မြို့နယ်အဆင့် အင်္ဂလိပ်စာနှင့်သင်္ချာစွမ်းရည်ပြိုင်ပွဲကျင်းပ
အင်္ဂပူ အောက်တိုဘာ ၂၈
ဧရာဝတီတိုင်းဒေသကြီး မြန်အောင်ခရိုင် အင်္ဂပူမြို့နယ်ပညာရေးဌာန၏ ဦးဆောင်မှုဖြင့် ၂၀၂၄-၂၀၂၅ ပညာသင်နှစ် မြို့နယ်အဆင့် အင်္ဂလိပ်စာနှင့် သင်္ချာစွမ်းရည်ပြိုင်ပွဲကို အောက်တိုဘာလ ၂၈ ရက်တွင် အခြေခံပညာအထက်တန်းကျောင်း (ဇောင်းတန်း )၌ ကျင်းပသည်။
ရှေးဦးစွာ မြို့နယ်ပညာရေးဌာန ဒုတိယပညာရေးမှူး၊ မြို့နယ်အတွင်းရှိ အခြေခံပညာကျောင်းများမှ ဆရာကြီး၊ ဆရာမကြီးများနှင့် ဆရာ၊ ဆရာမများက အင်္ဂလိပ်စာနှင့် သင်္ချာစွမ်းရည်ပြိုင်ပွဲ ဝင်ရောက်ဖြေဆိုကြမည့် ကျောင်းသား၊ ကျောင်းသူများကို သတ်မှတ်စည်းမျဉ်း၊ စည်းကမ်းများနှင့် ပတ်သက်၍ ရှင်းလင်းပြောကြားသည်။
ထို့နောက် ပြိုင်ပွဲစတင်ကျင်းပရာ Grade-5 မှ Grade-9 အထိ ကျောင်းသား၊ ကျောင်းသူများ ဝင်ရောက်ဖြေဆိုကြပြီးအင်္ဂလိပ်စာစွမ်းရည်ပြိုင်ပွဲတွင် ၇၀ ဦးနှင့် သင်္ချာစွမ်းရည်ပြိုင်ပွဲတွင် ၁၁၇ ဦး ဝင်ရောက် ဖြေဆိုကြသည်။
အဆိုပါပြိုင်ပွဲ၌ ဖြေဆိုအောင်မြင်သော ကျောင်းသား၊ ကျောင်းသူများအနေဖြင့် တိုင်းဒေသကြီးအဆင့် အင်္ဂလိပ်စာနှင့် သင်္ချာစွမ်းရည်ပြိုင်ပွဲများတွင် ဝင်ရောက် ဖြေဆိုရမည်ဖြစ်ကြောင်း သိရသည်။