ဘိုင်ယန်မြူးနစ်အသင်းနှင့် အပြီးသတ် စာချုပ်ချုပ်ဆိုရန် နည်းပြကွန်ပနီ ဂျာမနီနိုင်ငံသို့ ရောက်ရှိနေ
ဘိုင်ယန်မြူးနစ် အသင်းနည်းပြသစ်အဖြစ် အပြီးသတ် စာချုပ်ချုပ်ဆိုရန် နည်းပြကွန်ပနီသည် ဂျာမနီနိုင်ငံသို့ ရောက်ရှိနေကြောင်း သိရသည်။
ဘိုင်ယန်မြူးနစ်အသင်းသည် နည်းပြတူချယ်ကို ပြီးခဲ့သည့်ဘောလုံးရာသီက ခန့်အပ်ခဲ့ပြီး နည်းပြတူချယ်အနေဖြင့် အသင်းနှင့် ပထမဆုံးဘောလုံးရာသီတွင် ဂျာမန်ဘွန်ဒက်စ်လီဂါဖလား ဆွတ်ခူးပေးနိုင်ခဲ့
သော်လည်း ယခုဘောလုံးရာသီတွင် ဆယ်စုနှစ်တစ်စုကြာဆွတ်ခူးထားသည့် ဂျာမန်ဘွန်ဒက်စ်လီဂါဖလားကို လက်လွှတ် ခဲ့ရသည့်အပြင် ဂျာမန်ပိုကယ်ဖလား၊ ဂျာမန်စူပါဖလားနှင့်ချန်ပီယံလိဂ်ဖလားတို့ကိုလည်း လက်လွှတ်ခဲ့ရပြီး ရာသီအကုန်တွင် အသင်းနှင့်လမ်းခွဲရန် ဆုံးဖြတ်ခဲ့ခြင်း ဖြစ်သည်။
အသက် ၃၈ နှစ်အရွယ် မန်စီးတီးအသင်းကစားသမားဟောင်း နည်းပြကွန်ပနီသည် ပရော်ဖက်ရှင်နယ် ကစားသမားဘဝမှ အနားယူပြီးနောက် ၂၀၂၀ပြည့်နှစ်က ဘယ်လ်ဂျီယံကလပ် အန်ဒါလက်ချ် အသင်းနည်းပြဘဝဖြင့် နည်းပြလောကသို့စတင်ဝင်ရောက်ခဲ့ပြီး ၂၀၂၂ ခုနှစ်က ချန်ပီယံရှစ်ကလပ် ဘန်လေအသင်း နည်းပြအဖြစ် တာဝန်ယူခဲ့ခြင်း ဖြစ်သည်။
နည်းပြကွန်ပနီသည် ဘန်လေအသင်းကို တာဝန်ယူကိုင်တွယ်ခဲ့ရာ အသင်းနှင့်ပထမဆုံးဘောလုံးရာသီတွင်ပင် ချန်ပီယံရှစ်ပြိုင်ပွဲ၌ ချန်ပီယံဆုဆွတ်ခူးနိုင်ခဲ့ကာ ပရီးမီးယားလိဂ်ပြိုင်ပွဲသို့ တန်းတက်ခွင့်ရရှိအောင် စွမ်းဆောင် ပေးနိုင်ခဲ့သော်လည်း ယခုဘောလုံးရာသီတွင် ပရီးမီးယားလိဂ်ပြိုင်ပွဲမှ ပြန်လည်တန်းဆင်းခဲ့ရသည်။
ဘိုင်ယန်မြူးနစ် အသင်းက အစောပိုင်းကတည်းက ထိပ်တန်းနည်းပြများကို ချိတ်ဆက်မှုများ လုပ်ဆောင်ခဲ့သော်လည်း အဆင်မပြေ ဖြစ်ခဲ့သည့်အတွက် နည်းပြကွန်ပနီကို ခန့်အပ်ရန် ကြိုးပမ်းခဲ့ပြီး ၂၀၂၇ ခုနှစ်အထိ စာချုပ်ချုပ်ဆိုကာ ခန့်အပ်ရန် ပြင်ဆင်နေကြောင်း သိရသည်။
Ref;Fabrizio Romano