ကျိုင်းတုံနှင့် တာချီလိတ်မြို့တို့တွင် မူးယစ်ဆေးဝါးများ ဖမ်းဆီးရမိ
နေပြည်တော် စက်တင်ဘာ ၅
မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် စက်တင်ဘာ လ ၄ ရက် နံနက် ၈ နာရီ မိနစ် ၂၀ တွင် ကျိုင်းတုံမြို့၊ ရပ်ကွက်(၃)၊ နောင်ခမ်းရပ်တွင် ကျာမူး မောင်းနှင်ပြီး ကျဖေ့(ခ)အယ်လာ လိုက်ပါလာသည့် မော်တော်ဆိုင်ကယ်ကို ရပ်တန့်စစ်ဆေး ရှာဖွေရာ ၎င်းတို့ထံမှ စိတ်ကြွရူးသွပ်ဆေးပြား ၁၀၀၀၀ ကိုလည်းကောင်း။ စက်တင်ဘာလ ၃ ရက် ညနေ ၃ နာရီတွင် တာချီလိတ်မြို့၊ ပုန်းထွန်ရပ်ကွက်တွင် ကျော်လင်းစိုး မောင်းနှင်လာသည့် မော်တော် ဆိုင်ကယ် ကို ရပ်တန့်စစ်ဆေးရှာဖွေရာ ဆိုင်ကယ်တူးဘောက်အတွင်းမှ စိတ်ကြွရူးသွပ်ဆေးပြား ၂၀၀၀ နှင့် ဘိန်းဖြူ သုည ဒသမ ၀၂ ကီလိုသိမ်းဆည်းရမိခဲ့ပြီး ကွင်းဆက်အရ ညနေ ၃ နာရီခွဲတွင် တာချီလိတ်မြို့၊ ပုန်းထွန်ရပ်ကွက်နေ မသီတာလင်းထံမှ စိတ်ကြွရူးသွပ်ဆေးပြား ၁၀၀၀၀ ထပ်မံသိမ်းဆည်းရမိခဲ့သဖြင့် ၎င်းတို့အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အရေးယူထား ကြောင်း သိရသည်။
(ရဲပြန်ကြား)