လားရှိုးနှင့် ဖြူးမြို့နယ်တို့တွင် မူးယစ်ဆေးဝါးများ ဖမ်းဆီးရမိ
နေပြည်တော် မေ ၆
ရှမ်းပြည်နယ်ရဲတပ်ဖွဲ့မှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် မေလ ၄ ရက် နံနက် ၈ နာရီခွဲတွင် လားရှိုးမြို့၊ ရပ်ကွက်(၇)၊ နယ်မြေ(၁၉)၊ စစ်တောင်းလမ်းရှိ လနူး၏ နေအိမ်ကိုဝင်ရောက်ရှာဖွေရာ နေအိမ်အတွင်းမှ စိတ်ကြွရူးသွပ်ဆေးပြား ၃၀၀၀၀၊ ဘိန်းဖြူ သုည ဒသမ ၃၉၆ ကီလိုနှင့် မြန်မာငွေကျပ် ၁၁ ဒသမ ၃ သိန်းကိုလည်းကောင်း၊ ထိုနေ့နံနက် ၁၀ နာရီတွင် လားရှိုးမြို့၊ ရပ်ကွက် (၇)၊ နယ်မြေ(၁)၊ ပင်လုံလမ်းရှိ နေအိမ်ကို ဝင်ရောက်ရှာဖွေရာ လှဝင်း(ခ)လီကွမ်းရောင်ကို စိတ်ပြောင်းဆေးဝါးများ ဖြစ်သည့် Happy Water ၇ ဒသမ ၁ ကီလို၊ ကက်တမင်း ၄ ဒသမ ၃၂ ကီလို၊ အက်တစီဆေး ၁၂ ပြား၊ Happy-5 ဆေးပြား ၁၅၄၀ နှင့် စိတ်ပြောင်းဆေးဝါးများ ထုတ်လုပ်ရာတွင် အသုံးပြုသည့် ဆက်စပ် ပစ္စည်းများ ကိုလည်းကောင်း၊ ယင်းနေ့ နံနက် ၁၁ နာရီခွဲတွင် လားရှိုးမြို့နယ်၊ မန်အိုင် ကျေးရွာ အုပ်စု၊ မန်အိုင်ကျေးရွာရှိ ဖန်ယူချွန်၏နေအိမ်ကို ဝင်ရောက်ရှာဖွေရာ ဘိန်းဖြူ ၁ ဒသမ ၀၈၉ ကီလို၊ စိတ်ကြွ ရူးသွပ်ဆေးပြား ၆၀၀၀ နှင့် မြန်မာငွေကျပ် ၂ ဒသမ ၅ သိန်းကိုလည်းကောင်း။
မေလ ၅ ရက် ညနေ ၃ နာရီတွင် ဖြူးမြို့နယ်၊ မင်းဂံရိုးကျေးရွာအုပ်စု၊ ဒိုင်းတရာကျေးရွာအနီးတွင် မင်းသန့်မွန်(ခ)အရှည်ကြီးမောင်းနှင်လာသည့် TOYOTA BELTA အမျိုးအစား မော်တော်ယာဉ်ကို ရပ်တန့် စစ်ဆေးရှာဖွေရာ စိတ်ကြွရူးသွပ်ဆေးပြား ၂၀၀၀၀ သိမ်းဆည်းရမိခဲ့သဖြင့် ၎င်းတို့အား စိတ်ကို ပြောင်းလဲ စေသော ဆေးဝါးများဆိုင်ရာ ဥပဒေအရ အရေးယူထားကြောင်း သိရသည်။
(ရဲပြန်ကြား)