တနင်္သာရီတိုင်းဒေသကြီး သရက်ချောင်းမြို့နယ် ကျွဲဇပ်ကျေးရွာနေ မျိုးဇော်ဦး(ခ)ခလိန်ချား၏နေအိမ်အား ဒီဇင်ဘာ ၉ ရက် ညနေ ၄ နာရီတွင် သတင်းအရဝင်ရောက်ရှာဖွေရာ စိတ်ကြွဆေးပြားများ ဖမ်းဆီးရမိကြောင်း သိရသည်။
ဖြစ်စဉ်မှာ ထားဝယ်မြို့ အမှတ်(၃၃)မူးယစ်တပ်ဖွဲ့စုမှ ဒုတိယရဲအုပ်ကျော်ဇောလင်းဦးစီး ပူးပေါင်းအဖွဲ့သည် သက်သေများနှင့်အတူ ဒီဇင်ဘာ ၉ ရက် ညနေ ၄ နာရီတွင် သရက်ချောင်းမြို့နယ် ကျွဲဇပ်ကျေးရွာနေ မျိုးဇော်ဦး(ခ)ခလိန်ချား ၃၉ နှစ်၏နေအိမ်အား မူးယစ်ဆေးဝါး သတင်းအရ ဝင်ရောက်ရှာဖွေစစ်ဆေးရာ WY စာတန်းပါ စိတ်ကြွဆေးပြား ၁၉၃၀ ပြား၊ မြန်မာငွေစက္ကူရောရာ ငွေကျပ် ၁၀၀၀၀၀ နှင့်အတူ တွေ့ရှိ သိမ်းဆည်းရမိသည်။
ဖြစ်စဉ်နှင့် ပတ်သက်၍ မျိုးဇော်ဦး(ခ)ခလိန်ချားအား သရက်ချောင်းမြို့မရဲစခန်းက မူးယစ်ဆေးဝါးနှင့် စိတ်ကို ပြောင်းလဲစေတတ်သော ဆေးဝါးများ ဆိုင်ရာဥပဒေအရ အမှုဖွင့်အရေးယူ စစ်ဆေးဆောင်ရွက်ထားရှိကြောင်း သိရသည်။