မန်စီးတီးအသင်းတွင် နည်းပြဂွါဒီယိုလာပြီးနောက် အဓိကတိုက်စစ်မှူးဟာလန်း၏ အနာဂတ်မှာ မရေမရာဖြစ်နေ
မန်ချက်စတာ အောက်တိုဘာ ၁၆
မန်စီးတီးအသင်းတွင် နည်းပြဂွါဒီယိုလာပြီးနောက် အဓိက တိုက်စစ်မှူးတစ်ဦးဖြစ်သည့် ဟာလန်း၏ အနာဂတ်မှာ မရေမရာဖြစ်နေပြီး ဘာစီလိုနာအသင်းသို့ ပြောင်းရွှေ့ကစားဖွယ်ရှိနေကြောင်း သိရသည်။
မန်စီးတီးအသင်းတွင် ရာထူးကြီးဘုတ်အဖွဲ့ဝင် တချို့ရာထူးမှ နုတ်ထွက်ပြီးနောက် မန်စီးတီးအသင်း နည်းပြဂွါဒီယိုလာအနေဖြင့်လည်း အနာဂတ်မရေမရာဖြစ်နေပြီး ယခုဘောလုံးရာသီအကုန်တွင် အသင်း နှင့် လမ်းခွဲဖွယ်ရှိနေသည်ဟု သတင်းများ ထွက်ပေါ်လျက်ရှိသည်။
မန်စီးတီးအသင်းမှ နည်းပြ ဂွါဒီယိုလာထွက်ခွာ ပါက ဟာလန်းကလည်း မန်စီးတီးအသင်းမှ ထွက်ခွာ ဖွယ်ရှိနေပြီး ဘာစီလိုနာအသင်းဥက္ကဋ္ဌ လာပေါ်တာ ကိုယ်တိုင်ကလည်း ဟာလန်းကိုခေါ်ယူနိုင်ရန် ဘာမဆိုလုပ်ဆောင်မည်ဟု ပြောကြားထားပြီးနောက် ဘာစီလိုနာအသင်းသို့ ပြောင်းရွှေ့ရန် သတင်းများ ကျယ်ကျယ်ပြန့်ပြန့် ထွက်ပေါ်လာခြင်း ဖြစ်သည်။
ရီးယဲလ်မက်ဒရစ်အသင်းက ပြီးခဲ့သည့်နွေရာသီ ကစားသမားအပြောင်းအရွှေ့ကာလက အမ်ဘတ်ပီ ကို ခေါ်ယူပြီးနောက် ဘာစီလိုနာအသင်းကလည်း အမ်ဘတ်ပီ၏ ခေတ်ပြိုင်ကစားသမားတစ်ဦးဖြစ်သည့် ဟာလန်းကိုခေါ်ယူလိုနေပြီး ဟာလန်းကိုယ်တိုင်က လည်း အစောပိုင်းကတည်းက စပိန်လာလီဂါပြိုင်ပွဲ တွင်ကစားလိုသည့်အတွက် ဘာစီလိုနာအသင်းဘက်ကသာ ကမ်းလှမ်းလာပါက ပြောင်းရွှေ့ ကစားဖွယ် ရှိကြောင်း သိရသည်။
Ref;The Athletic