အက်စ်တွန်ဗီလာအသင်းက အဓိကဂိုးသမား မာတီနက်ဇ်ကို ၂၀၂၉ ခုနှစ် ဇွန်လအထိ သက်တမ်းတိုး စာချုပ်ချုပ်ဆို
လန်ဒန် ဩဂုတ် ၂၂
အက်စ်တွန်ဗီလာအသင်းက အဓိက ဂိုးသမားမာတီနက်ဇ်ကို ၂၀၂၉ ခုနှစ် ဇွန်လအထိ သက်တမ်းတိုး စာချုပ်ချုပ်ဆိုနိုင်ခဲ့ကြောင်း အတည်ပြုကြေညာခဲ့သည်။
အသက် ၃၁ နှစ်အရွယ် ဂိုးသမား မာတီနက်ဇ်သည် အာဆင်နယ်အသင်းတွင် ပွဲထွက်ခွင့်မရရှိသည့်အတွက် ၂၀၂၀ ပြည့်နှစ်က အာဆင်နယ်အသင်းမှ အက်စ်တွန်ဗီလာအသင်းသို့ ပြောင်းရွှေ့ကစားခဲ့သူဖြစ်သည်။
မာတီနက်ဇ်သည် အက်စ်တွန်ဗီလာအသင်းသို့ ပြောင်းရွှေ့ကစားပြီးနောက် အသင်းနှင့်အတူ ဘောလုံး ရာသီတိုင်းတွင် အဓိကဂိုးသမားအဖြစ် ပွဲထွက်ခွင့် ရရှိခဲ့ပြီး ၂၀၂၃- ၂၀၂၄ ဘောလုံးရာသီက ပရီးမီးယား လိဂ်ပြိုင်ပွဲတွင် အက်စ်တွန်ဗီလာအသင်း အဆင့် (၄)နေရာ၌ ရပ်တည်နိုင်ခဲ့ပြီး ချန်ပီယံလိဂ်ပြိုင်ပွဲဝင်ခွင့် ရရှိခဲ့ရာတွင် အဓိက ဂိုးသမားအဖြစ် ပါဝင်ခဲ့သူဖြစ်သည်။
ထို့ပြင် မာတီနက်ဇ်သည် ၂၀၂၂ ကမ္ဘာ့ဖလားပြိုင်ပွဲနှင့် ၂၀၂၄ ကိုပါအမေရိကဖလားပြိုင်ပွဲတို့တွင်လည်း အာဂျင်တီးနားအသင်း ချန်ပီယံဆုဖလားများ ဆွတ်ခူးနိုင်ခဲ့ရာ၌ အဓိကဂိုးသမားအဖြစ် ပါဝင်ခဲ့ပြီး အကောင်းဆုံး လက်စွမ်းပြနိုင်ခဲ့သည်။ ယခုအခါ ဂိုးသမား မာတီနက်ဇ်ကို အက်စ်တွန်ဗီလာအသင်းက စာချုပ်သက်တမ်း တစ်နှစ်သာ ကျန်ရှိတော့သည့် အတွက် ၂၀၂၉ ခုနှစ် ဇွန်လအထိ သက်တမ်းတိုး စာချုပ်ချုပ်ဆိုခဲ့ခြင်း ဖြစ်ကြောင်း သိရသည်။
Ref;Goal.com