြေအနေ အရ လူငယ်လိဂ်ပြိုင်ပွဲနှစ်ခု ကျင်းပဖို့ မဖြစ်နိုင်တဲ့အတွက် ယူ-၂၁ လူငယ်လိဂ်ပြိုင်ပွဲတစ်ခုပဲ ကျင်းပဖို့ဆုံးဖြတ်ခဲ့တာပါ။
လာမယ့်နှစ်မှာ ဆီးဂိမ်းရှိတဲ့အတွက် ကစားသမားရွေးချယ်နိုင်ဖို့ ယူ-၂၁ လူငယ်လိဂ်ကိုတော့ မဖြစ်မနေကျင်းပဖို့ အားလုံးက ဆုံးဖြတ်ခဲ့ကြတာပါ။ ကျင်းပမယ့်ကာလကို အတိအကျ မသတ်မှတ်ရသေးပါဘူး။
ဇန်နဝါရီလဆန်းပိုင်းမှာ ပြုလုပ်မယ့် လိဂ်ကော်မတီအစည်းအဝေးမှာ ယူ-၂၁ လူငယ်လိဂ်ပြိုင်ပွဲစတင်မယ့် ကာလကိုပါ ဆွေးနွေးအတည်ပြုမှာပါဟု မြန်မာနေရှင်နယ်လိဂ် မီဒီယာတာဝန်ခံ ဦးရဲမင်းဝင်းက ပြောသည်။
မြန်မာနေရှင်နယ်လိဂ်သည် ၂၀၂၀ ဘောလုံးရာသီမှစ၍ လူငယ်လိဂ်ပုံစံကို လိဂ်-၁ နှင့် လိဂ်-၂ ကလပ်အသင်းအားလုံး ပါဝင်သည့်လိဂ်အဖြစ် ပြောင်းလဲကာ ယူ-၁၉ နှင့် ယူ-၂၁ လူငယ်လိဂ်ပြိုင်ပွဲများ ကျင်းပခဲ့ခြင်း ဖြစ်ကြောင်း သိရသည်။
ကိုရဲ