ONE 168 အမည်ရှိ MMA ပြိုင်ပွဲတွင် အောင်လအန်ဆန်နှင့် အာဒိုဂန်ယှဉ်ပြိုင်ထိုးသတ်မည်
ရန်ကုန် စက်တင်ဘာ ၅
MMA ပွဲစဉ်များနှင့် ကာလအတန်ကြာဝေးကွာနေသည့် အောင်လအန်ဆန်သည် စက်တင်ဘာလ ၇ ရက် နံနက်ပိုင်းတွင် အမေရိကန်နိုင်ငံ ကော်လိုရာဒိုပြည်နယ် ဒန်ဗာမြို့၌ ကျင်းပမည့် ONE 168 အမည်ရှိ MMA ပြိုင်ပွဲတွင် ဝင်ရောက်ထိုးသတ်သွားမည်ဖြစ်ပြီး မစ်ဒယ်ဝိတ်တန်းတွင် ရုရှားဖိုက်တာ အာဒိုဂန်နှင့် ထိုးသတ်ရမည်ဖြစ်ကြောင်းသိရသည်။
အောင်လအန်ဆန်က ပြိုင်ဘက်ကစားသမား အာဒိုဂန်အနေဖြင့် မိမိကိုလျှော့တွက်လိမ့်မည်မဟုတ်ဟု ONE 168 ပြိုင်ပွဲမတိုင်မီ ပွဲကြို သတင်းစာ ရှင်းလင်းပွဲ အခမ်းအနားတွင် ပြောကြားခဲ့သည်။
အောင်လအန်ဆန်သည် ONE Championshipနှင့် ဆယ်စုနှစ်တစ်ခုကြာလက်တွဲကာ MMAပွဲစဉ်များတွင် ထိုးသတ်ခဲ့ပြီး MMA ကမ္ဘာ့မစ်ဒယ်ဝိတ်တန်းချန်ပီယံနှင့် MMA ကမ္ဘာ့လိုက်ဖ်ဟဲဗီးဝိတ်တန်းချန်ပီယံ ခါးပတ်များ ရယူနိုင်သည်ထိ အောင်မြင်မှုများ ရယူနိုင်ခဲ့ကာ ONE Championshipတွင် မတူညီသည့် ဝိတ်တန်းနှစ်ခုရရှိသည့် ကစားသမားများမှ တစ်ဦးအပါအဝင် ရပ်တည်နိုင်ခဲ့သူဖြစ်သည်။
အောင်လအန်ဆန်ကONE 168 ပြိုင်ပွဲမတိုင်မီ ပွဲကြိုသတင်းစာရှင်းလင်းပွဲအခမ်းအနားတွင် “ကျွန်တော့် ဘက်ကလည်း အသင့်ဖြစ်နေသလို သူ့ဘက်ကလည်း အသင့်ဖြစ်နေမှာပါ။ သူ့အနေနဲ့ ကျွန်တော့်ကို လျှော့တွက်မယ်တော့မထင်ပါဘူး။ မကြာခင် ကျွန်တော်တို့ပွဲကို စောင့်ကြည့်လိုက်ပါ”ဟု ပြောကြားခဲ့ သည်။
အောင်လအန်ဆန်သည် အာဒိုဂန်မတိုင်မီက ရုရှားဖိုက်တာနှစ်ဦးဖြစ်သည့် ဗစ်တာလီဗစ်ဒက်ချ်နှင့် အလက်စကီယူတိုရင်တို့နှင့်ထိုးသတ်ခဲ့ဖူးပြီး နှစ်ဦးစလုံးကိုအနိုင်ရရှိထားသူဖြစ်သည်။
အာဒိုဂန်သည် MMAပြိုင်ပွဲတွင် ကိုးပွဲထိုးသတ်ထားရာ ကိုးပွဲစလုံးအနိုင်ရရှိထားပြီး ရှုံးပွဲမရှိကစားသမား တစ်ဦးဖြစ်ပြီး အဆိုပါကိုးပွဲတွင် အလဲထိုးဖြင့် လေးပွဲ၊ ချုပ်ကွက်ဖြင့် တစ်ပွဲနှင့် ဒိုင်မှတ်ဖြင့် လေးပွဲ အနိုင်ရရှိထားသူ တစ်ဦးဖြစ်ကြောင်း သိရသည်။
စည်သူအောင်