နေပြည်တော် ဒီဇင်ဘာ ၁၈
တာချီလိတ်မြို့နယ်၌ ဒီဇင်ဘာ ၁၆ ရက် မွန်းလွဲပိုင်းက ငွေကျပ် ၁ ဘီလီယံတန်ဖိုးရှိ အိုက်စ်များ ဖမ်းဆီးရမိကြောင်း မြန်မာနိုင်ငံရဲတပ်ဖွဲ့မှ သိရသည်။
ဖြစ်စဉ်မှာ မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဒီဇင်ဘာ ၁၆ ရက် မွန်းလွဲ ၁ နာရီက ကြိုတင်ချိတ်ဆက်ထားသည့် သတင်းအရ တာချီလိတ်မြို့နယ် လွယ်စီတုံကျေးရွာ လောကဓမ္မ ဘုန်းတော်ကြီးကျောင်းလမ်း၌ ယန်းခေါင်ကျေးရွာဘက်မှ လောကဓမ္မ ကျေးရွာဘက်သို့ အားဝေ ၂၃ နှစ် မောင်းနှင်လာသည့် Toyota Hilux Revo Double Cab မော်တော်ယာဉ်နှင့် လီကောင်း(ခ) အားချာမောင်းနှင်ပြီး အားဂျွေ့ ၁၆ နှစ်လိုက်ပါလာသည့် Toyota Hilux Vigo Double Cab မော်တော်ယာဉ်တို့ ရောက်ရှိလာသဖြင့် စစ်ဆေးရန် ရပ်တန့်ခိုင်းစဉ်လီကောင်း(ခ) အားချာမှာ ယာဉ်ပေါ်မှ ခုန်ချထွက်ပြေးလွတ်မြောက်သွားပြီး အားဝေနှင့် အားဂျွေ့တို့ကို အိုက်စ် ၅၀ ကီလို၊ မော်တော်ယာဉ်နှစ်စီး တို့နှင့်အတူ ဖမ်းဆီးရမိခဲ့သည်။ ဖြစ်စဉ်နှင့်ပတ်သက်၍ အားဝေ၊ အားဂျွေ့နှင့် လီကောင်း(ခ) အားချာ(ဖမ်းမမိ)တို့ကို ဥပဒေအရ အရေးယူထားကြောင်း သိရသည်။