ပရီးမီးယားလိဂ်ပြိုင်ပွဲ၏ စက်တင်ဘာလ အတွက် တစ်လတာ အကောင်းဆုံးဆုများကို ချယ်လ်ဆီးအသင်း နည်းပြ မာရက်စ်ကာနှင့် ပယ်လ်မာတို့ ဆွတ်ခူး
လန်ဒန် အောက်တိုဘာ ၁၂
ပရီးမီးယားလိဂ်ပြိုင်ပွဲ၏ စက်တင်ဘာလအတွက် တစ်လတာ အကောင်းဆုံးဆုများကို ချယ်လ်ဆီး အသင်းနည်းပြ မာရက်စ်ကာနှင့် တိုက်စစ်ကစားသမား ပယ်လ်မာတို့ ဆွတ်ခူးနိုင်ခဲ့ကြောင်း သိရသည်။
ပရီးမီးယားလိဂ်ပြိုင်ပွဲ၏ စက်တင်ဘာလအတွက် တစ်လတာ အကောင်းဆုံးကစားသမားဆုကို ပယ်လ်မာသည် ဆန်ခါတင်ကစားသမား စာရင်းတွင် ပါဝင်ခဲ့ သည့် နယူးကာဆယ်အသင်းမှ ဟာဗေးဘားနက်၊ လီဗာပူးအသင်းမှ ဒီယက်နှင့် ဂရာဗန်ဘတ်ချ်၊ ဖူလ်ဟမ်အသင်းမှ ရာအူးဂျီမီနက်၊ အာဆင်နယ်အသင်းမှ ဂါဘရီရယ်၊ အဲဗာတန်အသင်းမှ မက်ခ်နေးနှင့် အက်စ်တွန်ဗီလာအသင်းမှ ဝက်စ်ကင်တို့ကို ကျော်ဖြတ်ပြီး ဆွတ်ခူးနိုင်ခဲ့ခြင်းဖြစ်သည်။
ပယ်လ်မာသည် စက်တင်ဘာလအတွင်း ကစားခဲ့သည့် ပရီးမီးယားလိဂ် ပွဲစဉ်များတွင် ချယ်လ်ဆီးအသင်းနှင့်အတူ အကောင်းဆုံး ခြေစွမ်းပြကစားနိုင်ခဲ့ကာ ပဲလေ့စ်အသင်းနှင့်ပွဲစဉ်တွင် ဂိုးဖန်တီးမှု တစ်ကြိမ်၊ ဝက်စ်ဟမ်း အသင်းနှင့်ပွဲစဉ်တွင် သွင်းဂိုး တစ်ဂိုးနှင့် ဘရိုက်တန်အသင်းနှင့် ပွဲစဉ်တွင် လေးဂိုးသွင်းယူနိုင်ခဲ့ပြီး သွင်းဂိုး ငါးဂိုးနှင့် ဂိုးဖန်တီးမှု တစ်ကြိမ်ပြုလုပ်နိုင်ပြီးနောက် စက်တင်ဘာလအတွက် တစ်လတာအကောင်းဆုံး ကစားသမားဆုကို ဆွတ်ခူး နိုင်ခဲ့ခြင်းဖြစ်သည်။
အလားတူ စက်တင်ဘာလအတွက် တစ်လတာ အကောင်းဆုံး နည်းပြဆုကိုလည်း ချယ်လ်ဆီးအသင်း နည်းပြ မာရက်စ်ကာက ဆန်ခါတင် နည်းပြစာရင်း တွင်ပါဝင်ခဲ့သည့် အာဆင်နယ်အသင်း နည်းပြ အာတီတာ၊ အက်စ်တွန်ဗီလာ အသင်းနည်းပြ အူနှိုင်း အမ်မရီ၊ ဖူလ်ဟမ်အသင်းနည်းပြ မာကိုဆေးလ်ဗား နှင့် လီဗာပူးအသင်းနည်းပြ အာနီဆလော့တို့ကို ကျော်ဖြတ်ပြီး ဆွတ်ခူးနိုင်ခဲ့ခြင်းဖြစ်သည်။
ပရီးမီးယားလိဂ်ပြိုင်ပွဲ၏ စက်တင်ဘာလအတွက် တစ်လတာအကောင်းဆုံး ဂိုးသမားဆုကိုမန်ယူအသင်းဂိုးသမား အိုနာနာနှင့် တစ်လတာ အကောင်းဆုံး သွင်းဂိုးဆုကို အက်စ်တွန်ဗီလာ အသင်းကစားသမား ဒူရမ်တို့က ဆွတ်ခူးနိုင်ခဲ့ကြောင်း သိရသည်။