ပိန်သူတွေအတွက် အသားဓာတ်တိုးစေမယ့် အစားအစာများ
လူ့သဘောသဘာဝအရ ပိန်တဲ့သူက ဝချင်တယ်။ ဝတဲ့သူကပိန်ချင်ကြတယ်။ ကျန်းမာရေးရှုထောင့်က ကြည့်မယ်ဆိုရင် ပိန်လွန်းရင်လည်း မကောင်းသလို ဝလွန်းရင်လည်း မကောင်းပါဘူး။ ဝတဲ့သူတွေ အတွက် ကိုယ်အလေးချိန် လျှော့ချနိုင်မယ့် လေ့ကျင့်ခန်းတွေ၊ အစားအသောက်တွေကို ကျန်းမာရေးဗဟုသုတ အဖြစ် မကြာခဏဖော်ပြလေ့ရှိပေမယ့် ပိန်တဲ့သူတွေအတွက် အသားဓာတ်တိုး စေမယ့် အစားအသောက်တွေ အကြောင်းကို ပညာပေးမျှဝေသူနည်းတာကြောင့် အခုလို အကြံပြု ရေးသားလိုက်ပါတယ်။
ထမင်းစားသင့်ပါတယ်။ နေ့စဉ်စားသုံးနေတဲ့ ထမင်းက ကိုယ်အလေးချိန်တက်ဖို့ အတွက်လည်း ကူညီပေးတယ်။ ထမင်း ၁၀၀ ဂရမ်စားပေးရင် ကယ်လိုရီက ၁၃၀ အထိ တက်လာနိုင်ပါတယ်။ ပုံမှန်စားသုံး တဲ့ပမာဏထက် အနည်းငယ်ပိုပြီးစားသုံးခြင်းက ကိုယ်အလေးချိန်တက်အောင် ကူညီပေးပါတယ်။ ထမင်းစားခြင်းကြောင့် ကိုယ်အလေးချိန်တက်လာတာက ဆန်အမျိုးအစားနဲ့ ဆန်ထဲမှာ အမျှင်ဓာတ်ပါဝင်မှု ပေါ်မူတည်ပြီး ပြောင်းလဲမှုရှိပါတယ်။ နောက်တစ်ခုက ကိုယ့်ခန္ဓာကိုယ်က အသုံးပြုလိုက်တဲ့ ကယ်လိုရီထက်ပိုပြီး စားသုံးမှသာ ကိုယ်အလေးချိန်တက်စေမှာ ဖြစ်ပါတယ်။
ကယ်လိုရီရရှိမှုက အဖြူရောင်ဆန်နဲ့အညိုရောင်ဆန်ဆိုပြီး ကွာခြားမှုရှိပါတယ်။ အဖြူရောင် ဆန်နို့ဆီဘူး တစ်ဘူးချက်ရင် ၂၀၅ ကယ်လိုရီရရှိပြီး အညိုရောင်ဆန် နို့ဆီဘူးတစ်ဘူးချက်ရင် ကယ်လိုရီ ၂၂၀ အထိ ရရှိစေတယ်။ အမျှင် ဓာတ်ပါဝင်တဲ့ အစားအစာကို စားသုံးခြင်းက ကိုယ်အလေးချိန်အတွက် သာမက ဆီးချိုနဲ့နှလုံးရောဂါ ဖြစ်နိုင်ခြေကိုလည်း လျှော့ချပေးပါတယ်။
မြေပဲယိုသုတ်ထားတဲ့ ပေါင်မုန့်စား သင့်ပါတယ်။ မြေပဲနဲ့ပြုလုပ်တဲ့မုန့်တွေက အရသာရှိသလို အသားဓာတ် ပါဝင်မှုလည်း များပါတယ်။ မြေပဲယိုသုတ်ထားတဲ့ပေါင်မုန့်တစ်ချပ်မှာ ကယ်လိုရီ ၂၀၀ ပါဝင်ပါတယ်။ အစာစားတဲ့အချိန်တိုင်း စားသုံးပေးမယ်ဆိုရင်လည်း ကိုယ်အလေးချိန်ကိုလျင်မြန်စွာတက်လာစေပါတယ်။ ဒါပေမဲ့ တစ်နေ့ကို ထမင်းစားဇွန်းခြောက်ဇွန်းထက် ပိုပြီးမစားသင့်ပါဘူး။ ကိုယ့်ခန္ဓာကိုယ်မှာ မလိုတဲ့အဆီတွေ ဖြစ်ပေါ်လာ နိုင်ပါတယ်။
