MNL League Cup 2024 ပြိုင်ပွဲ အုပ်စု(B)တွင် ရှမ်းယူနိုက်တက်အသင်းနိုင်ပွဲရရှိခဲ့ပြီး ကချင် ယူနိုက်တက်နှင့် Glory Goal အသင်းတို့ သရေရလဒ်ထွက်ပေါ်
ရန်ကုန် မေ ၂၀
မြန်မာနိုင်ငံဘောလုံးအဖွဲ့ချုပ် မြန်မာနေရှင်နယ်လိဂ်ကော်မတီက ကြီးမှူးကျင်းပလျက်ရှိနေသည့် MNL League Cup 2024 ပြိုင်ပွဲ အုပ်စု(B) အုပ်စုနောက်ဆုံးပွဲစဉ်များကို ယနေ့ညနေပိုင်းတွင် ယှဉ်ပြိုင် ကစားခဲ့ရာ ရှမ်းယူနိုက်တက်အသင်း နိုင်ပွဲရရှိခဲ့ပြီး ကချင်ယူနိုက်တက်အသင်းနှင့် Glory Goal အသင်းတို့ တစ်ဂိုးစီ သရေရလဒ် ထွက်ပေါ်ခဲ့ကြောင်း သိရသည်။
MNL League Cup 2024 ပြိုင်ပွဲ အုပ်စု(B)ပွဲစဉ်များအဖြစ် ယနေ့ ညနေ ၄ နာရီတွင် YUSC အားကစား ကွင်း၌ ကချင်ယူနိုက်တက်အသင်းနှင့် Glory Goal အသင်းကစားခဲ့ရာ တစ်ဂိုးစီသရေ ရလဒ်ထွက် ပေါ်ခဲ့ပြီး Glory Goal အသင်းအတွက် သွင်းဂိုးကိုပွဲချိန် ၈၃ မိနစ်တွင် ဖူးခန့်ကျော်နှင့် ကချင်ယူနိုက် တက်အသင်းအတွက် သွင်းဂိုးကိုပွဲချိန် ၉၁ မိနစ်တွင် သန်းဇော်ဟိန်းတို့က သွင်းယူပေး နိုင်ခဲ့သည်။
အလားတူ ညနေ ၄ နာရီတွင် သုဝဏ္ဏအားကစားကွင်း၌ ရှမ်းယူနိုက်တက်အသင်းနှင့် ရခိုင်ယူနိုက်တက် အသင်းတို့ကစားခဲ့ရာ ထိပ်တန်းအသင်းကြီး နှစ်သင်းတွေ့ဆုံသည့် ပွဲစဉ်ဖြစ်သည်နှင့်အညီ အကြိတ် အနယ် ရှိခဲ့ပြီး ရှမ်းယူနိုက်တက်အသင်းက တစ်ဂိုး ဂိုးမရှိဖြင့် အနိုင်ရရှိခဲ့ကာ ရှမ်းယူနိုက်တက် အသင်းအတွက် တစ်လုံးတည်းသော သွင်းဂိုးကို ပွဲချိန် ၁၀ မိနစ်တွင် ဘာကာယိုကိုက သွင်းယူပေးနိုင် ခဲ့သည်။
MNL League Cup 2024 ပြိုင်ပွဲ အုပ်စု(C)ပွဲစဉ်များအဖြစ် မေလ ၂၁ရက် ညနေ ၃ နာရီ ၄၅ မိနစ်တွင် ပဒုမ္မာအားကစားကွင်း၌ ဧရာဝတီယူနိုက်တက်အသင်းနှင့် ဒဂုံပေါ့အသင်း၊ ညနေ ၄ နာရီ YUSC အားကစား ကွင်းတွင် ဟံသာဝတီယူ နိုက်တက်အသင်းနှင့် ဒဂုံစတားအသင်း၊ အုပ်စု(D)ပွဲစဉ်များ အဖြစ် ညနေ ၄ နာရီ တက္ကသိုလ်အားကစား ကွင်းတွင် ရတနာပုံအက်ဖ်စီအသင်းနှင့် သစ္စာအားမာန် အသင်း၊ ညနေ ၄ နာရီ သုဝဏ္ဏအားကစားကွင်းတွင် ISPE အသင်းနှင့် မြဝတီအသင်းတို့ ဆက်လက် ကစားသွားမည်ဖြစ်ကြောင်း သိရသည်။
စည်သူအောင်