မြောင်းမြမြို့နယ် ပညာရေးကော်မတီ ဥက္ကဋ္ဌဖလား အခြေခံပညာကျောင်းပေါင်းစုံ အမျိုးသား ဘောလုံးပြိုင်ပွဲ ဗိုလ်လုပွဲနှင့် ဆုချီးမြှင့်ပွဲ ကျင်းပ
မြောင်းမြ အောက်တိုဘာ ၂၉
ဧရာဝတီတိုင်းဒေသကြီး မြောင်းမြခရိုင် မြောင်းမြမြို့နယ် ပညာရေးကော်မတီ ဥက္ကဋ္ဌဖလား အခြေခံပညာကျောင်းပေါင်းစုံ အသက် ၁၈ နှစ်အောက် အမျိုးသားဘောလုံးပြိုင်ပွဲ ဗိုလ်လုပွဲနှင့် ဆုချီးမြှင့်ပွဲ အခမ်းအနားကို အောက်တိုဘာလ ၂၈ ရက်က မြောင်းမြမြို့နယ် မြို့မအားကစားကွင်း၌ ကျင်းပသည်။
အဆိုပါဗိုလ်လုပွဲတွင် အခြေခံပညာအထက်တန်းကျောင်း(စခန်းကြီး)အသင်းနှင့် အခြေခံပညာအထက်တန်းကျောင်း (မြင်းကကွင်း)အသင်းတို့ ယှဉ်ပြိုင်ကစားကြရာ အခြေခံပညာ အထက်တန်းကျောင်း(စခန်းကြီး)အသင်းက ၂ ဂိုး-၁ ဂိုးဖြင့် အနိုင်ရပြီး ပထမဆုရရှိခဲ့သည်။
ဆက်လက်၍ မြောင်းမြမြို့နယ် စီမံအုပ်ချုပ်ရေးအဖွဲ့ ဥက္ကဋ္ဌ ဦးနော်မိုင်လှကြည် က ပထမဆုရရှိသည့် အခြေခံပညာ အထက်တန်းကျောင်း(စခန်းကြီး) အသင်းအား ပထမဆုဖလား ပေးအပ်ချီးမြှင့်ပြီးနောက် ဒုတိယဆု၊ တတိယဆုရရှိသည့် အသင်းများနှင့် ပွဲစဉ်တစ်လျှောက် အကောင်းဆုံး အားကစားသမားဆု ရရှိသူများအား တာဝန်ရှိသူများက ဆုများအသီးသီး ပေးအပ်ချီးမြှင့်ခဲ့သည်။
အဆိုပါအခမ်းအနားကို မြောင်းမြ မြို့နယ် စီမံအုပ်ချုပ်ရေးအဖွဲ့ ဥက္ကဋ္ဌနှင့် အဖွဲ့ဝင်များ၊ ဌာနဆိုင်ရာ တာဝန်ရှိသူများ၊ ဆရာ၊ ဆရာမများနှင့် ကျောင်းသား၊ ကျောင်းသူများ တက်ရောက်ကြည့်ရှု အားပေးခဲ့ကြောင်း သိရသည်။