တူနာငါးစားသင့်ပါတယ်။ ကိုယ်အလေးချိန်တက်အောင် ပြုလုပ်တဲ့အချိန်မှာ ကိုယ့်ရဲ့ကျန်းမာရေးကိုလည်း မေ့ထားလို့မရပါဘူး။ တူနာငါးက ကိုယ်အလေးချိန်တက်စေပြီး ကျန်းမာရေးကိုလည်း ကောင်းမွန် စေပါတယ်။ တူနာငါးမှာ ခန္ဓာကိုယ်အတွက် မရှိမဖြစ်လိုအပ်တဲ့ အသားဓာတ်၊ ဖက်တီး အက်စစ်နဲ့ အဆီတို့ပါဝင်ပါတယ်။ တူနာငါးက ခန္ဓာကိုယ်အတွက် လိုအပ်တဲ့ ကယ်လိုရီနဲ့ အသားဓာတ်ကိုလည်း လျင်မြန်စွာ ရရှိစေနိုင် ပါတယ်။ တူနာငါးက အသားဓာတ်နဲ့ သတ္တုဓာတ်ကြွယ်ဝတာကြောင့် ကြွက်သားတွေကို လျင်မြန်စွာ ကြီးထွားဖွံ့ဖြိုးစေပါတယ်။ တူနာငါးက ခန္ဓာကိုယ်အတွက် မလိုအပ်တဲ့ အဆီတွေ ကိုလည်း မဖြစ်ပေါ် စေနိုင်တာကြောင့် စားသုံးဖို့ သင့်တော်ပါတယ်။
မလိုင်အပြည့်ပါတဲ့ နွားနို့သောက်သုံး သင့်ပါတယ်။ ခန္ဓာကိုယ်အလေးချိန်တက် ချင်သူတွေအတွက် မလိုင်ထုတ်ပြီးသား နွားနို့သောက်ခြင်းထက် မလိုင်အပြည့်ပါ တဲ့နွားနို့ သောက်သင့်ပါတယ်။ မလိုင် အပြည့်ပါတဲ့နွားနို့က ကယ်လိုရီ ၉၀ ပါဝင် တဲ့အပြင် ခန္ဓာကိုယ်အတွက် မရှိမဖြစ်လိုအပ်တဲ့ဗီတာမင်နဲ့ သတ္တုဓာတ်တွေ ပါဝင်ပါတယ်။ နွားနို့သောက်တာက အရိုးအဆစ်တွေကို သန်မာစေတဲ့အပြင် ကိုယ်ခံ စွမ်းအားကိုလည်း တိုးတက်ကောင်းမွန်စေပါတယ်။
ကြက်ဥကိုလည်း ပုံမှန်စားသုံးသင့်ပါတယ်။ ကြက်ဥကို အစိမ်းသောက်ရမယ် လို့မဆိုလိုပါဘူး။ ကြက်ဥမွှေကြော် ဒါမှမဟုတ် ကြက်ဥပြုတ်ကိုစားခြင်းက ကြွက်သားဖွံ့ဖြိုးမှုကို ကူညီပေးတဲ့ပရိုတင်း၊ ကိုလင်း(Protein၊ choline)စတဲ့ အာဟာရ ဓာတ်တွေရရှိစေပါတယ်။ ကြက်ဥတစ်လုံး မှာ ၇၂ ကယ်လိုရီပါဝင်ပါတယ်။ ကယ်လိုရီ ပါဝင်မှုက ကြက်ဥအရွယ်အစားပေါ် မူတည်ပြီး ကွာခြားမှုရှိပါတယ်။
ကြက်ဥကို တစ်နေ့သုံးလုံး စားသုံးခြင်းက ကျန်းမာရေးအတွက် အထူးကောင်းမွန်စေပါတယ်။
အနီရောင်ရှိတဲ့အသား စားသုံးသင့် ပါတယ်။ ကိုယ်က ခန္ဓာကိုယ်နဲ့ ကြွက်သား ဖွံ့ဖြိုးအောင် တည်ဆောက်နေသူဆိုရင်တော့ အမဲသား၊ ဆိတ်သား၊ သိုးသား စတဲ့ အနီရောင်အသားတွေကို စားသုံးဖို့လိုအပ် ပါတယ်။ အဲဒီလိုအသားတွေမှာ အဆီဓာတ်လည်း ပါဝင်တာကြောင့် လိုတာထက် ပိုပြီးစားသုံးဖို့တော့ မသင့်ပါဘူး။ မလိုအပ် တဲ့အဆီတွေက ခန္ဓာကိုယ်အတွက် ဆိုးကျိုးဖြစ်ပေါ်စေပါတယ်။
သစ်သီးစားသုံးသင့်ပါတယ်။ သစ်သီး စားခြင်းက ကျန်းမာရေးအတွက် အထောက်အကူဖြစ်စေပြီး ကိုယ် အလေးချိန်တက်အောင်လည်း ကူညီ ပေးပါတယ်။ သရက်သီး၊ ငှက်ပျောသီး နဲ့ နာနတ်သီးတွေက စားသုံးဖို့အသင့် တော်ဆုံးဖြစ်ပါတယ်။ အသီးတွေမှာ သဘာဝသကြားဓာတ်ပါဝင်ပြီး ခန္ဓာကိုယ် အတွက်လိုအပ်တဲ့စွမ်းအင်တွေကို ပေးစွမ်း နိုင်ပါတယ်။ ကိုယ်ခံစွမ်းအားကိုတိုးစေတဲ့ အတွက် ရောဂါဖြစ်ခြင်းကနေ ကာကွယ် ပေးတဲ့အပြင် ကိုယ်အလေးချိန်တက် အောင်လည်း ကူညီပေးပါတယ်။
ဒိန်ခဲစားသုံးသင့်ပါတယ်။ ဒိန်ခဲက အရသာရှိတဲ့ အစားအစာတစ်မျိုးဖြစ်ပြီး တခြားအစားအစာတွေနဲ့လည်း တွဲဖက် စားသုံးလို့ရပါတယ်။ သဘာဝနို့ထွက်အစားအစာဖြစ်တဲ့ဒိန်ခဲက အဆီဓာတ် ပါဝင်မှု ကြွယ်ဝတာကြောင့် ခန္ဓာကိုယ် အလေးချိန်တက်ချင်သူတွေ စားသုံးသင့် ပါတယ်။ ဒိန်ခဲမှာ အသားဓာတ်လည်း ပါဝင်တာကြောင့် ကြွက်သားဖွံ့ဖြိုးမှုကို လည်း အထောက်အကူပြုပါတယ်။
အာလူးစားပေးသင့်ပါတယ်။ ခန္ဓာကိုယ် အလေးချိန်တက်ချင်သူတွေက ကာဗိုဟိုက်ဒရိတ် (Carbohydrate) ပါဝင်တဲ့ အစားအစာတွေကိုလည်း စားသုံးသင့်ပါတယ်။ ကာဗိုဟိုက်ဒရိတ်ပါတဲ့ အစားအသောက်တွေ ထဲကနေ ရွေးချယ်မယ်ဆိုရင် အာလူးက အသင့်တော်ဆုံး ဖြစ်ပါတယ်။ ဘာကြောင့်လဲဆိုရင် အာလူး မှာ အသားဓာတ်၊ အမျှင်ဓာတ်နဲ့ဗီတာမင် စီတို့ပါဝင်တဲ့အတွက်ကြောင့် ဖြစ်ပါတယ်။
တချို့က မွေးရာပါပိန်ကြပါတယ်။ သူတို့ရဲ့ ဇီဝကမ္မဖြစ်စဉ်မြန်တဲ့ အတွက်ကြောင့် ကိုယ်အလေးချိန် တက်အောင် ပြုလုပ်ဖို့ ခက်ခဲနိုင်ပါတယ်။ ပုံမှန်အနေနဲ့ကိုယ်အလေးချိန်နည်းသူတွေက ရောဂါ ဝင်ရောက်လွယ်ပြီး တစ်ခုခုဆိုရင် ကိုယ်တွင်းအင်္ဂါကိုလည်း ထိခိုက်နိုင်ပါ တယ်။ အမျိုးသမီးတွေမှာဆိုရင် ဓမ္မတာ ပုံမှန်မလာခြင်းနဲ့ အရိုးပွရောဂါတို့ဖြစ် နိုင်ခြေများပါတယ်။
လူတိုင်း ကိုယ်အလေးချိန်အချိုးအဆ ဘီအမ်အိုင်(၁၈.၉-၂၄.၉)အတွင်း ရှိသင့်ပါတယ်။ ဘီအမ်အိုင်ဆိုတာ ကိုယ် အလေးချိန်(ကီလိုဂရမ်)ကို အရပ်အမြင့် မီတာ(နှစ်ထပ်ကိန်း)နဲ့ စားလို့ရတဲ့ရလဒ်ဖြစ်လို့ ကိုယ်အလေးချိန် တက်လာမှ ဘီအမ်အိုင်ပုံမှန်ဖြစ်မှာ ဖြစ်ပါတယ်။
ကိုယ်အလေးချိန်တက်အောင် မှန်ကန် တဲ့အစားအစာ ရွေးချယ်စားသောက်ဖို့ လိုအပ်ပါတယ်။ ကိုယ်စားသုံးနေကျအစား အစာကိုပြောင်းလဲလိုက်တာနဲ့ ကိုယ်အလေးချိန်ကလည်း တဖြည်းဖြည်း တက်လာမှာဖြစ်ပါတယ်။ ကိုယ်အလေး ချိန် ချက်ချင်းတက်လာဖို့ နေ့စဉ် နာရီဝက် ကနေ တစ်နာရီ အပြေး၊ ရွရွပြေး၊ လမ်းလျှောက်၊ စက်ဘီးစီး၊ ရေကူးပြုလုပ်သင့်ပါတယ်။ မနက်စာကို အပြည့်အဝစား၊ နေ့လယ်စာကို ပုံမှန်သာစားပြီး ညနေစာကိုပါ အဝစားရင်၊ အိပ်စက်ချိန်(၆-၈)နာရီ နှစ်နှစ်ခြိုက်ခြိုက် အိပ်ပျော်မယ်ဆို ရင် မကြာခင် ကိုယ်အလေးချိန်တက်လာ နိုင်ပါတယ်။ ။
ဒေါက်တာလွင်သန့်